Heptilik xewerler (31-awghusttin 6-séntebirgiche)

Muxbirimiz eziz
2019-09-06
Élxet
Pikir
Share
Print
"Uyghur edliye arxipi ambiri" 72 yashliq shemshiqemer anining ghuljidiki melum bir lagérda tutup turuluwatqanliqi heqqide tarqatqan guwahliq filimi. 2019-Yili 30-awghust.
"Uyghur edliye arxipi ambiri" 72 yashliq shemshiqemer anining ghuljidiki melum bir lagérda tutup turuluwatqanliqi heqqide tarqatqan guwahliq filimi. 2019-Yili 30-awghust.
Social Media

Olsi yazéji Uyghurlar diyaridiki lagérlarning eng yéngi ehwalini ashkarilidi

Yéqinda xitay hökümitining teklipige bina'en Uyghurlar diyaridiki lagérlarni ziyaret qilishqa teklip qilin'ghan albaniyelik zhurnalist olsi yazéji özining lagérlarda körgenlirini dunyagha anglatti.

Olsining widiyoluq bayanlirida lagérlardiki normalsiz körünüshler, shundaqla tutqunlarning normal turmush adetliri üchün lagérlargha qamilishi qatarliq bir qatar ehwallarni pash qilip "Lagérlardiki bu insanlar dowzaqning özide yashawétiptu" dep xulase chiqarghan.

Xitay hökümiti izchil lagérlarni "Kespiy terbiyilesh mektipi" dep kéliwatqan bolup, olsi yazéjining guwahliq bayanliri lagérlarning heqiqiy mahiyitini pash qilishta muhim rol oynidi.

Yash tijaretchi shahimerdan lagérdin chiqipla jan üzgen

Ürümchidiki 38 yashliq tijaretchi shahimerdan perhat 2018-yili 8-awghustta nimjan halda lagérdin qoyup bérilgen hemde aridin on kün ötkende jan üzgen.

Ürümchining bulaqbéshi mehelliside dollarchiliq qilip kelgen shahimerdan özining teqwaliqi we jama'et ishliri üchün xeyri-saxawet qilishi bilen köpchilikning hörmitige érishken yashlardin iken. 

Melum bolushiche, merhum wapat bolghanda "Méngisige su chüshken" dep di'agnoz qoyulghan. Tébbiy sahediki mutexessisler bu ehwal heqqide pikir qilip buning tok bilen qiynighanda yüz béridighan hadise ikenlikini bildürdi. 

Ghuljidiki er-ayal pénsyonérlar chet'el sepiri üchün qamaqqa höküm qilin'ghan

Ghulja éléktr istansisigha 30 nechche yildin xizmet qilip pénsiyige chiqqan turaxun joribay we uning ayali shadiye zakir 2018-yili 3-ayda tutqun qilinip lagérgha élip kétilgen. 

Melum bolushiche, bu er-ayallar qanunluq pasport arqiliq 2014-we 2015-yilliri gollandiyede olturushluq perzentlirini yoqlap kelgen bolup, ularning ashu birnechche qétimliq chet'el sepiri lagérgha kétip qélishigha seweb bolghan. 

Yéqinda turaxun joribayning sekkiz yilliq, shadiye zakirning yette yilliq qamaqqa höküm qilin'ghanliqi melum boldi. 

72 Yashliq shemshiqemer ana lagérgha qamalghan

Uyghurlar diyaridiki lagérlargha qamalghanlar ichide yashinip qalghan kishilerningmu xéli köp sanni igileydighanliqi bu yil 72 yashqa kirgen shemshiqemer anining ehwalidin yene bir qétim melum boldi.

Gérmaniyediki adile ghéni qatarliq üch acha-singil yéqinda téléwiziyide guwahliq bérip, ghulja shehirining qaradöng mehellisidiki 72 yashliq momisi shemshiqemerning 2018-yilining béshida lagérgha élip kétilgenlikini ashkarilidi.

Shemshiqemer ana tikküchilik bilen shughullinidighan bolup, perzentliri uning lagérgha barghudek héchqandaq ishi yoqluqini bildürdi. 

"Yettisu Uyghur muzika mektipi" Uyghur sen'itining dawamlishishigha hesse qoshmaqta

Qazaqistanning almuta wilayitidiki "Yettisu Uyghur muzika mektipi" ötken üch yildin buyan bir qatar tirishchanliqlarni körsitip, yéqinda tötinchi oqush yilini ghelibilik bashlidi.

Mezkur mektep en'gliyediki "Agaxan fondi" ning iqtisadiy yardimi bilen qurulghan bolup, hazirghiche alte yashtin 11 yashqiche bolghan ellik nechche Uyghur ösmürni Uyghur muqamliri we Uyghur chalghu eswabliri boyiche muntizim terbiyilep chiqti.

Uyghurlar diyarida Uyghur medeniyitige mensup barliq mezmunlar, jümlidin Uyghur muzika sen'iti xitay hökümitining yoqitish obyéktigha ayliniwatqanda mezkur mektepning bu jehettiki izbasarlarni terbiyilesh tirishchanliqi zor alqishqa érishmekte. 

Enqerede tunji qétimliq Uyghur ana til kursini püttürüsh murasimi ötküzüldi

Xitay hökümitining nöwette Uyghurlarning tili, diniy étiqadi we medeniyet miraslirini hujum nishani qilishigha egiship, dunyaning her qaysi jayliridiki Uyghurlar perzentlirige ana tilini ögitishke alahide ehmiyet bermekte.

31-Awghust küni enqerediki "Uyghur tetqiqat instituti" ning uyushturushi bilen Uyghur ana til kursining 1-oqush yilini ghelibilik püttürgen oqughuchilarning oqush püttürüsh murasimi ötküzüldi. Oqughuchilar Uyghur tili we edebiyati sahesi boyiche bir qatar nomurlarni orunlap köpchilikni xursen qildi. 

Melum bolushiche, bu xildiki ana til kursliri arqiliq Uyghur ösmürlirige ana til söygüsi, weten muhebbiti we zulumgha qarshiliq körsitish rohi heqqide emeliy we janliq terbiye bérishke bolidiken.

Toluq bet