Йәкәндики есилип өлүвелиш вәқәсиниң йәниму инчикә тәпсилатлири ашкариланди

Мухбиримиз шөһрәт һошур
2018-02-01
Елхәт
Пикир
Share
Принт
Хотәндики мәлум йепиқ тәрбийәләш орни.
Хотәндики мәлум йепиқ тәрбийәләш орни.
Social Media

Мухбиримизниң сақчи хадимлири билән йәниму илгириләп елип барған сөһбәтлири давамида йәкәндә 28‏-январ күни йүз бәргән есилип өлүвелиш вәқәсиниң йәнә бир қисим тәпсилатлири ашкариланди. Мәлум болушичә, йәкәнниң бағ һойла аһалиләр комитетида 25‏-январ күни ечилған сиясий өгиниш йиғиниға мәзкур тәвәликтики 16 яш билән 45 яш арисидики 200 чә киши қатнашқан. Йиғинда булардин 17 нәпири дөләт шеирини ядлиялмиғанлиқи үчүн тәнқидкә учриған вә уларға 3 күнлүк мөһләт берилгән. 27‏-январ күни бу 17 кишидин 6 киши техичә ядлиялмиған. Даириләр бу 6 кишини шу күни җазалап тазилиқ ишиға салған вә уларға йәнә 3 күнлүк мөһләт берип, 29-январ күнигичә ядлиялмиса, 6 айдин 5 йилғичә қамаққа кесилидиғанлиқини уқтурған. Хитай дөләт шеирини ядлап болушқа қурби йәтмигән турсун абләт 28‏-январ әтигәндә есилип өлүвалған.

Мәлум болушичә, вәқә йүз бәргәндин кейин йеза вә кәнт дәриҗилик кадир вә сақчилардин тәшкилләнгән бир гуруппа мәзкур вәқә үстидә тәкшүрүш елип барған. Тәкшүрүшкә қатнашқан сақчи хадими вәқәгә бағлинишлиқ хадим вә гуваһчилар билән өткүзгән сөһбәт хатирисидин мундақ мәлумат бериду. «Йәкән наһийилик коча башқармиси аһалиләрниң комитетиниң башлиқи мәмәттурсун вә бағ һойла аһалиләр комитетиниң мудири турди турсун қатарлиқ кадирлар вә курсиға қатнашқан аһалиләр билән сөһбәт елип бардим.» 

Униң баян қилишичә, гуваһлиқ бәргән аһалиләрниң һәммиси турсун абләтниң тил-һақарәткә чидимай өлүвалғанлиқини илгири сүргән вә аһалиләр комитетиниң мудири мәмәттурсун мәхмутниң курсқа қатнашқан пүтүн аһалиләрни дөләт шеирини ядлиялмиғанлиқи үчүн тиллиғанлиқини паш қилған. Сөһбәт хатирисидә аһалиләрдин бириниң төвәндики сөзлири орун алған: «‏25-чесла икки йүзчә киши йиғинға қатнаштуқ, 17 киши дөләт шеирини ядлиялмидуқ, бизни мудир ‹дөт-ешәкләр' дәп тиллиди. 27‏-январ күни 17 кишидин йәнә 6 киши дөләт шеирини ядлиялмиди, улар тазилиққа селинди һәм уларға 29-январғичә ядлашмисаң, бирләшмә җәң суписи (йитихуа) ға киргүзүветимиз, дөләт шеири қануни бойичә 6 айдин 5 йилғичә кесилисиләр дәп тәһдит салди.»

Мәлум болушичә, бағ һойла аһалиләр комитетиниң мудири, мәсулийәтни районға мәсул мудир мәмәттурсун мәхмутқа артқан. Уму мәмәттурсун мәхмутниң аһалиләрни бир қетим коллектип һалда тиллиғанлиқиға гуваһлиқ бәргән. 

Игилинишичә, есилип өлүвалған турсун абләт йәкән базар ичидики бағ һойла аһалиләр комитетиға тәвә болсиму, әмма униң нопуси әслидә йәкән базиридин 3 километир узақлиқтики томөстәң йезисиниң ханериқ йезисида икән. Униң ханериқтики өйидә беқиватқан бирқанчә тохуси бар болуп, у өлүвалидиған күни өйидин әнә шу тохулириға дан чечип бериш баһаниси билән айрилған. У бу кона өйдики бараңға арқан селип, есилип өлүвалған икән. 

Сақчи хадими, турсун абләтниң бурун һечқандақ җинайәт өткүзүп бақмиған киши икәнлики вә маарип тәрбийиси көрүп бақмиғанлиқи, униң җазалиништин қорқуп есилип өлүвалғанлиқ еһтималлиқини оттуриға қойди.

Пикирләр (0)
Share
Толуқ бәт