Ezimet enwerning 4 tutqun bilen birlikte süyüngde sotlan'ghanliqi we hemmisining 15 yilliqtin yuqiri késiwétilgenliki delillendi

Muxbirimiz shöhret hoshur
2020-06-16
Élxet
Pikir
Share
Print
Türkiyede oqup yurtigha qaytqanda tutqun qilinip, 15 yilliq qamaqqa höküm qilin'ghan ezimet enwer.
Türkiyede oqup yurtigha qaytqanda tutqun qilinip, 15 yilliq qamaqqa höküm qilin'ghan ezimet enwer.
Photo: RFA

Türkiyede oqup yurtigha qaytqan ezimet enwerning ehwalini b d t organliri sürüshte qiliwatqan bir mezgilde uning 15 yilliq qamaqqa késiwétilgenliki ötken hepte gheyriy-resmiy menbeler teripidin ashkarilan'ghan idi. Muxbirimizning bu heqte élip barghan éniqlashliri dawamida uning süyüngdiki bir türmide atalmish siyasiy xataliq ötküzgen 4 neper tutqun bilen bir künde sotlan'ghanliqi we besh tutqunning 15 yildin 18 yilghiche bolghan ariliqta késiwétilgenliki delillendi.

Türkiyede oqughanliqi üchün tutqun qilin'ghan ezimet enwerning süyüngdiki bir sotta 15 yilliq késiwétilgenliki ötken hepte ashkarilan'ghandin kéyin, uning chet'eldiki uruq-tughqanliri qaytidin heriketke ötti. Her xil tillarda bayanat élan qilghan uning firansiye, gérmaniye we shiwitsiyediki uruq-tughqanliri ezimet enwer hemde dadisi enwer tursunning gunahsiz ikenliki, ularning peqet milliy kimliki sewebidinla tutqun qilin'ghanliqini tekitlidi.

Ötken hepte alaqidar xadimlar ezimet enwer délosining dölet mexpiyetlikige yatidighanliqini isharet qilip, déloning xulasisi heqqide melumat bérishni ret qilin'ghandin kéyin, biz bu hepte yene bir qatar éniqlashlarni élip barduq. Téléfonimizni qobul qilghan yéngi hayat saqchixanisidiki xadimlar aldinqi ayda süyüngde échilghan bir sotta, yéngi hayat tewelikidin besh kishi sotlan'ghanliqi, shu besh kishidin birining ezimet enwer ikenlikini ashkarilidi. Xadimlardin biri ezimet enwerdin bashqa 4 mehkumning isimlirini ashkarilisa, yene bir xadim bularning töwini 15 yil, yuqirisi 18 yilliqtin késilgenlikini ashkarilidi. Yéngi hayat ahaliler komitétidikidiki bir xadim bularning délosining bir-biri bilen chétishliq emeslikini bayan qilsa, yene bir xadim bularning hemmisining "Qanunsiz" oqughanliqi seweblik sotlan'ghanlar ikenlikini tekitlidi.

2017‏-Yili türkiyediki oqushini tügitip yurti ghulja shehirige qaytqan ezimet enwer 2018‏-yili dadisi enwer tursun bilen 3 ay ilgiri-kéyin tutqun qilin'ghan idi. Ilgiriki éniqlashlirimiz dawamida ezimet enwerning "Dölet ma'aripini közge ilmasliq" eyiblimisi bilen tutulghanliqi ashkarilan'ghan idi. Ezimet enwerning chet'eldiki uruq-tughqanliri "Chet'ellikler üchün adalet" namliq bir adwokatlar shirkiti arqiliq bu yil 3‏-aylarda mesilini b d t organlirigha qeder yetküzgen idi.

Ötken hepte ziyaritimizni qobul qilghan mes'ul adwokat maykil polak, ezimet enwerning késiwétilgenliki rast bolghan teqdirde, uning bu déloni sürüshte qilishni yenila dawamlashturidighanliqini bildürgen idi. Bu xewerning mezkur délo b d t organliri teripidin del sürüshte qiliniwatqan mezgilide otturigha chiqqanliqini tekitligen maykil polak Uyghur weziyitining künséri yamanlishiwatqanliqini bayan qilip, Uyghur rayonida soda qiliwatqan chet'el shirketlirining rayondiki sodisidin waz kéchishi kéreklikini, undaq bolmighanda buning rayondiki adaletsizliklerni qolli'ighanliq bolidighanliqini eskertken idi.

Ezimet enwer 2017‏-yili Uyghur rayonida lagérgha keng kölemde adem tutush bashlan'ghanda qaytqan. Melum bolushiche, u ghulja shehiridiki ata-anisi we singlisini awarichilikke qoymasliq üchün, yene bir tereptin özi türkiyediki mezgilide xitaygha qarshi héchqandaq bir pa'aliyetke qatnashmighanliqi üchün köz aldidiki xeterge tewekkül qilghan. Emma uning türkiyede oqush bilenla bolghan we jimjit ötken birqanche yilliq hayati uning dadisi we apisining bixeterlikini kapaletke alalmighan. Uning apisi muqeddes xanim bir yil lagérda yétip chiqqan, dadisi enwer tursun yenila ghuljadiki bir qamaqxanida jaza hökümini kütüp yatmaqta.

Toluq bet