Баварийә парламентида «уйғурларниң вәзийити тоғрисида ахбарат елан қилиш йиғини» өткүзүлди

2020-03-10
Елхәт
Пикир
Share
Принт
Баварийә парламентида өткүзүлгән «уйғурларниң вәзийити тоғрисида ахбарат елан қилиш йиғини» дин бир көрүнүш. 2020-Йили 6-март. Мюнхен, германийә.
Баварийә парламентида өткүзүлгән «уйғурларниң вәзийити тоғрисида ахбарат елан қилиш йиғини» дин бир көрүнүш. 2020-Йили 6-март. Мюнхен, германийә.
Photo: RFA

Йиғинда маркус әпәнди башлиқ баварийә парламентиниң бир қисим әзалири, «явропа шәрқий түркистан бирлики» ниң рәиси әсқәрҗан қатарлиқлар нутуқ сөзлигән.

«яврупа шәрқий түркистан бирлики» ниң рәиси әсқәрҗан бу хусуста зияритимизни қобул қилғанда алди билән баварийә парламентиниң өткән йили қарар қобул қилип уйғурларға игә чиқишни тәшәббус қилғанлиқини әскәртип өтти. У сөзидә бүгүнки бу йиғинда «австралийә истратегийәлик сиясәт иниститути» 1-март елан қилған уйғурларниң мәҗбурий әмгәккә селиниватқанлиқи тоғрисидики доклатниң роһиға бинаән уйғурларниң нөвәттики еғир вәзийитиниң, болупму җаза лагерлири мәсилисиниң әтраплиқ тонуштурулғанлиқини баян қилди.

Әсқәрҗан әпәндиниң билдүришичә, маркус әпәнди йиғинда қилған сөзидә хитайниң пүтүн дуняға бир тәһликә боливатқанлиқини тәкитлигән. У баварийәдики «коңзи иниститутлири» ниң хитайниң җасуслуқ органлири икәнликини илгири сүргән вә өзиниң «коңзи иниститутлири» ни тақаш йолида көрсәткән тиришчанлиқлирини тилға елип өткән.

Әсқәрҗан әпәнди йиғинда шәрқий түркистанниң омумий вәзийитидин мәлумат бериш билән биргә дуня сәһийә тәшкилатиниң шәрқий түркистандики җаза лагерлириға дәрһал тәкшүрүш өмики әвәтип, корона вирусиниң лагерларға тарқилиш әһвалини тәкшүрүшини тәшәбус қилған.

Баварийә парламентида әтигән саәт 10:00 дин 11:00 ғичә давам қилған бу ахбарат елан қилиш йиғиниға «илһам тохти гурупписи» ниң рәиси әнвәрҗан қатарлиқ мюнхенда яшайдиған бир бөлүк уйғурлар һәмдә мюнхендики һәр саһә мухбирлар қатнашқан.

Йиғинға иштирак қилған «илһам тохти гурупписи» ниң рәиси әнвәрҗан әпәндиму бу йиғин тоғрисида өзиниң тәсиратлирини ипадә қилип өтти. У йиғинда пикир баян қилип германийә һөкүмитидин хитай түрмисидики уйғур өктичи зиялийси илһам тохтини қутулдуруп чиқип, германийәгә елип келип орунлаштурушни тәләп қилған.

Мюнхендики җамаәт әрбаби нурәһмәт қарим бу ахбарат елан қилиш йиғининиң наһайити яхши өткүзүлгәнликини тәкитлиди. У сөзидә германийәдә туғулуп өскән шаһнурә қасим исимлик бир уйғур қизиниң хитайниң җаза лагеридики қериндашлири тоғрисида гуваһлиқ бәргәнликини әскәртти.

Пикирләр (0)
Share
Толуқ бәт