Әзимәт әнвәрниң 4 тутқун билән бирликтә сүйүңдә сотланғанлиқи вә һәммисиниң 15 йиллиқтин юқири кесиветилгәнлики дәлилләнди

Мухбиримиз шөһрәт һошур
2020-06-16
Елхәт
Пикир
Share
Принт
Түркийәдә оқуп юртиға қайтқанда тутқун қилинип, 15 йиллиқ қамаққа һөкүм қилинған әзимәт әнвәр.
Түркийәдә оқуп юртиға қайтқанда тутқун қилинип, 15 йиллиқ қамаққа һөкүм қилинған әзимәт әнвәр.
Photo: RFA

Түркийәдә оқуп юртиға қайтқан әзимәт әнвәрниң әһвалини б д т органлири сүрүштә қиливатқан бир мәзгилдә униң 15 йиллиқ қамаққа кесиветилгәнлики өткән һәптә ғәйрий-рәсмий мәнбәләр тәрипидин ашкариланған иди. Мухбиримизниң бу һәқтә елип барған ениқлашлири давамида униң сүйүңдики бир түрмидә аталмиш сиясий хаталиқ өткүзгән 4 нәпәр тутқун билән бир күндә сотланғанлиқи вә бәш тутқунниң 15 йилдин 18 йилғичә болған арилиқта кесиветилгәнлики дәлилләнди.

Түркийәдә оқуғанлиқи үчүн тутқун қилинған әзимәт әнвәрниң сүйүңдики бир сотта 15 йиллиқ кесиветилгәнлики өткән һәптә ашкариланғандин кейин, униң чәтәлдики уруқ-туғқанлири қайтидин һәрикәткә өтти. Һәр хил тилларда баянат елан қилған униң фирансийә, германийә вә шивитсийәдики уруқ-туғқанлири әзимәт әнвәр һәмдә дадиси әнвәр турсунниң гунаһсиз икәнлики, уларниң пәқәт миллий кимлики сәвәбидинла тутқун қилинғанлиқини тәкитлиди.

Өткән һәптә алақидар хадимлар әзимәт әнвәр делосиниң дөләт мәхпийәтликигә ятидиғанлиқини ишарәт қилип, делониң хуласиси һәққидә мәлумат беришни рәт қилинғандин кейин, биз бу һәптә йәнә бир қатар ениқлашларни елип бардуқ. Телефонимизни қобул қилған йеңи һаят сақчиханисидики хадимлар алдинқи айда сүйүңдә ечилған бир сотта, йеңи һаят тәвәликидин бәш киши сотланғанлиқи, шу бәш кишидин бириниң әзимәт әнвәр икәнликини ашкарилиди. Хадимлардин бири әзимәт әнвәрдин башқа 4 мәһкумниң исимлирини ашкарилиса, йәнә бир хадим буларниң төвини 15 йил, юқириси 18 йиллиқтин кесилгәнликини ашкарилиди. Йеңи һаят аһалиләр комитетидикидики бир хадим буларниң делосиниң бир-бири билән четишлиқ әмәсликини баян қилса, йәнә бир хадим буларниң һәммисиниң «қанунсиз» оқуғанлиқи сәвәблик сотланғанлар икәнликини тәкитлиди.

2017‏-Йили түркийәдики оқушини түгитип юрти ғулҗа шәһиригә қайтқан әзимәт әнвәр 2018‏-йили дадиси әнвәр турсун билән 3 ай илгири-кейин тутқун қилинған иди. Илгирики ениқлашлиримиз давамида әзимәт әнвәрниң «дөләт маарипини көзгә илмаслиқ» әйиблимиси билән тутулғанлиқи ашкариланған иди. Әзимәт әнвәрниң чәтәлдики уруқ-туғқанлири «чәтәлликләр үчүн адаләт» намлиқ бир адвокатлар ширкити арқилиқ бу йил 3‏-айларда мәсилини б д т органлириға қәдәр йәткүзгән иди.

Өткән һәптә зияритимизни қобул қилған мәсул адвокат майкил полак, әзимәт әнвәрниң кесиветилгәнлики раст болған тәқдирдә, униң бу делони сүрүштә қилишни йәнила давамлаштуридиғанлиқини билдүргән иди. Бу хәвәрниң мәзкур дело б д т органлири тәрипидин дәл сүрүштә қилиниватқан мәзгилидә оттуриға чиққанлиқини тәкитлигән майкил полак уйғур вәзийитиниң күнсери яманлишиватқанлиқини баян қилип, уйғур районида сода қиливатқан чәтәл ширкәтлириниң райондики содисидин ваз кечиши керәкликини, ундақ болмиғанда буниң райондики адаләтсизликләрни қоллииғанлиқ болидиғанлиқини әскәрткән иди.

Әзимәт әнвәр 2017‏-йили уйғур районида лагерға кәң көләмдә адәм тутуш башланғанда қайтқан. Мәлум болушичә, у ғулҗа шәһиридики ата-аниси вә сиңлисини аваричиликкә қоймаслиқ үчүн, йәнә бир тәрәптин өзи түркийәдики мәзгилидә хитайға қарши һечқандақ бир паалийәткә қатнашмиғанлиқи үчүн көз алдидики хәтәргә тәвәккүл қилған. Әмма униң түркийәдә оқуш биләнла болған вә җимҗит өткән бирқанчә йиллиқ һаяти униң дадиси вә аписиниң бихәтәрликини капаләткә алалмиған. Униң аписи муқәддәс ханим бир йил лагерда йетип чиққан, дадиси әнвәр турсун йәнила ғулҗадики бир қамақханида җаза һөкүмини күтүп ятмақта.

Пикирләр (0)
Share
Толуқ бәт