Meshhur lagér süritidiki tutqunlardin biri shangxey méditsina uniwérsitétini püttürgen memtimin ikenliki ashkarilandi

Muxbirimiz shöhret hoshur
2019-04-24
Élxet
Pikir
Share
Print
Meshhur lagér süritidiki tutqunlardin biri shangxey méditsina uniwérsitétini püttürgen memtimin.
Meshhur lagér süritidiki tutqunlardin biri shangxey méditsina uniwérsitétini püttürgen memtimin.
Social Media

Lagérlar heqqidiki meshhur resim, yeni lop nahiyelik atalmish "Terbiyelesh merkizi" ning yighin meydanidin tartilghan sürettiki tutqunlar heqqide élip barghan éniqlashlirimiz dawamida sürettiki eng aldinqi qatarning otturida olturghan aq yüzlük, bestlik kelgen yashning 2011-yili shangxey méditsina uniwérsitéti sehiye esliheliri fakultétini püttürgen memtimin ikenliki ashkarilandi. Memtiminning mezkur uniwérsitétta bille oqughan sawaqdishi, nöwette türkiyede yashawatqan nurmemetning bayan qilishiche, u sawaqdishi memtiminni 2012-yili axirqi qétim xoten shehiride uchratqan. Bu chaghda memtimin uninggha özining sehiye esliheliri shirkiti quruwatqanliqini bayan qilghan iken.

Lagérlar heqqide eng köp tarqalghan süretlerdin biri lop nahiyelik "Terbiyelesh merkizi" ning yighin meydanidin tartilghan süret bolup, bügün'ge qeder bu sürettiki tutqunlarning qiyapiti, rohiy haliti we etrapidiki muhit körünüshi bilen diqqet tartip kelmekte. Birqanche kündin béri féysbokta tarqalghan mezkur sürettiki bir qanche kishining kimlik melumatliri ichide ularning kespiy we ma'arip arqa körünüshimu diqqet tartmaqta. Tünügünki éniqlashlirimiz dawamida xitay da'iriliri kespiy terbiye bériwatqanliqini ilgiri sürüwatqan bu kishilerdin birining lopta péchine-pirenik zawuti qurghan karxanichi éziz haji ikenliki ashkarilan'ghan idi. Bügünki éniqlashlirimizdin melum bolushiche, mezkur sürettiki eng aldinqi qatarida olturghan aq yüzlük yash 2011-yili eslidiki shangxey sana'et penliri uniwérsitéti bilen birleshtürülgen, kéyinche shangxey méditsina uniwérsitéti qilip özgertilgen uniwérsitétning sehiye eslihelirini bashqurush kespini püttürgen memtimin iken. Mezkur uniwérsitétqa uningdin ikki yil kéyin qobul qilin'ghan, nöwette türkiyede yashawatqan sawaqdishi nurmemetning bayan qilishiche, memtimin mezkur uniwérsitétqa 2007-yili qobul qilin'ghan iken.

Biz memtiminning familisi we oqush püttürgendin kéyiki ish orunliri heqqide melumat élish üchün lop nahiyesidiki alaqidar orunlardin melumat soriduq. Lop bazarliq saqchi xadimi özliride memtiminning arxipi yoq ikenlikini bayan qildi.

Melum bolushiche, memtiminning nöwette türkiyede yashawatqan sawaqdishi nurmemet shangxeydiki oqushini tamamlighandin kéyin misirgha kélip 5 yil oqughan. Shunga uning memtimin bilen yéqinqi mezgillerde uchrishish we yaki alaqilishish pursiti bolmighan. U bu sawaqdishi bilen axirqi qétim, yeni 2012-yili xotende bir qétim körüshken. U shu chaghda u özining shirket quruwatqanliqini éytqan.

Xitay da'iriliri atalmish "Kespiy terbiye merkezliri" ni aqlap bergen bayanatlirida bu merkezlerde öz puqralirigha dölet tili ögitiliwatqanliqi we bu öginishning ularning turmush we ish tépishi éhtiyajini qamdash üchün ikenlikini ilgiri sürgen idi. Loptiki terbiyelesh merkizige soliwélin'ghan memtimin shangxey méditsina uniwérsitétini püttürüshtin awwal xitay ölkiliride toluq ottura mektepni püttürgen iken.

Téléfonimizni qobul qilghan alaqidar xadimlar memtiminning qaysi lagérda ikenlikini éniqlash üchün nahiyelik j x idarisige téléfon qilishimiz kéreklikini tewsiye qildi.

Tutqun memtiminning türkiyediki sawaqdishi uning konkrét tutulush sewebi üstide melumati yoqluqini bildürgendin kéyin, uning musteqil pikir qilish aditi we musteqil ish qilish xaraktéri barliqini tilgha aldi.

Toluq bet