Muhajirettiki Uyghur milliy herikitining 2019-yili yenimu yuqiri dolqun'gha kötürülidighanliqi ilgiri sürülmekte

Ixtiyariy muxbirimiz ekrem
2019-01-01
Élxet
Pikir
Share
Print
D u q re'isi dolqun eysa yéngi yilliq nutuq bermekte. 2018-Yili, 31-dékabir.
D u q re'isi dolqun eysa yéngi yilliq nutuq bermekte. 2018-Yili, 31-dékabir.
Social Media

Muhajirettiki Uyghur siyasiy aktiplirining 2019-yilida yenimu zor gheyret bilen xitayning Uyghur diyaridiki jaza lagérlirigha qarshi bir yürüsh pa'aliyetlerge teyyarliq qiliwatqanliqi ilgiri sürülmekte.

D u q ning re'isi dolqun eysa ependi yéngi yilliq téléwiziye nutqida 2018-yili qolgha keltürülgen netijilerni mu'eyyenleshtürüsh bilen birge 2019-yilining Uyghurlar üchün yenimu éghir külpetlerge tolghan bir yil bolidighanliqini tilgha alghan idi. U sözining axirida muhajirettiki Uyghurlarni pa'al heriketke kélip, 2019-yilining dunya miqyasida "Uyghur yili" bolushini qolgha keltürüsh isteklirini bayan qilip ötti.

Derweqe, 2018-yili muhajirettiki Uyghurlar xitayning Uyghur diyarida tesis qilghan jaza lagérlirigha qarshi namayish qilish, imza toplash pa'aliyetlirini qanat yaydurush, guwahliq bérish we uzun musapilerge yürüsh qilish qatarliq shekillerde öz naraziliqlirini ipade qilip, Uyghurlar mesilisining xelq'ara metbu'atlarning qiziq nuqtisigha aylinishigha tesir körsetken idi. Bu xildiki pa'aliyetlerning 2019-yili yenimu zor kölemde qanat yaydurulidighanliqi ilgiri sürülmekte.

Gollandiyede yérim yildin buyan yalghuz kishilik namayish qilish bilen tonulghan Uyghur ziyaliysi abdurehim ghéni ependi xitayning jaza lagérlirigha qarshi küreshlirini 2019-yilimu izchil dawamlashturidighanliqini bildürüwatqan Uyghurlarning biridur. U bu heqte ipade bildürüshtin ilgiri 2018-yilidiki pa'aliyetlirining netijiliri üstide qisqiche toxtilip ötti.

Gollandiyediki "Ürümchi réstorani" ning xojayini, d u q medeniyet bölümining mes'uli zeynidin tursun ependi bu heqte toxtalghanda abdurehim ghénining pa'aliyetliridin barliq Uyghurlarning ülge élishi lazimliqini eskertti. U "Uyghurlar mesilisi minglighan abduréhimlargha mohtaj," dédi.
Norwégiyede yashawatqan d u q ning teptishi perhat yaqup ependimu abdurehim ghénining yalghuz kishilik kürishige yuqiri baha berdi hemde 2019-yili muhajirettiki Uyghur milliy dawasining yenimu yuqiri dolqun kötürülidighanliqini tekitlidi. 
Abdurehim ghéni 2019-yilliq pa'aliyet pilanliri üstide toxtilip, yalghuz kishilik namayishini izchil dawamlashturush iradisini namayan qilish bilen birge yawropa parlaménti aldidimu yalghuz kishilik namayish uyushturush xiyalida boluwatqanliqini bildürdi.

D u q rehberlirining bildürüshiche, muhajirettiki Uyghurlarning jaza lagérlirigha qarshi keskin küreshliri netijiside Uyghurlar mesilisi 2018-yili b d t da tekrar-tekrar otturigha qoyulupla qalmastin, amérika dölet mejlisi, gérmaniye parlaménti we yawropa parlaméntida küntertipke kelgen bir mesilige aylan'ghan. Közetküchilerning bildürüshiche, 2019-yili Uyghurlar mesilisi xelq'arada jiddiy bir mesilige aylinidiken.

Toluq bet