Қирғизистанни пәхирләндүргән уйғур қиличвазлиқ чемпийони

Ихтиярий мухбиримиз ферузә
2018-10-24
Елхәт
Пикир
Share
Принт
Қирғизистанлиқ уйғур йигити һәсән бавудуноф мусабиқә мәйданида. 2018-Йили 21-өктәбир, аргентина.
Қирғизистанлиқ уйғур йигити һәсән бавудуноф мусабиқә мәйданида. 2018-Йили 21-өктәбир, аргентина.
RFA/Féruze

Аргентина пайтәхти буенос-айрес шәһиридә өткүзүлгән хәлқаралиқ яшлар тәнһәрикәт мусабиқисидә тәнһәрикәтниң қиличвазлиқ түри бойичә, қирғизистанлиқ уйғур йигити һәсән бавудуноф икки медалға еришти. У, командилар бойичә мусабиқидә күмүш медалиға, айрим дуел мусабиқисидә мис медалға еришти.

Һәсән бавудуноф 21-өктәбир күни қирғизистанниң манас айродромида тәнтәнилик күтүвелинди. Қарши елиш мурасимиға қирғизистан қиличвазлар федератсийәсиниң әзалири, қирғизистан тәнтәрбийә министирликиниң хадимлири, қирғизистан олимпик комитетиниң әзалири шундақла мухбирлар вә униң достлири вә уруқ-туғқанлар қатнашти.

Һәсән бувудуноф 2001-йили, бишкәк шәһиридә туғулған болуп, у һазир толуқ оттура мәктәпниң он биринчи синипини пүттүрүш алдида турмақта. У қиличвазлиққа 2014-йилдин буян қатнашмақта.

Һәсән бавудуноф 2016-йили қазақистанда өткүзүлгән өсмүрләр ара қиличвазлиқ мусабиқисидә биринчиликкә еришкән болса, 2017-йили тайландта өткүзүлгән асия чемпийонлуқини талишиш мусабиқисидә күмүш медалға игә болған иди. 2018-Йили яш қиличваз үчүн ғәлибилик йил болди; һәсән бавудуноф дубәй шәһиридә өткүзүлгән асия бойичә мусабиқидә алтун медалға игә болуп, андин италийәниң верона шәһиридики дуня чемпийонлуқини талишиш мусабиқисигә қатнишип биринчиликкә еришти һәм дуня яшлар мусабиқисигә қатнишиш үчүн рухсәтнамигә игә болди.

Мана бу қетим аргентинада өткүзүлгән яшлар мусабиқисидә болса икки медалға еришти.

Радийо зияритимизни қобул қилған яш қиличвазниң аниси мунәввәр әлийева, һәсәнниң бир нәччә тәнһәрикәт түрлиридин қиличвазлиқни таллиғанлиқи һәққидә тохтилип, мундақ деди: «һәсән бурун боксқа қатнашқан, чамбашчилиққиму қатнишип баққан, башқа испортларғиму қатнишип баққан, амма у испорт түрлири һәсәнгә анчә яқмиған, лекин һәсәнгә бу қиличвазлиқ бәк йеқип қелипту, мәнму бопту, беривәр дедим. Қиличвазлиққа қатнишиватқанлиқиға төт йил болди. У 2014 йилда, язда башлиған иди.»

Қирғизистанниң «акипрес» ахбарат агентлиқиниң йезишичә, қирғизистанниң испорт тарихида һеч бир тәнһәрикәтчи мундақ дуня мусабиқилиридә қиличвазлиқ бойичә икки медалға еришмигән икән. Мунәввәр ханим йәнә һәсәнниң талантини тренерланиң юқири баһалиғанлиқини ейтти.

У мундақ деди: «һәсәнниң тренерлири маңа телефонлар қилди. Балиңизниң таланти бар икән дәп. Қирғизистанда қиличвазлиқни һеч ким һәсәндәк қилалмайдикән, һәсән өзи бу йәрдә биринчи болуп, һәр вақтида яхши нәтиҗиләрни көрситип кәлмәктә. Қирғизистанда униңға охшаш яки униң билән тәң болғудәк һеч ким йоқ. Қирғизистанлиқлар илгири қиличвазлиқтин шундақ юқири дәриҗидики медалларға һечқачан еришип бақмиған икән. Һәсән биринчи икән».

Биз бу яш испортчиниң таланти вә миҗәзи тоғрисида һәсәнниң тренери «совет иттипақиниң маһири» олег нишук әпәндигә мураҗиәт қилдуқ. У һәсән билән тонушуп, тәқдир уларни бирләштүргәнлики үчүн хурсән болғанлиқини билдүрүп, мундақ деди:
«Мән һәсән тоғрисида немиләрни дейәләймән? мениң үчүн һәсән әң мукәммәл идеал шагиртлиримниң бири. Маңа аҗайип бир пурсәт берилди. Тәқдир мени шундақ итаәтчан вә талантлиқ бала билән бирләштүрди. Бу бала йешиға қаримастин өз пикиригә игә, мәқситигә мувапиқ, немини халайдиғанлиқини, өзигә немә керәкликини яхши билидиған бала. У өз алдиға бир мәқсәт қойған болса, чоқум ашу мәқситигә еришиду. Худайимға шүкүр бизниң мәқситимиз бир икән. Биз һәсән билән 2017-йили өз алдимизға мәқсәт қойған идуқ. Бу болсиму яшлар мусабиқисигә қатнишип өзимизниң маһаритимизни көрситип юқири дәриҗиләргә еришиш иди. Мана бүгүн һәсән аргентина пайтәхти буенос-айрестин икки медал елип әкәлди. Бүгүңичә қирғизистанниң испорт тарихида һеч ким олимпиктин икки медалға еришәлмигән. Мән һәсән билән ишлигинимдин бәк хурсәнмән. Һәсәндәк шагиртлар һәр бир тренерниң арзуси дәп ейтсам болиду. Һәсән һечқачан дәрсләргә кечикмәйду. Дәрсләрни ташлап кәтмәйду, чүнки бу бәк чидамлиқ, тәрбийәлик бала, шундақла у бәк миннәтдарлиқини билидиған бала».

Радийо зияритимизни қобул қилған қирғизистан җумһурийити алий кеңишиниң әзаси пәрһат тулендибайеф әпәнди бу яш уйғур чемпийондин пәқәт уйғурларла әмәс, бәлки пүтүн қирғизистан хәлқи пәхирлинидиғанлиқини билдүрди. У мундақ деди: «бизниң балимиз һәсән бавудоноф яшлар олимпик мусабиқисидә яхши нәтиҗигә йәтти, күмүш вә мис медал алди, шуниң билән биз наһайити пәхирлинимиз. Бизниң баллар шундақ чоң ғәлибиләргә йәткини бәк яхши. Бизниң қирғизистанда һазир испортқа яхши көңүл бөлүнүватиду, бизниң чемпийонлиримиз асия мусабиқилиридә, дуня чемпийонлуқини қолға кәлтүрүш мусабиқилиридә юқири орунларни игилимәктә.»

Мәлум болушичә, қирғизистандики уйғурлар сани анчә көп болмисиму, әмма улар арисидин пүтүн оттура асияға тонулған әрбаблар, җүмлидин испорт саһәсидә дуня чемпийонлири йетишип чиқти. Уйғурлар тәнһәрикәт ишлириға алаһидә әһмийәт беридикән.

Пикирләр (0)
Share
Толуқ бәт