Һәптилик хәвәрләр (17-авғусттин 23-авғустқичә)

Мухбиримиз қутлан
2019-08-23
Елхәт
Пикир
Share
Принт
hepte-0823-tor-maqate.jpg
hepte-0823-tor-maqate.jpg
Photo: RFA

Уйғур дияридики йеза-кәнтләрниң йәрлик намлири өзгәртилмәктикән

Игилишимизчә, хотән вилайитиниң қарақаш наһийәсигә қарашлиқ бир қисим кәнтләрниң тарихтин буян қоллинилип келиватқан әслидики йәрлик намлири өзгәртилмәктикән.

Радийомизға кәлгән инкаслардин мәлум болушичә, бу йил 1-айдин башлап қарақаш наһийәсиниң ява йезисиға қарашлиқ қәдимий кәнтләрдин базарбойи кәнтиниң нами «қизил байрақ» қа, пәтиғил кәнтиниң нами «бәхт» кә өзгәртилгән. Даириләр бу йил 3-айда мәзкур кәнтләргә панус есип нам өзгәртиш мурасими өткүзгән.

Қарақаш наһийәсиниң ява йезисики йәрлик кәнт кадирлири радийомизниң бу һәқтики зияритини қобул қилип, мәзкур икки кәнтниң әслидики намлириниң өзгәртилгәнликини дәлиллиди.

Лагердин чиққан 3 парчә салам хәт әркин дуняға ашкариланди

Японийәдә яшаватқан уйғур муһәррәмниң лагердики туғқанлиридин өйигә чиқирилған 3 парчә салам хәтни дуняға ашкарилиши күчлүк ғулғула қозғиди.

Мәлум болушичә, японийәдики муһәррәм муһәммәтәли 2018-йилиниң ахири тағиси арқилиқ сүрәткә тартип әвәтилгән 3 парчә салам хәтни тапшуруп алған. Бу салам хәтләр униң лагерға қамалған бовиси, момиси вә тағиси тәрипидин йезилған болуп, лагерларниң ички қисмидики зулумларни билиштә муһим язма учур һесаблинидикән.

Муһәррәм бу хәтләрни дәлил сүпитидә таратқуларға ашкара қилип, өзиниң лагерға қамалған он нәччә туғқини һәққидә гуваһлиқ бәргәндин кейин, хитай даирилириниң бу йил 20-июлда униң турпандики йәнә бир тағиси абдурахман мәмәтни тутқун қилғанлиқи мәлум болди.

Серикҗан билашоғли: «шәртлик қоюп берилишим һәқлиқ күрәш йолидин чекингәнликимни көрсәтмәйду»

Қазақистанда 5 айдин буян мирзақамаққа елинған «ата юрт пидаийлири» тәшкилатиниң йетәкчиси серикҗан билашоғли үстидин 16-авғуст күни алмутада сот ечилип, шәртлик қоюп берилгән.

Игилинишичә, қазақистан тәптиш даирилири тәрипидин «миллий өчмәнликкә қутратқулуқ қилиш» вә «қанунсиз тәшкилат қуруш» дегән җинайәтләр билән әйиблинип, 7 йиллиқ қамаққа кесилиши илгири сүрүлгән серикҗан билашоғли мәзкур сотта 7 йилғичә тәшкилат ишлириға арилашмаслиқ, хитайға қарши сөз қилмаслиқ шәрти билән қоюп берилгән.

Серикҗан билашоғли бу мунасивәт билән радийомиз зияритини қобул қилип, «шәртлик қоюп берилишим бундин кейинки һәқлиқ күрәш йолидин чекингәнликимдин дерәк бәрмәйду,» деди.

Хитай үчүн җан пидалиқ билән ишлигән сиясий комиссар абликим ғопур қамаққа елинған

Мәлум болушичә, 2008-йили хитайда өткүзүлгән олимпик тәнһәрикәт мусабиқиси мәзгилидә кучада йүз бәргән қаршилиқ һәрикәтлирини бастурушта актип рол алған вә мукапатланған куча наһийәлик җ. Х. Идарисиниң сиясий комиссари абликим ғопур өткән йили 6-айда тутқун қилинған.

Кучадики сақчи хадимлири радийомизниң бу һәқтики зияритини қобул қилип, абликим ғопурниң тутқунда икәнликини дәлиллиди.

Абликим ғопурни яхши билидиған шиветсарийәдики кучалиқ муһаҗирлардин һәбибулла халиқ радийомиз зияритини қобул қилип, абликим ғопурниң вәзипидики мәзгилидә куча хәлқини қан йиғлатқанлиқини, 2008-йили кучада йүз бәргән сақчиханиға һуҗум қилиш һәрикитидә йүзи көйүп яриланған абликим ғопурни хитай һөкүмитиниң шаңхәйдә давалитип, янпишиниң терисини йүзигә көчүрүп сақайтқанлиқини билдүрди.

Қәшқәрдики 2-дохтурханиниң ташқи кесәлләр дохтури сайитһаҗи 2 йилдин буян тутқунда икән

Дохтур сайитһаҗи қасим қәшқәр 2-дохтурхана ташқи кесәлләр бөлүминиң мудир вирачи болуп, у 2017-йил 9-айниң 4-күни сақчилар тәрипидин елип кетилгәндин буян һазирғичә һечқандақ из-дерики болмиған.

Сайитһаҗиниң чәтәлдә яшаватқан йеқин тонушлири радийомизға учур берип, униң қәшқәр тәвәсидила әмәс, бәлки пүткүл җәнубий уйғур диярида сүйдүк йолидики ташни чүшүрүш оператсийәси бойичә нами чиққан дохтур икәнликини билдүрди.

Қәшқәр 2-дохтурханидики хадимлар радийомизниң бу һәқтики телефонини қобул қилип, сайитһаҗиниң мәзкур дохтурханиниң мутәхәссисләр тизимликидин исми өчүрүлгәнликини, униң «өгиништә» икәнликини ашкарилиди.

Сабиқ миллий армийә җәңчиси абдукерим кәримоф қирғизистанда вапат болди

1944-1949-Йиллиридики шәқий түркистан җумһурийитиниң миллий армийәсидә вәзипә өтигән сабиқ җәңчи абдукәрим кәримоф қирғизистанниң тоқмақ шәһиридә 100 йешида аләмдин өткән.

1919-Йили қәшқәрдә туғулған абдукәрим кәримоф 1944-йили илида инқилаб партлиғанда пидаийлар сепидә ғулҗини азад қилиш урушиға вә миллий армийәниң шималға йүрүш фронтида алтайни азад қилиш урушлириға қатнашқан икән.

У 1962-йили хитайниң бесими түпәйли советлар иттипақиға көчүп чиққан болуп, кейинки һаятида қирғизистандики уйғурларниң җамаәтлик ишлирида актип рол ойниған икән. Абдукерим кәримофниң вапатидин кейин қирғизистанда сабиқ миллий армийә җәңчилиридин әң ахирқи 3 нәпәр киши қалған.

Толуқ бәт