Heptilik xewerler (10-awghusttin 16-awghustqiche)

Muxbirimiz eziz
2019-08-16
Élxet
Pikir
Share
Print
Elnigar iltebir xanim "Axbaratning insan heqliri we démokratiyini ilgiri sürüshtiki küchi" mawzuluq doklat bermekte. 2011-Yili 26-séntebir, éstoniye.
Elnigar iltebir xanim "Axbaratning insan heqliri we démokratiyini ilgiri sürüshtiki küchi" mawzuluq doklat bermekte. 2011-Yili 26-séntebir, éstoniye.
Social Media

Dunyaning herqaysi jayliridiki Uyghurlar qurban héytni tebriklidi

Muhajirettiki Uyghurlar 2019-yilliq qurban héyt bayrimini oxshimighan shekillerde kütüwaldi. Amérika, türkiye, awstraliye, qazaqistan qatarliq jaylardiki Uyghur jama'iti héyt namizida bir yerge jem bolup, wetendiki éziliwatqan xelq üchün birlikte du'agha qol kötürdi. 

Uyghur diyarining köp qisim jaylirida bolsa bu yilliq héyt namizi oqulmighan. Buningda kishilerning meschitke bérishtin qorqushi hemde imamliq qilghudek diniy zatlarning qalmighanliqi asasiy seweb bolghan. 

Xitay hökümitining bir qisim chong sheherlerde Uyghurlarni naghra-sunay chélish we samagha teshkillesh qilmishini d u q qatarliq bir qisim teshkilatlar "Dunyaning közini boyash urunushi" dep qattiq eyiblidi. 

Uyghur diyaridiki milliy binakarliq uslubliri yoqitilmaqta

Yéqinda qeshqer, xoten, aqsu qatarliq bir qisim jaylarda "Sotsiyalistik yéngi yéza qurush" sho'ari astida milliy pasondiki bezi öylerning chéqip tashlan'ghanliqi, öylerdiki gilem qatarliq milliy buyumlarning öy bézekliri qataridin siqip chiqirilghanliqi melum boldi. 

Weziyettin xewerdar kishiler bu heqte pikir qilip "Bu hal xitay hökümitining mehelliwi medeniyet amillirini yoqitish, shu arqiliq milliy iptixarliq tuyghusini qurutup tashlash urunushining ipadisi" dep körsetti.

Xitay hökümiti téxi yéqinda meschitlerning munarlirini buzup tashlash we öylerdiki méhrab, oyuqlarni qomurup tashlash heqqide buyruq chüshürgen idi.

Meshhur lagér süritidiki yene bir mehbusning kimliki ashkarilandi

Lop nahiyilik "Terbiyilesh merkizi" ge a'it meshhur lagér süritidiki yene bir kishining lop nahiyilik sémont zawutining shopuri mettursun éziz ikenlikini melum boldi.

Ehwaldin xewerdar kishiler bu heqte uchur bérip, mettursun ézizning 2017-yilining béshida "15 Künlük öginishke bérish" namida lagérgha élip kétilgenche hazirghiche qoyup bérilmigenlikini bildürdi. 

Yerliktiki kadirlardin biri mettursun ézizning ikki yildin buyan lagérda ikenlikini éytqan bolsimu, emma uning néme sewebtin tutqun qilin'ghanliqini dep bérelmidi.

Abduraxman memet bir parche salam xet üchün tutqun qilin'ghan

Yéqinda turpandiki "Altun köwrük sayahet shirkiti" ning xadimi abduraxman memetning lagérdiki uruq-tughqanliri yazghan salam xetni chet'eldiki jiyenige yetküzgenliki üchün buningdin ikki ayche ilgiri tutqun qilin'ghanliqi melum boldi.

Uning yaponiyediki jiyeni muherrem bu heqte melumat bérip, taghisidin alghan bu xet lagérlar heqqidiki ré'alliqni eks ettüridighanliqi üchün uni torda élan qilghanliqini éytti. 

Melum bolushiche, abduraxman memetning a'ilisidinla on nechche kishi lagérgha élip kétilgen bolup, ularning köpinchisi déhqan kishiler iken.

Tunji Uyghur aqsarayda ishqa chüshti

Amérikadiki ikkinchi ewlad Uyghur muhajirliridin elnigar iltebir yéqinda amérika dölet xewpsizliki kéngishining xitay ishliri bölümige diréktorluqqa teyinlendi. Bu heqtiki xewerler tézdin dunyaning herqaysi jayliridiki gézitlerde bes-beste xewer qilindi. 

Bu heqtiki axbarat xewerliride éytilishiche, amérika-xitay munasiwitide soda we lagérlar mesilisini chöridigen halda jiddiy özgirishler körülüwatqanda bir Uyghurning aqsaraydiki bu xil muhim wezipige teyinlinishi köp qirliq ehmiyetke ige iken. 

Melum bolushiche, elnigarning emdiki wezipisi aq sarayning xitay ishlirigha munasiwetlik qararlirigha meslihet bérish hemde bu qararlarning herqaysi ministirliqlar arisida ijra bolushini maslashturush bolidiken.

Zinnetgül tursunning xitaygha qayturulghanliqi delillendi

Türkiye köchmenler idarisi buningdin birnechche ay ilgiri izmir shehiridiki musapirlar merkizide tutup turuluwatqan zinnetgül tursun we uning ikki balisini bashqa besh Uyghur bilen bille tajikistan'gha ötküzüp bergen idi.

Muxbirimizning ehwal igilishi jeryanida ularning tajikistandin xitaygha qayturup bérilgenliki ashkarilandi. Zinnetgülning ghulja shehiridiki anisi ikki newrisige özining qarawatqanliqini éytti. 

Melum bolushiche, bu qétim qayturulghan bashqa besh Uyghurning biri er, qalghini ayallar bolup, ularningmu xitaygha qayturup bérilgenliki algha sürülmekte iken.

Toluq bet