Heptilik xewerler (13-iyuldin 19-iyulghiche)

Muxbirimiz eziz
2019-07-19
Élxet
Pikir
Share
Print
Amérika awam palatasining re'isi nensiy pélosi xanim amérika tashqi ishlar ministirliqining sahibxaniliqida ötküzülüwatqan 2‏-nöwetlik diniy erkinlikni ilgiri sürüsh ministirlar yighinida sözlidi. 2019-Yili 16-iyul, washin'gton.
Amérika awam palatasining re'isi nensiy pélosi xanim amérika tashqi ishlar ministirliqining sahibxaniliqida ötküzülüwatqan 2‏-nöwetlik diniy erkinlikni ilgiri sürüsh ministirlar yighinida sözlidi. 2019-Yili 16-iyul, washin'gton.
RFA

Amérika prézidénti donald tramp aq sarayda jewher ilham bilen körüshti

Amérika prézidénti donald tramp charshenbe küni chüshtin kéyin Uyghur pa'aliyetchi jewher ilham qatarliq 27 wekilni aq saraygha teklip qilip, ular bilen körüshti.

Uyghur pa'aliyetchi jewher ilham prézidént trampqa dadisi, yeni siyasiy tenqidliri üchün xitay hökümiti teripidin muddetsiz qamaq jazasigha höküm qilin'ghan ilham toxtining hemde Uyghurlarning ehwalini qisqiche chüshendürüsh bilen birge Uyghurlar diyaridiki ghayet zor tutqun we lagérlar mesilisi heqqide melumat berdi.

Melum bolushiche, jewher ilhamning Uyghur jem'iyiti éghir paji'elerge duch kéliwatqanda aq sarayda amérika prézidénti donald tramp bilen körüshüshi Uyghurlarni tolimu xursen qilghan.

2019-Yilliq diniy erkinlikni ilgiri sürüsh ministirlar yighinida Uyghurlar mesilisi muhim témilardin boldi

Amérika tashqi ishlar ministirliqi sahibxaniliqidiki 2019-yilliq diniy erkinlikni ilgiri sürüsh ministirlar yighini 15-iyul küni washin'gton shehiride bashlinip bir qanche kün dawamlashti.

Yighinda diniy étiqadi seweblik éghir basturushlargha duch kelgen xelqler qatarida Uyghurlarning qandaq paji'elerge duch kéliwatqanliqi amérika siyasiyonliri, herqaysi diniy zatlar we Uyghur wekilliri teripidin yene bir qétim tekitlendi.

Yighin jeryanida amérika tashqi ishlar ministirliqining ministiri mayk pompéyo xitay hökümitining Uyghurlarni basturush siyasetlirini qattiq eyiblidi hemde "Xitay hökümitining Uyghurlargha qiliwatqanliri biz yashawatqan 21-esirning yüzige chüshken bir dagh" dep körsetti.

Amérika siyasiy qatlimidiki dangliq shexsler Uyghurlar mesiliside heqiqetni yaqlidi

Uyghurlar diyaridiki keng kölemlik basturush we zor tutqun mesilisi dunya axbaratidiki muhim témilardin boluwatqanda amérika siyasiy qatlimidiki bir qisim dangliq shexsler Uyghurlar mesiliside özlirining heqqaniyetni yaqlaydighanliqini bildürdi.

Amérika démokratiyeni ilgiri sürüsh fondining re'isi karl gérshman radiyomiz muxbirining ziyaritini qol qilghanda xitay hökümitining hakimmutleqliqi we zalimliqini keskin tenqidlep "Uyghurlar éghir qirghinchiliqqa duch kelmekte" dep körsetti.

Amérika xelq'ara diniy erkinlik komitétining komissari tenzin dorji bu heqte pikir qilip: "Xitay iman we rohni weyran qilalmaydu" dep körsetti hemde Uyghurlarni ümidsizlenmeslikke chaqirdi.

Misirdin qaytqan Uyghur ashpezler "Térrorluq" bilen eyiblinip éghir qamaqqa höküm qilin'ghan

Yéqinda misirdiki "Eslem" Uyghur ashxanisida ishligen yette ashpezning yurti xoten'ge qaytqandin kéyin bir jinayetchiler guruhi dep qarilinip 10 yilliqtin 20 yilghiche muddette qamaqqa höküm qilin'ghanliqi melum boldi.

Shahitlarning bildürüshiche, ular xitay saqchilirining éghir qiyin-qistaqlirigha berdashliq bérelmey özlirining misirgha barghanliqini "Tirikchilik üchün emes, belki térrorluq pa'aliyetliri üchün barghanmiz" dep iqrar qilishqa mejbur bolghan.

Misirdiki Uyghurlarni nishan qilghan tutqunda köpligen Uyghur oqughuchilar qolgha élinip xitaygha ötküzüp bérilgendin kéyin iz-déreksiz ghayib bolghan idi. Shu qatarda tutqun qilin'ghan Uyghur ashpezlerning qismiti ashu ghayib bolghan oqughuchilarning teqdirining qandaq bolghanliqini wasitilik halda körsitip berdi.

Karxanichi qadir réhim ata-anisining ölümige adem köp kelgenliki üchün qamaqqa höküm qilin'ghan

Qeshqer shehiridiki dangliq karxanichilardin qadir réhim we uning Hedisi Munewwer réhimning ayrim-ayrim halda 11 yilliq we 15 yilliq qamaqqa höküm qilin'ghanliqi ashkarilandi.

Muxbirimizning ehwal éniqlishi jeryanida hazir Uyghurlar diyaridiki herqaysi jaylarda nezirge kélidighan kishilerning sani 30 din éship ketse bolmaydighanliqi, xilapliq qilghanlarning éghir qamaqqa höküm qilinidighanliqi aydinglashti.

Weziyettin xewerdar kishiler, ölüm murasimigha qatnishidighan kishilerning sanini chekleshni 3-4 yilning aldida yolgha qoyghanliqini ilgiri sürse, yene beziler, yéqinqi ikki yildin buyan da'irilerning lagérdiki sirliq ölümlerni sirtqa ashkarilimasliq üchün ölüm murasimigha qatnishidighan kishiler sanini 10-15tin ashurmaywatqanliqini tekitlimekte.

Chén chüen'gogha jaza bérish amérika dölet mejliside barghanséri köp qollashqa érishmekte

Amérika awam palatasining re'isi nensiy pélosi xanim 16‏-iyul küni 2019-yilliq diniy erkinlikni ilgiri sürüsh ministirlar yighini jeryanida "Chén chüen'go yer shari magnitskiy qanunining émbargosigha uchrishi kérek" dep körsetti.

Melum bolushiche, tramp hökümiti yer shari magnitskiy qanunini ishqa sélip, xitay emeldarlirini jazalashni arqigha sürüp kelmekte iken. Analizchilar tramp hökümitining amérika-xitay soda söhbitini közde tutup, "Shinjang mesilisi" de xitay emeldarlirigha we alaqidar xitay karxanilirigha émbargo qoyushni keynige sürüwatqanliqini bildürmekte iken.

Melum bolushiche, bu nensiy pélosining tramp hökümitini ikkinchi qétim xitayning Uyghurlarni basturush qilmishigha qarshi tedbir qollinishqa chaqirishi iken.

Toluq bet