Русийә федератсийәсидики уйғурларниң сани көпәймәктә

Мухбиримиз үмидвар
2016-08-10
Елхәт
Пикир
Share
Принт

Йеқинқи йиллардин буян русийә федератсийәсидики уйғурларниң сани барғансери көпәймәктә. Илгири уйғурлар асаслиқи русийә пайтәхти москва шәһиригә мәркәзләшкән болса, һазир русийәниң шәрқидики башқа өлкиләргә җүмлидин сибирийә шәһәрлиригиму тарқалмақта икән.

Мәркизи москва шәһиригә җайлашқан «уйғур миллий мәдәнийәт бирләшмиси» ниң мәсули рәфқәт садиқоф әпәндиниң ейтишичә, нөвәттә мәзкур тәшкилатқа москва шәһири, москва области вә санктпетирбург шәһәрлиридики уйғур җамаити тәвә болуп, һазирчә русийәниң башқа шәһәрлиридики уйғурлар билән алақә орнитиш имканийити яритилмиған болсиму, әмма улар биләнму зич алақә орнитиш үчүн тиришилмақта.

Рәфқәт садиқоф әпәндиниң ейтишичә, русийәдики, җүмлидин москвадики уйғурларниң сани совет иттипақи йимирилгәндин кейинки йилларда, болупму йеқинқи он йиллар ичидә тез сүрәттә көпийишкә башлиған. Һазир москва шәһири вә москва областида һәммиси болуп тәхминән 700 уйғур бар.

Русийә һөкүмити уйғурларни русийә федератсийәсидики бир аз санлиқ милләт сүпитидә етирап қилған болуп, русийә федератсийәсиниң 2002-йилидики нопус тәкшүрүшидә русийәдики уйғурларниң саниниң үч миң, 2010-йилидики нопус тәкшүрүшидә төт миң икәнлики көрситилгән иди. Рәфқәт әпәнди бу санларниң һазир техиму ешиватқанлиқини, йәни уйғурларниң саниниң һазир бәш йерим миңдин артуқ икәнликини билдүрди.

Рус тилида тарқитилидиған «уйғур-тодай» сәһипилиридин мәлум болушичә, йеқинда русийәниң йекатеринабург шәһиридә уйғурларниң аммиви җәмийити қурулған болуп, бу шәһәрдә 150 дин артуқ уйғур барлиқи қәйт қилинди. Йәнә бир хәвәрдә сибирийәдики әң чоң шәһәр новосибирск шәһиридики уйғурларму «вәтән» җәмийити қурған болуп, уларниң сани 2014-йили 200-250 әтрапида болған болса һазир бу сан техиму ашқан. Сибирийидики йәнә бир шәһәр барнаулдики уйғурларму көпийишкә қарап йүзләнгән. Әлвәттә, русийәдики бу уйғурлар пүтүнләй дегүдәк оттура асия җумһурийәтлиридин кәлгәнләр икән.

Пикирләр (0)
Share
Толуқ бәт