Meshhur lagér süritidiki tutqunlardin biri shopur abdul'eziz ikenliki delillendi

Muxbirimiz shöhret hoshur
2019-04-26
Élxet
Pikir
Share
Print
Meshhur lagér süritidiki tutqunlardin birining shopur abdul'eziz (sériq chember ichidiki kishi) ikenliki delillendi.
Meshhur lagér süritidiki tutqunlardin birining shopur abdul'eziz (sériq chember ichidiki kishi) ikenliki delillendi.
Social Media

Meshhur lagér süriti, yeni lop nahiyelik "Terbiyilesh merkizi" ning yighin meydanidin tartilghan sürettiki 5‏-rette olturghan tutqunlardin birining lop nahiyelik emgek sughurtisi idarisining shopuri abdul'eziz ikenliki ashkarilandi. Muxbirimizning téléfonini qobul qilghan mezkur idaridiki alaqidar bir xadim shopur abdul'ezizning lagérgha ekétilgendin kéyin xizmettin heydelgenlikini delillidi.

Hörmetlik radi'o anglighuchilar, meshhur lagér süritide, yeni lop nahiyelik atalmish "Terbiyilesh merkizi" ning yighin meydanidin tartilghan foto sürettiki 5 ‏-qatarda olturghan tutqunlardin birining shopur abdul'eziz ikenliki chet'eldiki lopluq bir muhajir teripidin tonuwélindi. Tonuwalghuchining radi'omizgha guwahliq bérishiche, abdul'eziz esli lop nahiyelik radiyo-téléwiziye idarisining shopuri bolup, u lagérgha ekitilishtin birqanche yil burun nahiyelik emgek sughurtisi idarisigha yötkilip kelgen iken. Lop nahiyelik xelq hökümitidiki bir qisim alaqidar xadimlar tutqundiki bu shopur heqqide melumati yoqluqini éytti. Lop nahiyelik radiyo-téliwiziye idarisining xadimimu shopur abdul'eziz heqqide melumat bérelmidi.

Abdul'ezizni sürettin tonuwalghan lopluq muhajirning öz alaqe torliri arqiliq igilgenlirige asasen bayan qilishiche, 20 yildin artuq xizmet tarixigha ige bolghan abdul'eziz lagérgha ekitilgendin kéyin nahiyelik emgek idarisi uni xizmettin heydigen. Lop nahiyelik edliye idarisining xadimi ziyaritimizni qobul qilip, shopur abdul'e'izizning xizmettin heydelgenliki uchurini inkar qildi. Emma emgek sughurta idarisining alaqidar xadimi abdul'ezizning xizmettin heydelgenlik uchurini delillidi. Uning ashkarilishiche, yéqinqi mezgillerde bu idaridin xizmettin heydelgenler yalghuz abdul'ezizla emes iken. Biz uningdin xizmettin heydelgenler ichide abdu'ezizdin bashqilarning kimler ikenliki we ularningmu lagérgha ekitilgen yaki ekitilmigenlikini sorighinimizda, u bu heqte éniq melumat bermidi.

Lopluq muhajirlardin birining anglighanliri we sun'iy hemra resimliridin közetkenlirige asasen bayan qilishiche, lop bazar ichide az dégende ikki orunda yighiwélish lagéri bar bolup, bulardin biri "Béijing sana'et rayoni" dep atalghan tereqqiyat rayonidiki sémont zawutining ong teripige, yene birsi shu rayondiki 1 ‏-ottura mektepning udulighan jaylashqan iken. Bu yil 50 yashlar öpchüriside bolghan shopur abdul'eziz ene shu 1 ‏-ottura mektep udulidiki yighiwélish lagérida 2 yildin artuq waqttin buyan solinip yatmaqta iken.

Nöwette Uyghur rayonida tekshürüshte boluwatqan amérikaliq bir muxbirning lagérlar heqqide qeshqerdin melumat bérishiche, da'iriler tekshürigüchilerge peqet 20 yash bilen 40 yash arisidiki atalmish "Oqughuchilar" nila körsetken. Yeni lagérda 14 yashliq ösmürdin tartip 80 yatin ashqan boway-momaylarningmu barliqidek ré'alliqni yoshurghan. Biz birqanche kündin béri xewirini bériwatqan meshhur lagér süritidin tonuwélin'ghan tutqunlardin 3 nepirining yéshi 45 bilen 60 yash arisidadur.
Toluq bet