Рабийә қадир ханим японийәдики диний тәшкилатларни уйғур мусапирлар мәсилисигә көңүл бөлүшкә чақирди

Ихтиярий мухбиримиз һаҗи қутлуқ қадири
2016-06-02
Елхәт
Пикир
Share
Принт
Рабийә қадир ханим японийәдики диний тәшкилатларни тайландтики уйғур мусапирлар мәсилисигә көңүл бөлүшкә чақирди. 2016-Йили 1-июн.
Рабийә қадир ханим японийәдики диний тәшкилатларни тайландтики уйғур мусапирлар мәсилисигә көңүл бөлүшкә чақирди. 2016-Йили 1-июн.
RFA/Qutluq

30-Майдин 1-июнғичә японийәниң нагано, канагава өлкилиридики қәдимий будда диний ибадәтханилирида зиярәттә болған рабийә қадир ханим японийәдики будда диний тәшкилатлирини тайландтики уйғур мусапирлар мәсилисигә көңүл бөлүшкә чақирған.

Японийә уйғур бирлики тәшкилатидин игилишимизчә, японийәдә зиярәттә болуватқан рабийә қадир ханим башчилиқидики дуня уйғур қурултийи вәкиллири нагано, канагава өлкилиридики қәдимий будда диний ибадәтханилирида зиярәттә болғанда дуня уйғур қурултийи рәиси рабийә қадир ханим японийәдики будда диний тәшкилатлирини тайландтики уйғур мусапирлар мәсилисигә көңүл бөлүшкә чақирған.

Дуня уйғур қурултийи рәиси рабийә қадирниң ханимниң билдүрүшичә, японийәдики будда диний тәшкилатлириниң тәшкиллиши билән охшимиған динларниң вәкиллири нагано өлкисидики зенкоҗи будда диний ибадәтханисиға җәм болуп, дуня уйғур қурултийи вәкиллирини күтүвалған. Зенкоҗи будда диний ибадәтханисида сөзгә тәклип қилинған рабийә қадир ханим алди билән 26-май үрүмчи уланбайдики өмүрләр түрмисидә йүз бәргән вәқә һәққидә тохталған.

Рабийә қадир ханим доклатида йәнә, нөвәттә тайландта тутуп турулуватқан уйғур мусапирларниң әһвалини тонуштурғандин кейин, диний әрбаблар уйғур мусапирлар мәсилисигә өзлириниң түрлүк йоллар арқилиқ ярдәмдә болидиғанлиқини билдүргән.

Рабийә қадир ханимниң ейтишичә, японийәдики диний тәшкилатлар өзлүкидин тәшкиллинип тайландта тутуп турулуватқан 56 нәпәр уйғур мусапирни қутқузуш үчүн пат йеқинда имза топлаш паалийити елип баридиғанлиқини билдүргән.

Японийә уйғур бирлики тәшкилатиниң рәиси доктор турмуһәммәт һашимниң билдүрүшичә, зенкоҗи будда диний ибадәтханиси хитайдики кишилик һоқуқ дәпсәндичиликигә қарши туруш йүзисидин 2008-йили хитайда олимпик тәнһәрикәт йиғининиң өткүзүлүшигә қарши турған.

Рабийә қадир ханимниң илгири сүрүшичә, 1-июн дуня уйғур қурултийи вәкиллири камакура шәһириниң шәһәр башлиқиниң тәшкиллиши билән бир қисим диний затлар вә йәрлик парламент әзалири биләнму учришип, нөвәттики уйғур вәзийити вә уйғур мусапирлар мәсилиси һәққидә сөһбәтләшкән. Сөһбәттин кейин көплигән кишиләр уйғур мусапирлириға өзлириниң йеқиндин ярдәмдә болидиғанлиқини билдүргән.

Игилишимизчә, тайландта тутуп турулуватқан уйғур мусапирлар йеқинда д у қ ниң тор бетидә баянат елан қилип, өзлириниң 31-майдин башлап тайланд һөкүмитигә наразилиқ билдүрүп ачлиқ елан қилидиғанлиқини вә бу һәрикитини баңкок һөкүмити уларни қоюп бәргүчә давам қилидиғанлиқини билдүргән.

Юқириқи аваз улинишидин тәпсилатини аңлаң.

Пикирләр (0)
Share
Толуқ бәт