Муһаҗирәттики уйғур миллий һәрикитиниң 2019-йили йәниму юқири долқунға көтүрүлидиғанлиқи илгири сүрүлмәктә

Ихтиярий мухбиримиз әкрәм
2019-01-01
Елхәт
Пикир
Share
Принт
Д у қ рәиси долқун әйса йеңи йиллиқ нутуқ бәрмәктә. 2018-Йили, 31-декабир.
Д у қ рәиси долқун әйса йеңи йиллиқ нутуқ бәрмәктә. 2018-Йили, 31-декабир.
Social Media

Муһаҗирәттики уйғур сиясий актиплириниң 2019-йилида йәниму зор ғәйрәт билән хитайниң уйғур дияридики җаза лагерлириға қарши бир йүрүш паалийәтләргә тәйярлиқ қиливатқанлиқи илгири сүрүлмәктә.

Д у қ ниң рәиси долқун әйса әпәнди йеңи йиллиқ телевизийә нутқида 2018-йили қолға кәлтүрүлгән нәтиҗиләрни муәййәнләштүрүш билән биргә 2019-йилиниң уйғурлар үчүн йәниму еғир күлпәтләргә толған бир йил болидиғанлиқини тилға алған иди. У сөзиниң ахирида муһаҗирәттики уйғурларни паал һәрикәткә келип, 2019-йилиниң дуня миқясида «уйғур йили» болушини қолға кәлтүрүш истәклирини баян қилип өтти.

Дәрвәқә, 2018-йили муһаҗирәттики уйғурлар хитайниң уйғур диярида тәсис қилған җаза лагерлириға қарши намайиш қилиш, имза топлаш паалийәтлирини қанат яйдуруш, гуваһлиқ бериш вә узун мусапиләргә йүрүш қилиш қатарлиқ шәкилләрдә өз наразилиқлирини ипадә қилип, уйғурлар мәсилисиниң хәлқара мәтбуатларниң қизиқ нуқтисиға айлинишиға тәсир көрсәткән иди. Бу хилдики паалийәтләрниң 2019-йили йәниму зор көләмдә қанат яйдурулидиғанлиқи илгири сүрүлмәктә.

Голландийәдә йерим йилдин буян ялғуз кишилик намайиш қилиш билән тонулған уйғур зиялийси абдурәһим ғени әпәнди хитайниң җаза лагерлириға қарши күрәшлирини 2019-йилиму изчил давамлаштуридиғанлиқини билдүрүватқан уйғурларниң биридур. У бу һәқтә ипадә билдүрүштин илгири 2018-йилидики паалийәтлириниң нәтиҗилири үстидә қисқичә тохтилип өтти.

Голландийәдики «үрүмчи ресторани» ниң хоҗайини, д у қ мәдәнийәт бөлүминиң мәсули зәйнидин турсун әпәнди бу һәқтә тохталғанда абдурәһим ғениниң паалийәтлиридин барлиқ уйғурларниң үлгә елиши лазимлиқини әскәртти. У «уйғурлар мәсилиси миңлиған абдуреһимларға моһтаҗ,» деди.
Норвегийәдә яшаватқан д у қ ниң тәптиши пәрһат яқуп әпәндиму абдурәһим ғениниң ялғуз кишилик күришигә юқири баһа бәрди һәмдә 2019-йили муһаҗирәттики уйғур миллий давасиниң йәниму юқири долқун көтүрүлидиғанлиқини тәкитлиди. 
Абдурәһим ғени 2019-йиллиқ паалийәт пиланлири үстидә тохтилип, ялғуз кишилик намайишини изчил давамлаштуруш ирадисини намаян қилиш билән биргә явропа парламенти алдидиму ялғуз кишилик намайиш уюштуруш хиялида болуватқанлиқини билдүрди.

Д у қ рәһбәрлириниң билдүрүшичә, муһаҗирәттики уйғурларниң җаза лагерлириға қарши кәскин күрәшлири нәтиҗисидә уйғурлар мәсилиси 2018-йили б д т да тәкрар-тәкрар оттуриға қоюлупла қалмастин, америка дөләт мәҗлиси, германийә парламенти вә явропа парламентида күнтәртипкә кәлгән бир мәсилигә айланған. Көзәткүчиләрниң билдүрүшичә, 2019-йили уйғурлар мәсилиси хәлқарада җиддий бир мәсилигә айлинидикән.

Пикирләр (0)
Share
Толуқ бәт