Атуштики 55 яшлиқ тиҗарәтчи вәли мәмәтниң лагерда җан үзгәнлики дәлилләнди

Ухбиримиз шөһрәт һошур
2019-01-18
Елхәт
Пикир
Share
Принт
Тез сүрәттә көпийиватқан «йепиқ тәрбийәләш лагери» йәни хитайниң җаза лагеридин бириниң көрүнүши. 2018-Йили 3-декабир, атуш.
Тез сүрәттә көпийиватқан «йепиқ тәрбийәләш лагери» йәни хитайниң җаза лагеридин бириниң көрүнүши. 2018-Йили 3-декабир, атуш.
AP

Икки һәптидин бери бир қисим иҗтимаий таратқуларда, атушниң азған кәнтидики тиҗарәтчи вәли мәмәтниң лагерда җан үзгәнлики һәққидә учур тарқалған иди. Мухбиримизниң бирқанчә күндин бери атуштики алақидар сақчи вә кәнт кадирлириға қарита елип барған телефон зиярәтлири давамида, бирқанчә балиниң атиси болған 55 яшлар чамисидики тиҗарәтчи вәли мәмәтниң өткән ай йәни декабирниң ахири лагерда җан үзгәнлики дәлилләнди. Вәли мәмәтниң 10 нәччә йилниң алдида балилирини бир аиливи диний мәктәпкә бәргәнлики үчүн тутқун қилинғанлиқи илгири сүрүлди.

Һөрмәтлик радио аңлиғучилар, иҗтимаий таратқулардики бу һәқтики учурда, өткән айниң ахири атуштики лагерда җан үзгән вәли мәмәтниң атушта тонулған кәнт башлиқлиридин «мәмәт дадүйҗаң» дегән кишиниң оғли икәнлики тилға елинған. Атушқа қарита елип барған телефон зиярәтлиримиз давамида, атуш базарлиқ сақчи хадимлири вәли мәмәтниң әһвалидин хәвәрсизликини ейтти. Иҗтимаий таратқулардики учурда вәли мәмәтниң өлүми сәвәблик атуш азғанда көп санда сақчиларниң вәзипиләндүрүлгәнлики вә мусибәтлик аилини назарәт қилғанлиқи илгири сүрүлгән. Атуш шәһәрлик сақчи идарисиниң бир хадими, бу әһвал һәққидә асаси қатламдики сақчиханилардин, болупму, өлгүчи тәвә болған йезилиқ сақчиханидин мәлумат соришимизни тәвсийә қилди. 

Сақчихана хадимлиридин бири лагерда җан үзгән вәли мәмәтниң атушниң сүнтағ йеза азған кәнтидин икәнликини мәлум қилди. Азған кәнтиниң аманлиқ мудири вәли мәмәтниң лагерда өлгәнликини дәлилләш билән бирликтә, униң дадиси мәмәт дадүйҗаңниң хели йиллар бурун вапат болғанлиқини баян қилди. Таратқулардики учурда вәли мәмәтниң тутулуш сәвәби һәққидә мәлумат берилмигән. Кәнт кадирлиридин бириниң баянлиридин мәлум болушичә, вәли мәмәт 10 нәччә йилниң алдида пәрзәнтлириниң қуран саватини чиқириш үчүн мәһәллидики бир аиливи диний мәктәпкә бәргән; бу қилмиш өткән йилға кәлгәндә диний әсәбийликниң аламити дәп қарилип, униң тутулушиға сәвәб болған. Иҗтимаий таратқулардики учурда вәли мәмәтниң өлүм сәвәби һәққидә һәр хил гуманлар оттуриға қоюлған. Атуштики кәнт кадирлиридин бири өзиниң өткән йили хизмәт мунасивити билән лагерға барғанлиқи вә лагерда вәли мәмәт билән сөзләшкәнликини баян қилди. Униң баян қилишичә, әслидә саламәтлики алаһидә яхши болған вәли мәмәт лагердики начар муһит вә начар озуқ сәвәбидин, бәдән қуввәт җәһәттә бәкла аҗизлиған. Атуш сүнтағдики аһалиләрдин бири сүнтағда лагерда өлгәнләрниң ялғуз вәли мәмәт әмәслики, өзиниң аз дегән 5-6 кишиниң лагерда өлгәнликидин хәвәр тапқанлиқини ейтти. 

Һөрмәтлик радио аңлиғучилар, нөвәттә муһаҗирәттә яшаватқан вәли мәмәтниң әһвалидин хәвәрдар кишиләр, 55 яшлар чамисидики вәли мәмәтниң җамаәтчилик ишлирида актип бир киши икәнлики, һәққанийәтчилик туйғусиниң күчлүк икәнлики; җәмийәттә көзи көргән һәқсизлиқларға қарита һәр вақит позитсийә билдүрүп вә һәтта қол тиқип кәлгәнлики, шуңа униң бу қетим тутулуши вә лагерда җан үзүшигә, униң әнә шу харәктериниң сәвәб болғанлиқ еһтималлиқини илгири сүрди.

Пикирләр (0)
Share
Толуқ бәт