«яшлиқ авази» гурупписи яшларниң билимини синаш мусабиқиси өткүзди

Ихтиярий мухбиримиз ферузә
2018-10-30
Елхәт
Пикир
Share
Принт
3-Нөвәтлик «билим оюни» илмий мусабиқисидин бир көрүнүш. 2018-Йили 27-өктәбир. Бишкәк, қирғизистан.
3-Нөвәтлик «билим оюни» илмий мусабиқисидин бир көрүнүш. 2018-Йили 27-өктәбир. Бишкәк, қирғизистан.
RFA/Feruze

Қирғизистандики уйғур яшлири өз миллий кимликигә көңүл бөлүп, яш-өсмүрләрниң билимгә болған қизғинлиқини ашуруш үчүн, яшлар ара билим мусабиқилирини, йәни зеһин синаш мусабиқә оюнлирини өткүзмәктә. 27-Өктәбир күни бишкәк шәһиридә «билим оюни» дәп аталған илмий мусабиқиниң үчинчи қетимлиқи өткүзүлди.

Бүгүнки күнләрдә қирғизистанда яшаватқан уйғур яшлириниң өз ана тили, мәдәнийити, тарихи вә башқа саһәләрдики билимлирини ашуруш үчүн «яшлиқ авази» намлиқ уйғур яшлири топи «билим оюни» ни уюштуруп, уйғур яшлирини өз тарихини вә миллий кимлики билишкә риғбәтләндүрүп кәлмәктә. «Билим оюни» паалийитигә қатнашқан яшлар сәккиз түр бойичә билим мусабиқиси өткүзгән болуп, улар пәйғәмбәрниң һаяти, қирғизистан тарихи, уйғур тарихи вә мәдәнийити, тәнтәрбийә, чиңгиз айтматоф иҗадийити, мәркизий асия дөләтлири, мәшһурларниң сеймаси қатарлиқ мәзмунларға мунасивәтликтур. Мусабиқә елип берилған һәр бир түр 10 соални өз ичигә алған. 

Мәзкур мусабиқигә уйғур яшлиридин 7 гуруппа қатнашти, улар өзлириниң гуруппилириға өзгичә намларни бәргән болуп, буларниң ичидики «оттуз оғул», «қәдинас», «сәбрә» қатарлиқ гуруппилар билән биргә мәзкур мусабиқигә биринчи қетим қатнашқан «уйғурлар биз», «алтун оғул», «зәпиран» дәп аталған гуруппиларму өз маһарәтлирини көрсәтти. Маһирларниң көпинчиси бу мусабиқигә тунҗи қетим қатнашқан болсиму, лекин өзлириниң маһарәтлирини йетәрлик дәриҗидә көрситишкә тиришти. Уларниң мусабиқигә китаб вә интернеттин көплигән учур-мәлуматларни издәп, хели тәйярлиқ билән кәлгәнлики мәлум.

«Билим оюни» ға қатнашқан «сәбрә» гурупписиниң әзаси уммигүлсүм оюн уюштурғучиларға рәһмитини билдүрди. У мәзкур оюнға үчинчи қетим қатнишиватқан болуп, бу қетим биринчиликкә еришкән. У, бу оюнда уйғур яшлириниң өз ана тили вә мәдәнийити тоғрисида көп билимләргә еришкәнликини алаһидә тәкитлиди. У мундақ деди: «әссаламуәләйкум, биз ‹сәбир' топи, мана үч қетим ойнап бүгүн үчинчи оюнимизда биз биринчиликкә ериштуқ. Дәсләпки оюнларда биз үчинчи, андин иккинчи орунларни игилигән идуқ, мана бүгүн биз биринчиликкә ериштуқ. Бизниң топимиздикиләрни бу оюнға мән башлап кәлгән идим, улар унимиған болсиму мән көндүрүп әкәлдим. Бу шундақ яхши билимлик оюн, биз һәр бир оюндин җиқ нәрсиләрни өгинимиз. ‹яшлиқ авази' топиға рәһмитимизни билдүримиз. Иншаалла келәчәктә йәнә мусабиқә оюнлири болса биз йәнә қатнишимиз».

«Билим оюни» дәп аталған илим мусабиқиси үч саәттин артуқ давамлашқан болсиму, барлиқ қатнашқучилар юқири кәйпиятта олтуруп берилгән соалларни муһакимә қилишти. Мәзкур оюнға биринчи қетим қатнашқан «зәпиран» топиниң әзаси зәйтунә бу мусабиқә оюнидин хурсән болғанлиқини ейтип вә мундақ оюнларниң, йәни, билим җәһәттә зеһин синаш мусабиқилириниң көпрәк өткүзүлүшини халайдиғанлиқини билдүрди. У мундақ деди: «мениңчә мушундақ оюнлар бәк яхши, биз аҗайип җиқ нәрсиләрни өгәндуқ, көп нәрсиләрни билмигән икәнмән, қоллиримғиму яздим тоғра җавабларни, бәк яқти бу оюн, һәр даим шундақ мусабиқиләр болуп турсун».

Бу оюнға қатнишиш үчүн алайитән қазақистанниң алмута шәһиридин мурат исимлик йигит келипту. У радио зияритимизни қобул қилип, бу оюнға өзиниң иккинчи қетим қатнишиватқанлиқини вә бу оюндин хурсән болғанлиқини ейтип, буниң яшларниң тәрәққиятида вә миллий кимликини җанландурушида муһим рол ойнайдиғанлиқини тәкитлиди. .

«яшлиқ авази» әзалириниң ейтишичә, улар өктәбирдә бу йил пилан қилинған оюнларниң һәммисини тамамлиди, улар келәчәктә йәнә мундақ оюнларни, йәни мусабиқиләрни уюштурмақчикән, әмма улар 2018-чи йилиниң ахирқи икки ейи ичидә «яшлиқ авази мукапати» паалийитини тәйярлаш үчүн нурғун паалийәтләрни өткүзмәкчи икән.

Мусабиқиниң нәтиҗисидә «сәбрә» гурупписи биринчиликкә, «қәдинас» вә «оттуз оғул» топлири иккинчи вә үчинчиликкә еришти.

Бу қетимқи мусабиқини баһалиғучи болған теббий илимләр доктори рәшидәм абдуллайева бу хил мусабиқиләрниң яшларниң өз миллий мәдәнийити һәққидики чүшәнчилирини ашурушта муһим рол ойнайдиғанлиқини билдүрди.

Пикирләр (0)
Share
Толуқ бәт