Heptilik xewerler (4-maydin 10-mayghiche)

Muxbirimiz jüme
2013-05-10
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

1. Rabiye qadir xanim "2013 - Yilining ölgilik anisi" bolup saylandi

Uyghur milliy herikiti rehbiri rabiye qadir xanim türkyening qeyseri wilayitide "2013 - Yilining nemune anisi" bolup saylandi.

Saylamni türkiye qeyseri wilayitidiki ayallar teshkilatliri we bezi siyasiy partiyiler ayallar komitétlirining mes'ulliri 5 - may ötküzgen.

Bu xewer türkiyediki "Xaber türk", "T r t türk" qatarliq téléwiziye qanallirida tarqitildi.

Uyghur ayallar birlikining türkiyede turushluq wekili rabiye ilktürk muxbirlargha bergen bayanatida, bügünki künde Uyghur xanim - qizlirining chidighusiz zulum astida ikenliki, bularning derd - elemlirini dunyagha anglitishta rabiye qadir xanimning intayin zor rol oynighanliqi, shu sewebtin shunga rabiye qadir xanimni "2013 - Yilining nemune anisi" dep saylighanliqini bildürdi.

2. Shangxeyde tirikchilik qilidighan bir qisim Uyghurlar, da'irilerning yolsizliqigha qarshi namayish qildi

Biz igiligen uchurlargha qarighanda, shangxeyde tirikchilik qiliwatqan bir qisim Uyghurlar 3 - may namayish qilip, hökümet da'irilirining yolsizliqigha naraziliq bildürgen.

Melumatlargha qarighanda, sheher muhitini asrash idarisi buyruq chiqirip, sheherdiki meschit aldida yaymichiliq qilidighan Uyghurlarni yayma achmasliqqa buyrughan. Uyghurlar buninggha qarshi chiqip namayish qilghan.

Namayishchilarning köpinchisi ayallar bolup, 20 etrapida iken. Neq meydan'gha 200 etrapida saqchi kelgen bolup, bir qisim namayishchilarni tutup ketken.

3. Almata shehiride sériqbuya shéhitlirige atap yighin chaqirildi

Dunya Uyghur qurulityining qazaqistandiki wekilliri 7 - may almutada yighin uyushturup, sériqbuya weqeside shéhit bolghan Uyghurlarning rohigha atap xetme - qur'an qildi.

Yighin'gha 80 etrapida kishi qatnashti. Yighinda dunya Uyghur qurulityining bash meslihetchisi riza semidi qatarliqlar söz qildi.

23 - Aprél maralbéshi nahiyisining sériqbuya yézisida toqunush yüz bergen. Xitay da'iriliri toqushta 6 neper atalmish Uyghur térrorchini neq meydanda étip öltürgenlikini, özidin 15 adem chiqim bolghanliqini bildürgen idi.

2 - May, wakaletsiz milletler teshkilati we d u q yawropa parlaméntigha xet yézip, "Sériqbuya weqesi" ni tekshürüshke chaqirghanidi.

4. Tarim uniwérsitétidiki bir qisim Uyghur oqughuchilar tutqun qilin'ghan

"Uyghurbiz" torining xewer qilishiche, bu ayning béshida da'iriler tarim uniwérsitétining bir nechche neper Uyghur oqughuchisini tutqun qilghan.

Dunya Uyghur qurultiyi bayanatchisi dilshat rishitning bildürüshiche, tutqun qilin'ghanlar 8 etrapida bolup, hazirche bulardin yéngisarliq alimjan, lopliq dilshat qatarliq ikkiylenning salahiyiti éniqlan'ghan.

Inkaslargha qarighanda, bu oqughuchilar 2 - may tutup kétilgen. Ularning qeyerge we nime üchün qamalghanliqi heqqide a'ile tawabi'atlirigha 8 - maygha qeder uchur bérilmigen.

5. 5 - Iyul weqesining 4 yilliqi harpisida ghayiplar a'ile tawabi'atliri yenila jawabsiz qaldurulmaqta

2009 - Yilidiki "5 - Iyul weqesi" ning 4 yilliq harpisida mezkur weqede iz - déreksiz yoqap ketken Uyghurlarning tughqanliri teshkilatlarni yardemge chaqirdi.

Ghayiblar a'ile - tawabi'atliridin sudixan hajim we qurban'güller ziyaritimizni qobul qilip, perzentliri heqqide xitay hökümitidin jawab kütüshtin ümid üzgenlikini, birdin - bir ümidi xelq'ara jama'ettin yardem kütüsh ikenlikini bayan qildi.

Ular mesilining yalghuz ghayiblar a'ilisining mesilisi emes, belki pütün Uyghur millitining derdi ikenlikini bayan qilip, chet'eldiki Uyghur teshkilatlarni bu heqte aktip heriketke chaqirdi.

2009 - Yilidiki namayish qanliq basturulghandin kéyin, bir qisim Uyghurlarning iz - déreksiz ghayib bolghanliqi melum bolghan idi.

6. "Istanbul sépilliri" shé'irlar toplimigha zeynure eysaning shé'iri kirgüzüldi

Ötken ay istanbulda neshr qilin'ghan "Istanbul sépilliri" namliq shé'irlar toplimigha Uyghur sha'ire zeynure eysa xanimning bir parche shi'iri kirgüzüldi.

Bu kitabta dangliq türk sha'irlirini öz ichige alghan dunyadiki 100 sha'irning istanbul toghrisida yazghan shé'irigha orun bérilgen.

Sha'ire zeynure eysa xanim ziyaritimizni qobul qilip, türklerning eng dangliq sha'irliri arisida shé'irlirigha orun bérilgenlikidin intayin xoshal ikenlki, buning Uyghurlarni dunya jama'etchilikige tonutushta muhim ehmiyetke ige ikenlikini éytti.

Toluq bet