Heptilik xewerler (24-marttin 30-martqiche)

Muxbirimiz eziz
2018-03-30
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

Uyghur ayalliri "Yépiq terbiyelesh merkezliri" ge köplep solanmaqta

Uyghur diyaridiki "Terbiyelesh merkezliri" ge yighiwélin'ghanlar arisida ayallarning sani barghanséri éship méngiwatqanliqi melum.

Yéqinda qeshqer sheherlik diniy ishlar idarisining sabiq kadiri pezilet bekrining öz tewelikidiki "Yépiq terbiye" herikitige yétekchilik qilishta aktip bolmighanliqi üchün uning "Yépiq terbiye lagéri" gha élip kétilgenliki ashkarilandi.

Muxbirimizning ehwal igilishi jeryanida aqsu shehridiki 61 yashliq aytursun qurbanning ikki yil ilgiri misirgha sayahetke barghanliqi seweblik ötken yili mart éyida "Terbiyelesh" ke élip kétilgenliki, hetta ötken yili qaza qilghan oghlining axiretlik ishighimu qatnashturulmighanliqi aydinglashti.

D u q "Namsiz mehbuslar tizimliki" ni ishleshke bashlidi

Uyghur diyarida her xil "Siyasiy" böhtanlar sewebidin "Terbiyelesh merkezliri" ge we türmilerge élip kétiliwatqan kishilerning sani yüz minglap éshiwatqanliqi melum.

Xelq'aradiki alaqidar teshkilatlarning diqqitini bu ishqa jelp qilish üchün dunya Uyghur qurultiyining teshkillishi bilen "Namsiz mehbuslar" ning tizimlikini turghuzush xizmiti bashlandi.

Melum bolushiche, d u q nöwette deslep bolup on ming Uyghurning tizimlikini turghuzup chiqmaqchi boluwétiptu. Buningda shu kishining asasliq uchuri toplinidighan bolup, dunyaning herqaysiy jayliridiki Uyghur teshkilatliri buninggha jiddiy tutush qilmaqta iken.

Awstraliyede xitaygha qarshi zor kölemlik namayish ötküzüldi

25- We 26-mart künliri awstraliyediki üch yüzdin köp Uyghur paytext kanbérra shehrige toplinip, xitay hökümitining Uyghur diyaridiki "Yépiq terbiyelesh merkezliri" ge qarshi namayish ötküzdi.

Namayishchilar bu jeryanda xitay hökümitige qarshi sho'ar towlash bilen birge awstraliye hökümitini mezkur mesilide xitaygha bésim ishlitishke chaqirdi.

Melum bolushiche, bu qétimqi namayish "5‏-Iyul weqesi" din kéyin awstraliyede ötküzülgen Uyghurlarning kölimi eng zor bolghan bir qétimliq naraziliq namayishi hésablinidiken.

Chet'el teshkilatliri Uyghurlar üchün söz qilmaqta

Uyghur diyaridiki basturush we kontrolluqning tarixta misli körülmigen derijige chiqishi bilen bu hal dunya jama'etchilikining küchlük diqqitini qozghashqa bashlidi.

Yéqinda gérmaniyediki "Tehdit astidiki xelqler teshkilati" jiddiy bayanat élan qilip, xitay re'isi shi jinpingning sözini tenqidlidi hemde uni "Xitay chong milletchilikini terghip qilghanliq" bilen eyiblidi.

Ötken hepte jenwede échilghan b d t kishilik hoquq kéngishining 37-qétimliq omumiy yighinida kanada wekili Uyghur diyaridiki "Yépiq terbiyelesh merkezliri" ni mexsus tilgha élip, xitay hökümitining Uyghurlarni éghir derijide basturiwatqanliqini eyipligen idi.

Uyghur pa'aliyetchiler dunyaning herqaysiy jaylirida Uyghur mesilisini anglatti

Uyghur jem'iyiti éghir kirizisqa duch kéliwatqan bir peytte muhajirettiki Uyghur pa'aliyetchiler herqaysi jaylardiki xelqler we teshkilatlargha Uyghurlarning ehwalini anglitishqa küch serp qilmaqta.

"Wakaletsiz milletler teshkilati" ning bélgiyediki yighinigha qatnishiwatqan Uyghur pa'aliyetchilerdin dolqun eysa Uyghurlarning hazirqi ehwali heqqide tepsiliy melumatlar bergen hemde mezkur teshkilat arqiliq Uyghur mesilisini xelq'aragha téximu yaxshi tonutidighanliqini bildürgen.

Yaponiye Uyghur jemiyitining re'isi, d u q ning asiya we tinch okyan rayonidiki wekili ilham mehmutmu ötken hepte yaponiyening okinawa wilayitide hemde teywende chaqirilghan yighinlarda Uyghurlar mesilisini alahide tonushturghan.

Herqaysiy ellerdiki Uyghur jama'iti 2018-yilliq noruz bayrimini qutlidi

21-Mart küni dunyaning herqaysi jayliridiki Uyghurlar özlirining en'eniwi bayramliridin bolghan "Noruz bayrimi"ni birlikte qutlidi. Uyghur diyaridiki éghir siyasiy weziyet sewebidin noruzluq pa'aliyetler asasen muhajirettiki yash boghunlarning milliy tuyghusini ashurushqa merkezleshti.

Amérika, gérmaniye, qazaqistan qatarliq jaylardiki pa'aliyetlerde "Sherqiy türkistan marshi", Uyghur turmush en'eniliri we Uyghurluq kimliki heqqidiki nutuqlar bu yilliq noruz pa'aliyitige yéngi tüs qoshti.

Melum bolushiche, muhajirettiki Uyghur jama'iti bu xil pa'aliyet sorunlirini chet'ellerde chong boluwatqan Uyghur ösmürlirige Uyghurluq terbiyesi bérishtiki bir yaxshi purset, dep qarimaqta iken.

Toluq bet