Бишкәктә оттура асия уйғурлириниң мәдәнийәт мурасими өткүзүлди

Ихтиярий мухбиримиз ферузә
2018-11-02
Елхәт
Пикир
Share
Принт
Бишкәктә өткүзүлгән оттура асия уйғурлириниң мәдәнийәт мурасимида ақ-сақаллар или нахшилирини ейтмақта. Оңдин иккинчи киши миллий инқилаб қатнашқучиси аблимит бәкри әпәнди. 2018-Йили 1-ноябир. Бишкәк, қирғизистан.
Бишкәктә өткүзүлгән оттура асия уйғурлириниң мәдәнийәт мурасимида ақ-сақаллар или нахшилирини ейтмақта. Оңдин иккинчи киши миллий инқилаб қатнашқучиси аблимит бәкри әпәнди. 2018-Йили 1-ноябир. Бишкәк, қирғизистан.
RFA/Feruze

1-Ноябир күни қирғизистан пайтәхти бишкәк шәһиридә өткүзүлгән қирғизистан мәдәнийәт күнигә беғишланған мурасимға мәзкур төт дөләттин кәлгән уйғур вәкиллири қатнашти.

Мурасим қирғизистан уйғурлири «иттипақ» җәмийитиниң уюштуруши билән мәдәнийәт сарийида өткүзүлди. Паалийәткә қирғизистан җумһурийити алий кеңишиниң әзаси пәрһат тулендибайеф, қирғизистан һөкүмитигә қарашлиқ хәлқара мунасивәтләр тәшкилатиниң муавин рәиси есенбек огонбайеф, қирғизистан хәлқлири мәҗлиси тәркибидики аз санлиқ милләт вәкиллири, қирғизистандики бир қисим даңлиқ нахшичи-сазәндиләр, «аламедин хәвәрлири» гезити вә CTV телевизийә қанилиниң мухбирлири болуп көп санда киши қатнашти. 

Мурасимға һөрмәтлик меһман қатарида қазақистандин кәлгән турсун һаҗим арзийеф, ваққас мәмәдиноф қатарлиқ җамаәт әрбаблири вә русийә уйғур мәдәнийәт мәркизиниң рәиси рәпқәт садиқоф, сәнәт әрбаби, рәссам азад мәмәдиноф шундақла өзбекистан уйғур мәдәнийәт мәркизиниң вәкиллири қатнашти. Паалийәт қирғизистан уйғурлири «иттипақ» җәмийитиниң мәдәнийәт бөлүминиң рәиси қәлбинур турдийеваниң риясәтчиликидә елип берилди. 

Паалийәтниң мәқсити, уйғур җамаәтчиликини бирләштүрүш, төт дөләттә яшаватқан уйғурлар арисидики мунасивәтләрни күчәйтиш, бирлишип йеңи тәтқиқатларни елип бериш вә уйғур мәдәнийәт байлиқини сақлап қелиштин ибарәт икән.
Мәзкур паалийәткә қатнашқан қирғизистан һөкүмитигә қарашлиқ хәлқара мунасивәтләр тәшкилатиниң муавин рәиси есенбек огонбайеф қатнашқучиларни мәдәнийәт байрими билән тәбриклиди вә қирғизистанда йетишип чиққан сәнәт әрбаблириниң қирғизистан мәдәнийитигә зор һәссиләрни қошуп келиватқанлиқини алаһидә тәкитләп өтти. У мундақ деди;

«Һөрмәтлик меһманлар! силәрни байримиңлар билән чин қәлбимдин тәбрикләймән, бүгүнки күнләрдә уйғурлар қирғизистан илим-пени вә мәдәнийитиниң тәрәққий қилишиға өзлириниң зор төһпилирини қошуп кәлмәктә. Қирғизистанда көрүнәрлик уйғур сәнәткарлар аз әмәс; уларниң ичидә қирғизистан хәлқ артиси султан кәримоф, қирғизистанниң хизмәт көрсәткән артиси зәйтунә бабаҗанова, атақлиқ рәссам сабитҗан бабаҗаноф вә тәләт миррәхимоф қатарлиқлар бар. Уларниң қатарида қирғизистан уйғурлири ‹иттипақ' җәмийитиниң елип бериватқан ‹маканим қирғизистан', ‹уйғурлар бир аилидә', шундақла чиңгиз айтматофниң иҗадийитигә беғишланған нурғун паалийәтлирини биз юқири баһалаймиз. ‹Иттипақ' җәмийити қирғизистан хәлқлири мәҗлиси тәркибидә болуп, милләтләр ара иттипақлиқини күчәйтиштә вә азсанлиқ милләтләр мәдәнийитини тәрәққий қилдурушта муһим паалийәтләрни өткүзмәктә».

