Atushtiki 55 yashliq tijaretchi weli memetning lagérda jan üzgenliki delillendi

Uxbirimiz shöhret hoshur
2019-01-18
Élxet
Pikir
Share
Print
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
AP

Ikki heptidin béri bir qisim ijtima'iy taratqularda, atushning azghan kentidiki tijaretchi weli memetning lagérda jan üzgenliki heqqide uchur tarqalghan idi. Muxbirimizning birqanche kündin béri atushtiki alaqidar saqchi we kent kadirlirigha qarita élip barghan téléfon ziyaretliri dawamida, birqanche balining atisi bolghan 55 yashlar chamisidiki tijaretchi weli memetning ötken ay yeni dékabirning axiri lagérda jan üzgenliki delillendi. Weli memetning 10 nechche yilning aldida balilirini bir a'iliwi diniy mektepke bergenliki üchün tutqun qilin'ghanliqi ilgiri sürüldi.

Hörmetlik radi'o anglighuchilar, ijtima'iy taratqulardiki bu heqtiki uchurda, ötken ayning axiri atushtiki lagérda jan üzgen weli memetning atushta tonulghan kent bashliqliridin "Memet dadüyjang" dégen kishining oghli ikenliki tilgha élin'ghan. Atushqa qarita élip barghan téléfon ziyaretlirimiz dawamida, atush bazarliq saqchi xadimliri weli memetning ehwalidin xewersizlikini éytti. Ijtima'iy taratqulardiki uchurda weli memetning ölümi seweblik atush azghanda köp sanda saqchilarning wezipilendürülgenliki we musibetlik a'ilini nazaret qilghanliqi ilgiri sürülgen. Atush sheherlik saqchi idarisining bir xadimi, bu ehwal heqqide asasi qatlamdiki saqchixanilardin, bolupmu, ölgüchi tewe bolghan yéziliq saqchixanidin melumat sorishimizni tewsiye qildi. 

Saqchixana xadimliridin biri lagérda jan üzgen weli memetning atushning süntagh yéza azghan kentidin ikenlikini melum qildi. Azghan kentining amanliq mudiri weli memetning lagérda ölgenlikini delillesh bilen birlikte, uning dadisi memet dadüyjangning xéli yillar burun wapat bolghanliqini bayan qildi. Taratqulardiki uchurda weli memetning tutulush sewebi heqqide melumat bérilmigen. Kent kadirliridin birining bayanliridin melum bolushiche, weli memet 10 nechche yilning aldida perzentlirining qur'an sawatini chiqirish üchün mehellidiki bir a'iliwi diniy mektepke bergen؛ bu qilmish ötken yilgha kelgende diniy esebiylikning alamiti dep qarilip, uning tutulushigha seweb bolghan. Ijtima'iy taratqulardiki uchurda weli memetning ölüm sewebi heqqide her xil gumanlar otturigha qoyulghan. Atushtiki kent kadirliridin biri özining ötken yili xizmet munasiwiti bilen lagérgha barghanliqi we lagérda weli memet bilen sözleshkenlikini bayan qildi. Uning bayan qilishiche, eslide salametliki alahide yaxshi bolghan weli memet lagérdiki nachar muhit we nachar ozuq sewebidin, beden quwwet jehette bekla ajizlighan. Atush süntaghdiki ahalilerdin biri süntaghda lagérda ölgenlerning yalghuz weli memet emesliki, özining az dégen 5-6 kishining lagérda ölgenlikidin xewer tapqanliqini éytti. 

Hörmetlik radi'o anglighuchilar, nöwette muhajirette yashawatqan weli memetning ehwalidin xewerdar kishiler, 55 yashlar chamisidiki weli memetning jama'etchilik ishlirida aktip bir kishi ikenliki, heqqaniyetchilik tuyghusining küchlük ikenliki؛ jem'iyette közi körgen heqsizliqlargha qarita her waqit pozitsiye bildürüp we hetta qol tiqip kelgenliki, shunga uning bu qétim tutulushi we lagérda jan üzüshige, uning ene shu xarektérining seweb bolghanliq éhtimalliqini ilgiri sürdi.

Toluq bet