Мәшһур лагер рәсимидики тутқунлардин бири карханичи езиз һаҗи шаңтаң икәнлики дәлилләнди

Мухбиримиз шөһрәт һошур
2019-04-23
Елхәт
Пикир
Share
Принт
Лоп наһийәсидики 4-йиғивелиш лагеридики тутқунлар сиясий өгиништә. 2017-Йили март, хотән.
Бири бир мәһәл ресторан ачқан вә шаңтаң дәп ләқими болған езиз һаҗи истрелка арқилиқ көрситилгән.
Лоп наһийәсидики 4-йиғивелиш лагеридики тутқунлар сиясий өгиништә. 2017-Йили март, хотән. Бири бир мәһәл ресторан ачқан вә шаңтаң дәп ләқими болған езиз һаҗи истрелка арқилиқ көрситилгән.
Social Media

Уйғур районидики лагерлар һәққидә тарқалған сүрәтләр ичидә әң диққәт тартқини лоп наһийәлик аталмиш тәрбийәләш мәркизидики тутқунларниң көк мәһбус кийими билән йиғин мәйданида олтурған көрүнүши болуп, бу дуняниң һәрқайси җайлирида лагерларға қарши өткүзүлгән намайиштин тартип америка дөләт мәҗлисидики йиғин заллириғичә кәң тарқалған вә қоллинилған иди. Йеқинда муһаҗирәттики уйғурлар әнә шу рәсимдики тонушлиридин бирқанчисиниң кимликини фәйсбокта ашкарилиди. Ашкарилинишичә, 5-қатарда олтурған кишиләрдин бири бир мәһәл ресторан ачқан вә шаңтаң дәп ләқими болған езиз һаҗи дегән кишидур. Мухбиримизниң ениқлашлири давамида бу учурниң тоғрилиқи дәлилләнди.

Лагерлар һәққидики мәшһур рәсим-лоп тәрбийәләш мәркизидики тутқунларниң көрүнүши хәлқара җамаәт арисида әң диққәт тарқатқан иди. Болупму бу рәсимдә йиғин мәйданидики тутқунларниң җиддий вә әнсиз чирайи, һәммисиниңла алғанлирини тизиға қоюп олтуруши, қораллиқ сақчиларниң назарити, лагер тамлириниң сим тикәнләр билән қоршилиши қатарлиқ көрүнүшләр лагериниң хитай дәватқандәк бир кәспий тәрбийә мәркизи әмәс, бир җаза лагери икәнликини ашкарилап бәргән иди. 19-Апрел күни дуня уйғур қурултийиниң муавин рәиси пәрһат муһәммәт әпәндиниң фәйсбок бетидә әнә шу рәсимдикиләрдин 4 кишиниң исми вә кәспи ашкариланған. Биз бу йип учиға асасән әнә шу 4 кишидин езиз һаҗиниң әһвали һәққидә лоп наһийәсидики алақидар орунларға телефон қилдуқ. Хадимлардин бири лопта илгири ресторан тиҗарити билән шуғулланған езиз һаҗи исимлик бир кишиниң барлиқини дәлиллиди. Униң дейишичә езиз һаҗим буниңдин 15 йил бурун ресторан тиҗаритини башлиған; йеқинқи йилларда бу тиҗаритини тохтатқан. Әмма у езиз һаҗиниң кейинки тиҗарити вә нөвәттә қайси тәрбийәләш мәркизидә икәнлики һәққидики соалимизға җаваб бәрмиди. Әсли юрти хотәнниң лоп наһийәсидин болған муһаҗир тохти рози әпәндиниң баян қилишичә, езиз һаҗи, лоп наһийә базиридики чоң мәсчитниң арқисида олтурушлуқ бир карханичи болуп, у илгири йоруңқаш дәряси бойида ресторан ачқан, йеқинқи йилларда печинә-пирәник дукини ечип кәң база тапқан. Андин у бир пирәник завути қуруш үчүн лоптики бейҗиң санаәт ечиветиш райони дәп аталған җайдин йәр сетивалған ; завут пүтүп ишқа чүшүшниң алдида лагерға әкетилгән. Лоптики алақидар хадимлар езиз һаҗиниң тутулуш сәвәби һәққидиму мәлумат бәрмиди. Тохти розиниң пәрәз қилишичә, езиз һаҗи илгири һәҗ ибадини ада қилған болуп, униң чәтәлдин зиярәт қилған болуши, униң тутулушиға сәвәб болған болуши мумкин.

Мәлум болушичә, езиз һаҗи лоп наһийәсидә әң балдур игилик тиклигән вә иқтисадий җәһәттә лопта алдинқи қатардики сода-карханичилардин бири болуп, у содида таза ронақ тепиватқан вә миңларчә кишини иш билән тәминләш алдида туруватқан бир мәзгилдә лагерға солувелинған.

Пикирләр (0)
Share
Толуқ бәт