Уйғур әдлийәси архип амбири: «хитайниң җаза лагерлири сиясити ахирлашқини йоқ»

Ихтиярий мухбиримиз әкрәм
2020-03-26
Елхәт
Пикир
Share
Принт
«Шәрқий түркистандики кишилик һоқуқ дәпсәндичилики хатириси» намлиқ доклатқа киргүзүлгән рәсим.
«Шәрқий түркистандики кишилик һоқуқ дәпсәндичилики хатириси» намлиқ доклатқа киргүзүлгән рәсим.
Photo: RFA

«Уйғур әдлийәси архип амбири» йерим йиллиқ доклат елан қилип, хәлқараниң диққитини җаза лагерлири мәсилисигә тартишқа тиришти.

Дуняниң диққәт етибари корона вирусиға мәркәзләшкән, хәлқарада қизиқ нуқтиға айланған хитайниң уйғур дияридики җаза лагерлири мәсилиси униң көләңгүси астиға чүшүп қалған бүгүнки вәзийәттә мәркизи норвегийәниң осло шәһиридики «уйғур әдлийәси архип амбири» йерим йиллиқ доклат елан қилип, хәлқараниң нәзирини йәнә бир қетим уйғурлар мәсилисигә тартишқа тиришқан.

«Уйғур әдлийәси архип амбири» елан қилған «шәрқий түркистандики кишилик һоқуқ дәпсәндичилики хатириси» намлиқ бу йерим йиллиқ доклат инглиз тилида һазирланған болуп, 23 бәтлик бу доклатқа хитайниң түрмилиридә, җаза лагерлирида, мәҗбурий әмгәк орунлирида еғир вәзийәттә яшаватқан уйғурларниң архиплири киргүзүлгән.

«Уйғур әдлийәси архип амбири» ниң мәсули бәхтияр өмәр әпәндиниң билдүрүшичә, корона вабаси сәвәблик хитайниң шәрқий түркистандики җаза лагерлири сияситидә һечқандақ иҗабий өзгириш болмиған. Әксичә бесим техиму ешип, назарәт һәссиләп күчәйгән.

У сөзидә муһаҗирәттики уйғурларниң җаза лагерлиридики қериндашлири тоғрилиқ гуваһлиқ бериш ишлириға сәл қаримаслиқини, бу гуваһлиқ паалийитиниң дуняниң диққитини уйғурлар мәсилисигә йәнә бир қетим җәлп қилишта түрткилик рол ойнайдиғанлиқини әскәртти.

Дуня уйғур қурултийиниң рәиси долқун әйса әпәнди «‹уйғур әдлийәси архип амбири' топлиған гуваһлиқ материяллириниң уйғурлар вә җаза лагерлири мәсилисини хәлқараға тонутушта зади қанчилик роли болди?» дегән соалимизға җаваб бәргәндә бу материялларниң б д т да явропа парламентида, америка дөләт мәҗлисидә муһим пакитлиқ ролини өтигәнликини тилға алди.

«Җәнубий германийә гезити» 24-март елан қилған «корона кризиси: хитайдин кәлгән нәп» намлиқ мақалисидә хитайниң вирус тарқатқучи дөләттин бирдинла пурсәтпәрәслик қилип башқиларни вирус кризисидин қутқузғучи ниҗаткарға айлинивалғанлиқини, хитайниң «хәтәрлик дөләт» икәнликини илгири сүрүп, «хитайниң хоңкоң вә тәйвәнгә қарита йүргүзүватқан сиясити тоқунуш пәйда қилипла қалмай, түрлүк тәнқидләргә бипәрва һалда уйғурлар үстидин йүргүзүватқан қаттиқ бесимлириму техичә давамлашмақта,» дейиш арқилиқ җаза лагерлириниң һелиһәм мәвҗутлуқини дуняниң сәмигә селип өткән иди.

Пикирләр (0)
Share
Толуқ бәт