Нутуқ сөзләшкә тәклип қилинған қазақистан җумһурийити уйғур җамаәт вә мәдәнийәт әрбаби ваққас мәмәдиноф өз сөзидә 21-әсирдә уйғурлар еғир күнләргә учраватқан бир пәйттә, сәнәт паалийәтлириниң уйғурларни бирләштүрүватқанлиқи, уйғурларниң бай мәдәнийитини дуняға тонуштурушниң зөрүр икәнликини тәкитлиди. 

Мәдәнийәт кечисигә қатнашқан қазақистан уйғурлириниң көрүнәрлик паалийәтчиси турсун һаҗим арзийеф, өз нутқида қирғизистан вә қазақистан уйғурлирини «гәрчә улар бу дөләтләрниң пуқралири сүпитидә хушал-хурам яшисиму, әмма өзлириниң тарихий вәтини-шәрқий түркистанни унтумай, һәр даим зулум астида болуватқан қериндашлири үчүн дуа қилиш» қа дәвәт қилди.

Мәзкур мурасим давамида сәнәт саһәсидә хизмәт көрсәткән әрбаблар «еһсан» медали вә тәқдирнамиләр билән мукапатланди. Өзбекистан уйғурлириниң атақлиқ нахшичиси һәлимә баратоваға уйғур мәдәнийитини тәрәққий қилдуруш вә икки дөләттики уйғурлар мунасивәтлирини күчәйтиш җәһәтләрдики хизмәтлири үчүн «еһсан» медали вә уйғур миллий кийими тәқдим қилинди. 

Радио зияритимизни қобул қилған һәлимә баратова қирғизистан вә өзбекистан уйғурлириниң мунасивәтлириниң җанлинип тәрәққий қиливатқанлиқиға хурсән икәнлики, келәчәктә икки дөләт җамаәтчилики техиму өм болушини үмид қилидиғанлиқини билдүрди.

Қазақистандин кәлгән уйғур җамаәт вә мәдәнийәт әрбаби ваққас мәмәдиноф зияритимизни қобул қилип, мәдәнийәтниң пүтүн дуняға чечилип кәткән уйғурларни бирләштүрүватқанлиқини ейтти.

Мурасим давамида өзбекистанда хизмәт көрсәткән нахшичи айтурған һәсәнова өз нахшилирини яңритип, тамашибинларниң қизғин алқишлириға еришти. Радио зияритимизни қобул қилған айтурған һәсәнова қирғизистанда уйғур тиятири йоқ болсиму, әмма қирғизистандики уйғурларниң өз мәдәнийитини сақлап, уни тәрәққий қилдурушқа тиришиватқанлиқини билдүрди. 

Мәдәнийәт паалийитигә тамашибин қатарида қатнашқан қирғизистан «иттипақ» җәмийити ақ сақаллар кеңишиниң әзаси абдуқеюм розийеф әпәнди бу паалийәтниң әһмийитиниң юқири икәнликини тәкитлиди.

Мәзкур паалийәт давамида «интизар» уйғур миллий музика ансамбили «пәнҗигаһ» муқами вә или хәлқ нахшилирини яңратти, шундақла яш нахшичилар нуртай абдуреһим, сабирҗан ниязоф, шөһрәт яқубоф қатарлиқлар өз нахшилирини орундап, тамашибинларниң кәйпиятини техиму юқири көтүрди.

Бу қетим бишкәктә өткүзүлгән мәзкур паалийәт тунҗи қетим қазақистан, қирғизистан, өзбекистан вә русийә уйғурлириниң бир ариға җәм болуп, бирликтә өткүзгән уйғур миллий сәнәт паалийитидур.

Пикирләр (0)
Share
Толуқ бәт