Хитайниң лондондики әлчиханиси билән даңлиқ марка мәһсулатлирини сатидиған дуканлар алдида намайиш өткүзүлгән

Ихтиярий мухбиримиз әркин тарим
2020-03-06
Елхәт
Пикир
Share
Принт
Хитайниң лондондики әлчиханиси билән даңлиқ марка мәһсулатлирини сатидиған дуканлар алдида өткүзүлгән намайиштин бир көрүнүш. 2020-Йили 5-март. Лондон, әнглийә.
Хитайниң лондондики әлчиханиси билән даңлиқ марка мәһсулатлирини сатидиған дуканлар алдида өткүзүлгән намайиштин бир көрүнүш. 2020-Йили 5-март. Лондон, әнглийә.
RFA/Erkin Tarim

Әнглийә әмгәкчиләр партийәси қурған «уйғурларни қоллаш гурупписи» билән дуня уйғур қурултийиниң уюштурушида 3-айниң 5-күни кәч саәт алтидин йәттигичә хитайниң лондонда турушлуқ әлчиханиси алдида намайиш өткүзүлгән.

6 Айдин буян һәр айниң 5-күни өткүзүлүватқан намайишниң 6-қетимлиқиға әнгилийә әмгәкчиләр партийәсигә тәвә ишчилар уюшмилириниң әзалири вә уйғурлардин болуп көп санда киши қатнашқан. Улар қоллирида ай-юлтузлуқ көк байрақ вә лозункиларни көтүргән һалда «уйғурларға әркинлик, хитай җаза лагерлирини тақисун, уйғурлар өз тәқдирини өзлири бәлгилисун, хитай уйғурларни қул қилмисун, уйғур, тибәт вә хоңкоңлиқларға мустәқиллиқ» дегәндәк шоарларни товлашқан.

Бу һәқтә телефон зияритимизни қобул қилған әнглийәдики уйғур паалийәтчи, дуня уйғур қурултийиниң лондонда турушлуқ вәкили рәһимә мәхмут ханим 3-айниң 5-күни лондондики хитай әлчиханиси алдида өткүзүлгән намайиш тоғрисида мәлумат бәрди. У, 5-числа хитайға қарши өткүзүлгән бу намайишқа һаваниң қаттиқ соғуқ болушиға қаримай көп санда кишиниң қатнашқанлиқини баян қилди.

Австралийә истратегийәлик сиясәт институти доклат елан қилип, хитайниң уйғур ишләмчилирини дунядики даңлиқ маркиларни ишләпчиқириш завутлирида мәҗбурий ишлитиватқанлиқини ашкарилиғандин кейин, мәзкур доклат хәлқарада қаттиқ инкас қозғиғаниди. Доклатта баян қилинишичә, хитай һөкүмити лагерлардики түмәнлигән уйғур тутқунлирини йөткәп, «алма», «BMW», «Sony», «GAP», «Nike», «хуавей», «Samsung» қатарлиқ дуняви даңлиқ шркәтләргә мәһсулат ишләпчиқиридиған завутларда мәҗбурий ишләткән. 5-Март күни лондондики хитай әлчиханиси алдида өткүзүлгән намайиш ахирлашқандин кейин намайишчилар лондондики бу даңлиқ маркилиқ мәһсулатларни сатидиған дуканниң алдиға берип тәшвиқат варақчилирини тарқатқан. 

Мәлум болушичә, лондонда бурундин тартип хитайға наразилиқ билдүрүш паалийәтлири, болупму намайишлар изчил һалда өткүзүлүп келинмәктә. Лекин өткән йилиниң оттурилиридин тартип әнглийә парламентидиму бәзи паалийәтләр елип берилишқа башлиди. Болупму әнглийәниң әмгәкчиләр партийәси өткән йили 9-айда «уйғурларни қоллаш һәрикити» намида тәшкилат қуруп, һәр айниң 5-күни хитайға қарши наразилиқ намайиши өткүзүшни қарарлаштурғаниди. Әмдиликтә болса әнгилийә ишчилар партийәсиниң ишчилар уюшмиси әнглийәниң һәр қайси шәһәрлиридә намайиш өткүзүп, хитайниң уйғурларни мәҗбури әмгәккә селиш сияситигә наразилиқ билдүридикән. Рәһимә мәхмут ханим бу һәқтә мәлумат бәрди. 

5-Март күнидики намайишқа иштирак қилған уйғур қизи дилназ кәрим уйғурлардин башқа милләтләрниң «инсанлиқ бурчимизни ада қилимиз» дәп намайишқа қатнашқанлиқини баян қилди. 

Уйғур зиялийси әзиз әйса әлкүн әпәнди әнглийәдә уйғурларни қоллайдиған партийәләр, аммиви тәшкилатлар, парламент әзалири вә кишиләрниң саниниң күнсайин көпийиватқанлиқини, әнглийә әмгәкчиләр партийәси ишчилар уюшмисиниң һазир қиливатқан паалийәтлирини уйғур дәвасиниң йеңи бир пәллиси дегили болидиғанлиқини, бундақ паалийәтләрниң буниңдин кейин техиму зорийидиғанлиқини тәкитләп өтти. 

Дуня уйғур қурултийиниң рәиси долқун әйса әпәнди 2019-йили, 24-июл күни әнглийә парламентида уюштурулған «уйғурларниң диний вәзийити вә җаза лагерлири тоғрисида гуваһлиқ бериш йиғини» ға қатнашқан иди. Мәзкур гуваһлиқ бериш йиғини билән бир вақитта йәнә йиғин хатимисидә һәрқайси партийә вәкиллириниң аваз қошуши билән «уйғур достлуқ гурупписи» қурулғаникән.

Пикирләр (0)
Share
Толуқ бәт