Ürümchide 38 yashliq tijaretchi shahimerdan perhatning lagérdin chiqip 10 kündin kéyin jan üzgenliki ashkarilandi

Muxbirimiz shöhret hoshur
2019-09-05
Élxet
Pikir
Share
Print
Xitayning jaza lagérdin chiqip 10 kündin kéyin jan üzgen 38 yashliq tijaretchi shahimerdan perhat a'ilisi bilen.
Xitayning jaza lagérdin chiqip 10 kündin kéyin jan üzgen 38 yashliq tijaretchi shahimerdan perhat a'ilisi bilen.
RFA/Shöhret Hoshur

Ötken hepte anglighuchilirimizdin biri ürümchide dollarchiliq qilidighan tijaretchi shahimerdan perhatning lagérdin chiqip 10 kündin kéyin jan üzgenlikini melum qilghanidi. Téléfonimizni qobul qilghan ürümchidiki saqchi xadimliri gep arisida shahimerdan perhatning ürümchining chimashen dégen ahaliler rayonigha nopusluq ikenlikini tilgha alghan bolsimu, uning lagérgha solan'ghanliqi we ölgenliki heqqide éghiz achmidi. Shahimerdan perhatning chet'eldiki uruq-tughqanliri uning 2017‏-yili 3‏-ayning axirliri lagérgha ekétilip 2018‏-yili 8‏-awghust küni qoyup bérilgenliki 18 ‏-awghust küni doxturxanida jan üzgenlikini ashkarilidi.

Anglighuchimizdin kelgen uchurda, shehimerdan perhatning birqanche ewlad ürümchide yashap kelgen kona ürümchiliklerdin ikenliki, bulaqbéshi etrapida dollarchiliq bilen shughullinidighanliqi, lagérgha ekétilishtin burun boyi 1. 85 Métir, béjirim bir kishi ikenliki, awghustning béshida lagérdin qoyup bérilip, 10 kündin kéyin doxturxanida jan üzgenliki bayan qilin'ghan. Téléfonimizni qobul qilghan jenubiy qowuq saqchi xadimi, shahimerdan perhatning ölüm uchuri heqqide éghiz achalmidi. Ürümchidiki yene bir saqchixana xadimi, lagérdin chiqip tügep ketken shahimerdan perhatning qaysi saqchixanining tewelikige nopusluq ikenlikini sorighinimizda, uning chimashen rayonluq saqchixanigha tewe ikenlikini bayan qildi. Emma u shahimerdan perhatning qachan we qeyerde ölgenliki heqqidiki so'alimizgha jawab bermidi. Yene bir saqchi xadimimu, shahimerdanning néme sewebtin ölgenlikini sorighinimizda, chimashen ahaliler rayonidin ehwal igilishimizni tewsiye qildi.

Radiyomizgha kelgen inkasta, shahimerdan perhatning qéynatisi tursun hajining türkiyede yashaydighanliqi qeyt qilin'ghan. Tursun hajim ötken hepte istanbulda küy'oghlining 7 nezirini ötküzgenlikini bayan qildi. Tursun hajining bayanliridin shahimerdanning yaponiyediki pa'aliyetchi haji qutluq qadirining achisining oghli ikenliki melum bildi. Haji qutluq qadiri shahimerdanning kimliki we ölümi heqqide töwendikiche melumat berdi. Melum bolushiche, shahimerdan perhat, inisi shir'eli perhat bilen birlikte, 2017 ‏-yili 3 ‏-ayning axiri bir kéchide tengla tutup kétilgen. Shahimerdan bu yil 8 ‏-awghust küni bir tére, bir söngek halitide lagérdin qoyup bérilgen. U öyige chiqqandin kéyin ornidin turalmighan, doxturxanigha apirilghanda dawalash ünüm bermey 10 kündin kéyin yeni 18 ‏-awghust küni doxturxanida jan üzgen.

Ürümchidiki saqchi xadimliri shahimerdan perhatning néme sewebtin qoyup bérilgenliki we ölgenliki heqqidiki so'alimizghimu jawab bermidi. Haji qutluq qadiri, bu yil üchinchi ayda shahimerdanning inisi shir'elining salametlikide éghir mesile körülüp bir qétim a'ilisi bilen körüshtürülgenliki we uzun ötmey lagérgha ekétilgenliki, bular, shir'elining hayatidin endishe qilip turghan mezgilide, ushtumtut halda shahimerdanning ölüm xewiri chiqqanliqini bayan qildi.

Haji qutluq qadiri yene shahimerdan we inisining iman-étiqadliq kishiler ikenliki, tijaritining zakitini waqtida ayrip we xeyr saxawet ishliri bilenmu izchil shughullinip kelgenliki we mushu sewebtin lagérgha ekétilgenlik éhtimalliqini otturigha qoydi.

Toluq bet