Мәшһур лагер сүритидики тутқунлардин бири шаңхәй медитсина университетини пүттүргән мәмтимин икәнлики ашкариланди

Мухбиримиз шөһрәт һошур
2019-04-24
Елхәт
Пикир
Share
Принт
Мәшһур лагер сүритидики тутқунлардин бири шаңхәй медитсина университетини пүттүргән мәмтимин.
Мәшһур лагер сүритидики тутқунлардин бири шаңхәй медитсина университетини пүттүргән мәмтимин.
Social Media

Лагерлар һәққидики мәшһур рәсим, йәни лоп наһийәлик аталмиш «тәрбийәләш мәркизи» ниң йиғин мәйданидин тартилған сүрәттики тутқунлар һәққидә елип барған ениқлашлиримиз давамида сүрәттики әң алдинқи қатарниң оттурида олтурған ақ йүзлүк, бәстлик кәлгән яшниң 2011-йили шаңхәй медитсина университети сәһийә әслиһәлири факултетини пүттүргән мәмтимин икәнлики ашкариланди. Мәмтиминниң мәзкур университетта биллә оқуған савақдиши, нөвәттә түркийәдә яшаватқан нурмәмәтниң баян қилишичә, у савақдиши мәмтиминни 2012-йили ахирқи қетим хотән шәһиридә учратқан. Бу чағда мәмтимин униңға өзиниң сәһийә әслиһәлири ширкити қуруватқанлиқини баян қилған икән.

Лагерлар һәққидә әң көп тарқалған сүрәтләрдин бири лоп наһийәлик «тәрбийәләш мәркизи» ниң йиғин мәйданидин тартилған сүрәт болуп, бүгүнгә қәдәр бу сүрәттики тутқунларниң қияпити, роһий һалити вә әтрапидики муһит көрүнүши билән диққәт тартип кәлмәктә. Бирқанчә күндин бери фейсбокта тарқалған мәзкур сүрәттики бир қанчә кишиниң кимлик мәлуматлири ичидә уларниң кәспий вә маарип арқа көрүнүшиму диққәт тартмақта. Түнүгүнки ениқлашлиримиз давамида хитай даирилири кәспий тәрбийә бериватқанлиқини илгири сүрүватқан бу кишиләрдин бириниң лопта печинә-пирәник завути қурған карханичи езиз һаҗи икәнлики ашкариланған иди. Бүгүнки ениқлашлиримиздин мәлум болушичә, мәзкур сүрәттики әң алдинқи қатарида олтурған ақ йүзлүк яш 2011-йили әслидики шаңхәй санаәт пәнлири университети билән бирләштүрүлгән, кейинчә шаңхәй медитсина университети қилип өзгәртилгән университетниң сәһийә әслиһәлирини башқуруш кәспини пүттүргән мәмтимин икән. Мәзкур университетқа униңдин икки йил кейин қобул қилинған, нөвәттә түркийәдә яшаватқан савақдиши нурмәмәтниң баян қилишичә, мәмтимин мәзкур университетқа 2007-йили қобул қилинған икән.

Биз мәмтиминниң фамилиси вә оқуш пүттүргәндин кейики иш орунлири һәққидә мәлумат елиш үчүн лоп наһийәсидики алақидар орунлардин мәлумат соридуқ. Лоп базарлиқ сақчи хадими өзлиридә мәмтиминниң архипи йоқ икәнликини баян қилди.

Мәлум болушичә, мәмтиминниң нөвәттә түркийәдә яшаватқан савақдиши нурмәмәт шаңхәйдики оқушини тамамлиғандин кейин мисирға келип 5 йил оқуған. Шуңа униң мәмтимин билән йеқинқи мәзгилләрдә учришиш вә яки алақилишиш пурсити болмиған. У бу савақдиши билән ахирқи қетим, йәни 2012-йили хотәндә бир қетим көрүшкән. У шу чағда у өзиниң ширкәт қуруватқанлиқини ейтқан.

Хитай даирилири аталмиш «кәспий тәрбийә мәркәзлири» ни ақлап бәргән баянатлирида бу мәркәзләрдә өз пуқралириға дөләт тили өгитиливатқанлиқи вә бу өгинишниң уларниң турмуш вә иш тепиши еһтияҗини қамдаш үчүн икәнликини илгири сүргән иди. Лоптики тәрбийәләш мәркизигә соливелинған мәмтимин шаңхәй медитсина университетини пүттүрүштин аввал хитай өлкилиридә толуқ оттура мәктәпни пүттүргән икән.

Телефонимизни қобул қилған алақидар хадимлар мәмтиминниң қайси лагерда икәнликини ениқлаш үчүн наһийәлик җ х идарисигә телефон қилишимиз керәкликини тәвсийә қилди.

Тутқун мәмтиминниң түркийәдики савақдиши униң конкрет тутулуш сәвәби үстидә мәлумати йоқлуқини билдүргәндин кейин, униң мустәқил пикир қилиш адити вә мустәқил иш қилиш характери барлиқини тилға алди.

Пикирләр (0)
Share
Толуқ бәт