3 яшлиқ абдулланиң тайланд дохтурханисида өткүзгән әң ахириқи 45 күни

Мухбиримиз қутлан
2014-12-30
Елхәт
Пикир
Share
Принт
Үч яшлиқ абдулланиң тайландики мәлум дохтурханида давалиниватқан чағда тартилған сүрити (2014-йил декабир, тайланд)
Үч яшлиқ абдулланиң тайландики мәлум дохтурханида давалиниватқан чағда тартилған сүрити (2014-йил декабир, тайланд)
Photo: RFA


3 яшлиқ абдулланиң туберкулюз кесәллики билән тайландтики мәлум бир дохтурханида қаза қилиши муһаҗирәттики уйғур җамаәтчиликидә күчлүк инкас пәйда қилди.

Бу хәвәр әң дәсләп «баңкок вақит гезити» дә елан қилинғандин кейин, тайландтики әһвалдин хәвәрдар кишиләр радийомиз зияритини қобул қилип, өзлири көргән вә билгән әһваллар һәққидә учур бәрди.

Алдинқи һәптә түркийәдики бир кино чолпини билән биллә тайландқа берип у йәрдики тутуп туруш орунлириға қамалған мусапирлар һәққидә һөҗҗәтлик филим ишлигән «әрк телевизийәси» ниң риясәтчиси абдураһман өзтүрк бүгүн мәхсус зияритимизни қобул қилди.

У зияритимиз җәрянида тайландтики бирқанчилиған тутуп туруш орунлирини зиярәт қилғанлиқи, у йәргә қамалған вә һазирғичә салаһийити ениқ болмиған мусапирларниң 10 айдин буянқи еғир қисмәтлири һәққидә мәлумат бәрди.

У йеқинда қаза қилған 3 яшлиқ сәбий бала абдулла вә униң ечинишлиқ өлүми һәққидә мунуларни баян қилди:

«Мән тайландқа берипла 3 яшлиқ бир балиниң дохтурханида қаза қилғанлиқини аңлидим. Буниң билән сүрүштүрүп йүрүп ахири дохтурханиниң мейит сақлаш өйидики тоңлатқуға селип қойған бу балиниң мейитини таптим. Абдулла дегән исим билән мәлум болған бу бала буниңдин 10 айлар илгири тайландқа йошурунчә өткән мусапирлар билән биллә кәлгән икән. Әпсуски, тайланд сақчилири мусапирларни малайшия чеграсиға йеқин бир тағдики орманлиқта қоршивалған вақитта, бу балиниң дадиси топтин айрилип қалған. Кейин у мәлум йоллар арқилиқ түркийәгә қечип беривалған. Абдулла мусапирлар билән биллә тутуп туруш орниға қамалғандин кейин узун өтмәйла туберкулюз кесилигә гириптар болған. Униң қизитмиси өрләп пәқәт өрә туруш имканийити болмиған әһвалда тайланд сақчилири тәрипидин дохтурханиға елип берилған. Кейинчә, бу балиниң анисиниңму из - дерики болмиған.»

У йәнә төвәндики әһвалларни баян қилди: «сақчилар кейинчә бу балиниң уруқ - туғқанлириниң бар йоқлуқини сориғанда бирси «мән туғқини болимән» дәп өзини мәлум қилған. Сақчилар у кишигә дохтурханида туруп абдулланиң әһвалидин хәвәр елишқа елип чиққан. Әпсуски, 4 - 5 күндин кейин бу кишиму дохтурханидин қечип чиқип, из - дерәксиз ғайип болған. Абдулланиң әһвали дохтурханида барғансери еғирлашқан. Ата - аниси вә башқа һечқандақ туғқини болмиған әһвалда у кесәл каривитида топ - тоғра 45 күн ялғуз йетип ахирида җан бәргән. Униң һаятиниң ахириқи күнлиридә дохтурханидики бир мусулман аял дохтур униң һалидин хәвәр алған, шу шәһәрдики мусулманлар җәмийитидин бәзи кишиләр тамақ әкилип нимҗан һаләттә ятқан абдуллани баққан. Әмдила 3 яшқа киргән бу бала ят әлдә һечқандақ уруқ - туғқини йенида болмиған әһвалда тәнһа һалда бу рәһимсиз дуня билән хошлашқан.»

«Мән дохтурханиниң мийит сақлаш өйигә кирип бу балиниң тоңлатқудики мийитини көрдүм. Балиниң йүз - көзлири вә иңәклириниң астиға қан ойүп қизирип кетипту. Еғизиниң бир бурҗикидә сус қан изи туриду. Мени бу йәргә башлап киргән һелиқи мусулман аял дохтур абдулланиң һаят вақтидики рәсимлирини маңа көрсәтти. У абдулла һаят вақтида қол телефони арқилиқ кесәл каривитида айларчә ялғуз ятқан бу балиниң рәсимини тартивалған икән. Мән униң һаят вақтидики рәсими билән қаза қилғандин кейинки мийитини көрүп азабтин чидиялмай қалдим. Бу мәнзирини көргән һәрқандақ адәм көз йеши қилмай туралмайду. У шунчилик чирайлиқ, шунчилик сәбий вә шунчилик омақ бир бала икән, әпсуски, рәһимсиз тәғдирниң соғуқ шамаллири техи бу дуняниң һеч бир ховлиқини көрмигән бу сәбий җанни ят әлдә хазан қипту…»

Абдураһман өзтүрк ахирида йәнә, бу балиниң йеқиндин буян тайландтики лагерларда вә тутуп туруш орунлирида қамалған мусапирлар ичидә һаятидин айрилған 3 - киши икәнликини әскәртип өтти.

Пикирләр (0)
Share
Толуқ бәт