Lagér shahidi gülzire örqanqizi: "Lagérgha tekshürgüchiler kélishtin burun chachlirimizni boyatquzdi"

Muxbirimiz shöhret hoshur
2019-05-01
Élxet
Pikir
Share
Print
Lagér shahiti gülzire örqanqizi yotubé torida guwahliq bayanati élan qilmaqta. 2019-Yili 29-aprél.
Lagér shahiti gülzire örqanqizi yotubé torida guwahliq bayanati élan qilmaqta. 2019-Yili 29-aprél.
Social Media

Ötken yilning axiri Uyghur rayonidiki yighiwélish lagéridin qoyuwétilgen we nöwette qazaqistanda yashawatqan gülzire örqanqizi tünügün, yeni 29‏-aprél küni yutub qanilida tunji qétim guwahliq bayanati élan qildi. U bayanatida ikki yildin artuq yatqan ghulja nahiyisidiki bir lagérning ichki ehwalliri heqqide tepsiliy melumat berdi. Gülzire örqanning pash qilishiche, her qétim lagérgha tekshürgüchiler kelgende lagérdikiler öz ehwali heqqide yalghan sözleshke mejburlan'ghan. Oqutquchilar öyliridin teshteklik güllerni élip kélip lagérni waqitliq bézigen. Hetta lagérdiki bir qisim ayallarning chachliri boyalghan.

Hörmetlik radi'o anglighuchilar, lagér shahidliridin ömer bék'ali, méhrigül tursun, gülbahar jélilowa we sayragül sayitqanlardin kéyin yene bir guwahchi otturigha chiqti. Tünügün yutubta guwahliq bayanati élan qilghan 5‏-guwahchi gülzire örqanqizining pash qilishiche, lagérlarni tekshürüshke her qétim adem kelgende ular külüp turushqa, tekshürgüchilerge tebessum bilen béqishqa mejburlan'ghan. Ular bu orunda türme hayatini bashtin kechürüwatqan bolsimu, lékin özining kespiy terbiye körüwatqanliqi we bu orundin razi ikenlikini déyishke buyrulghan. Lagérda ular quruq gürüch we xémir bilen ozuqliniwatqan bolsimu, her küni qoy we kala göshide béqiliwatqanliqini déyishke zorlan'ghan. Gülzire örqanqizining déyishiche, hetta da'iriler tutqunlarning rohiy keypiyati we teqi-turqini tamamen perqliq körsitish üchün tekshürgüchilerge körünidighan ayallarning chéchini boyighan. 

Xitay da'iriliri yéqindin buyan xelq'ara jama'et pikrining bésimi bilen bir qisim tekshürüsh ömeklirining Uyghur rayonidiki lagérlar üstide tekshürüsh élip bérishigha yol qoyghan. Emma rayon'gha barghan tekshürgüchiler, kishilik hoquq teshkilatlirining doklatidikidin perqliq menzire bilen uchrashqan bolup, tekshürgüchiler bu yerde erkin-azade yashawatqan we öz ehwalidin memnunluqini bes-beste bayan qilghan, naxsha éytip we ussul oynawatqan 22 yash bilen 40 yash arisidiki kesip öginiwatqan atalmish "Bextlik yashlar" ni körgen idi.

Shahit gülzire örqanqizi bu guwahliq bayanatida yuqiriqi menzirining saxta ikenlikini pash qilipla qalmastin, belki yene xitay da'irilirining lagér heqqide dölet ichidiki teshwiqatiningmu saxtiliqini pash qildi. Melum bolushiche, 2017‏-yili 7‏-ayning 17‏-küni lagérgha ekirip kétilgen gülzire örqanqizi 2018‏-yili 10‏-ayda lagérdin qoyup bérilgen. U qoyup bérilgendin kéyinmu qazaqistan'gha kétishige derhal yol qoymighan. U ghuljida ötküzülgen bayraq chiqirish yighinlirida özining lagérdiki kechmishi heqqide saxta doklat bérishqa mejbur bolghan. U doklatida özi éghir azab chekken bu lagérlarni maxtighan. Shi jinping we xitay kompartiyisige rehmet éytqan. 

Gülzirening yene pash qilishiche, da'iriler lagérdiki tutqunlarning a'ile-tawabi'atidinmu tutqunlarning heqiqiy ehwalini yoshurghan. Tutqunlar a'ilisi bilen uchrashturulidighan chaghda uchrishish ornigha koyza-kishen bilen apirip ekélin'gen, peqet a'ile-tawabi'atining köz aldidila ulardiki koyza-kishen éliwétilgen we körsitilmigen. 

Ilgiriki éniqlashlirimizdin melum bolushiche, xitay da'iriliri yighiwélish lagérlirigha adem toplighanda a'ililerdin awwal yashlarni, andin dadilarni, uningdin kéyin anilarni élip ketken. Bashta ekétilgenliri qalghan a'ile ezaliriningmu ekétilishini texmin qilmighan. Bu nöwet gülzirening pash qilishiche, da'iriler kishilerni lagérgha toplighanda hazirqidek éniqsiz bir muddette emes, peqet 15 yaki 20 künlük möhlet bilen élip ketken. Gülziremu 15 kün möhlet bilen ekitilip, qazaqistandiki a'ile tawabi'atining heriket qilishi bilen 2 yildin kéyin qoyup bérilgen. 

"Ata yurt" teshkilatining 15‏-aprél küni yutubta élan qilghan bir söhbet xatirisidin melum bolushiche, nöwette qazaqistanda yashawatqan yene lagér shahiti bextigül köshenbay ghulja tékestiki lagérgha aldap apirilghan, yeni saqchilar uninggha peqet beden tekshürüshke élip mangghanliqini uqturup, uningdin kéyin lagérgha ekétilidighanliqini uqturmighan. 

Gülzirening guwahliq bayanatidin melum bolushiche, gülzire esli ghulja nahiyisidin bolup, u yoldishi we qizi bilen birlikte 2014‏-yili qazaqistan'gha köchüp kelgen. U 2017 ‏-yili 7‏-ayda yurtigha qaytqanda ghulja nahiyisidiki lagérgha soliwélin'ghan. Gülzire bayanatida özining ghulja nahiyisining béysenpo dégen yéridiki lagérda turghanliqini tilgha alghan. Biz ötken yili ghulja nahiyisidiki bir yighiwélish lagéri xadimini ziyaret qilghan waqtimizda u özining béysenpo, yeni shimali tagh qaptili déyilidighan bir jaydiki lagérda xizmet qilidighanliqini pash qilghan idi.

Toluq bet