Һәптилик хәвәрләр (24-марттин 30-мартқичә)

Мухбиримиз әзиз
2018-03-30
Елхәт
Пикир
Share
Принт
Әркин асия радиоси уйғур бөлүми һәптилик хәвәрлири
Әркин асия радиоси уйғур бөлүми һәптилик хәвәрлири
Photo: RFA

Уйғур аяллири «йепиқ тәрбийәләш мәркәзлири» гә көпләп соланмақта

Уйғур дияридики «тәрбийәләш мәркәзлири» гә йиғивелинғанлар арисида аялларниң сани барғансери ешип меңиватқанлиқи мәлум.

Йеқинда қәшқәр шәһәрлик диний ишлар идарисиниң сабиқ кадири пәзиләт бәкриниң өз тәвәликидики «йепиқ тәрбийә» һәрикитигә йетәкчилик қилишта актип болмиғанлиқи үчүн униң «йепиқ тәрбийә лагери» ға елип кетилгәнлики ашкариланди.

Мухбиримизниң әһвал игилиши җәрянида ақсу шәһридики 61 яшлиқ айтурсун қурбанниң икки йил илгири мисирға саяһәткә барғанлиқи сәвәблик өткән йили март ейида «тәрбийәләш» кә елип кетилгәнлики, һәтта өткән йили қаза қилған оғлиниң ахирәтлик ишиғиму қатнаштурулмиғанлиқи айдиңлашти.

Д у қ «намсиз мәһбуслар тизимлики» ни ишләшкә башлиди

Уйғур диярида һәр хил «сиясий» бөһтанлар сәвәбидин «тәрбийәләш мәркәзлири» гә вә түрмиләргә елип кетиливатқан кишиләрниң сани йүз миңлап ешиватқанлиқи мәлум.

Хәлқарадики алақидар тәшкилатларниң диққитини бу ишқа җәлп қилиш үчүн дуня уйғур қурултийиниң тәшкиллиши билән «намсиз мәһбуслар» ниң тизимликини турғузуш хизмити башланди.

Мәлум болушичә, д у қ нөвәттә дәсләп болуп он миң уйғурниң тизимликини турғузуп чиқмақчи болуветипту. Буниңда шу кишиниң асаслиқ учури топлинидиған болуп, дуняниң һәрқайсий җайлиридики уйғур тәшкилатлири буниңға җиддий тутуш қилмақта икән.

Австралийәдә хитайға қарши зор көләмлик намайиш өткүзүлди

25- Вә 26-март күнлири австралийәдики үч йүздин көп уйғур пайтәхт канберра шәһригә топлинип, хитай һөкүмитиниң уйғур дияридики «йепиқ тәрбийәләш мәркәзлири» гә қарши намайиш өткүзди.

Намайишчилар бу җәрянда хитай һөкүмитигә қарши шоар товлаш билән биргә австралийә һөкүмитини мәзкур мәсилидә хитайға бесим ишлитишкә чақирди.

Мәлум болушичә, бу қетимқи намайиш «5‏-июл вәқәси» дин кейин австралийәдә өткүзүлгән уйғурларниң көлими әң зор болған бир қетимлиқ наразилиқ намайиши һесаблинидикән.

Чәтәл тәшкилатлири уйғурлар үчүн сөз қилмақта

Уйғур дияридики бастуруш вә контроллуқниң тарихта мисли көрүлмигән дәриҗигә чиқиши билән бу һал дуня җамаәтчиликиниң күчлүк диққитини қозғашқа башлиди.

Йеқинда германийәдики «тәһдит астидики хәлқләр тәшкилати» җиддий баянат елан қилип, хитай рәиси ши җинпиңниң сөзини тәнқидлиди һәмдә уни «хитай чоң милләтчиликини тәрғип қилғанлиқ» билән әйиблиди.

Өткән һәптә җәнвәдә ечилған б д т кишилик һоқуқ кеңишиниң 37-қетимлиқ омумий йиғинида канада вәкили уйғур дияридики «йепиқ тәрбийәләш мәркәзлири» ни мәхсус тилға елип, хитай һөкүмитиниң уйғурларни еғир дәриҗидә бастуриватқанлиқини әйиплигән иди.

Уйғур паалийәтчиләр дуняниң һәрқайсий җайлирида уйғур мәсилисини аңлатти

Уйғур җәмийити еғир киризисқа дуч келиватқан бир пәйттә муһаҗирәттики уйғур паалийәтчиләр һәрқайси җайлардики хәлқләр вә тәшкилатларға уйғурларниң әһвалини аңлитишқа күч сәрп қилмақта.

«Вакаләтсиз милләтләр тәшкилати» ниң белгийәдики йиғиниға қатнишиватқан уйғур паалийәтчиләрдин долқун әйса уйғурларниң һазирқи әһвали һәққидә тәпсилий мәлуматлар бәргән һәмдә мәзкур тәшкилат арқилиқ уйғур мәсилисини хәлқараға техиму яхши тонутидиғанлиқини билдүргән.

Японийә уйғур җәмийитиниң рәиси, д у қ ниң асия вә тинч окян районидики вәкили илһам мәһмутму өткән һәптә японийәниң окинава вилайитидә һәмдә тәйвәндә чақирилған йиғинларда уйғурлар мәсилисини алаһидә тонуштурған.

Һәрқайсий әлләрдики уйғур җамаити 2018-йиллиқ норуз байримини қутлиди

21-Март күни дуняниң һәрқайси җайлиридики уйғурлар өзлириниң әнәниви байрамлиридин болған «норуз байрими»ни бирликтә қутлиди. Уйғур дияридики еғир сиясий вәзийәт сәвәбидин норузлуқ паалийәтләр асасән муһаҗирәттики яш боғунларниң миллий туйғусини ашурушқа мәркәзләшти.

Америка, германийә, қазақистан қатарлиқ җайлардики паалийәтләрдә «шәрқий түркистан марши», уйғур турмуш әнәнилири вә уйғурлуқ кимлики һәққидики нутуқлар бу йиллиқ норуз паалийитигә йеңи түс қошти.

Мәлум болушичә, муһаҗирәттики уйғур җамаити бу хил паалийәт сорунлирини чәтәлләрдә чоң болуватқан уйғур өсмүрлиригә уйғурлуқ тәрбийәси бериштики бир яхши пурсәт, дәп қаримақта икән.

Толуқ бәт