Qashtéshi sodigiri eli xoraz (abdulla) ning jemeti we ishchi-xizmetchiliridin 52 kishining qamaqta ikenliki aydinglashti

Muxbirimiz shöhret hoshur
2019-12-23
Élxet
Pikir
Share
Print
Qashtéshi sodigiri éli abdulla (éli xoraz). 2000-Yilliri, ürümchi.
Qashtéshi sodigiri éli abdulla (éli xoraz). 2000-Yilliri, ürümchi.
Photo: RFA

Radiyomiz qolgha chüshürgen xoten'ge a'it bir sot hökümnamiside qashtéshi sodigiri éli abdulla bilen birlikte uning 3 qérindishi we bir qéyni'inisiningmu 20 yilliqtin késilgenliki qeyt qilin'ghan idi. Muxbirimizning bu heqtiki éniqlashliri dawamida eli abdullaning uruq-tughqanliri bilen birlikte shirkitidiki ishchi-xizmetchilirini qatqanda jem'iy 48 kishining késilgenliki we 4 kishining lagérda ikenliki aydinglashti.

Buningdin yette ay ilgiri sabiq mehbus memettursun osmanni ziyaret qilghan waqtimizda u özining gumadiki qamaqxanidin xoten wilayetlik dölet xewpsizliki qamaqxanisigha yötkelgenliki we özining bu qamaqxanida ilgiri eli abdullaning délosigha chétishliq kishilerning yatqanliqidin xewer tapqanliqini bayan qilghan idi.

Qolimizgha chüshken sot hökümnamisidimu eli abdullaning muddetsiz késilginidin bashqa uning qérindashliridin‏ memtimin abdulla we ibrahim abdullaning 20 yilliqtin késilgenliki we bir milyon 150 ming yüen jerimane qoyulghanliqi, qéyni'inisi abliz islamningmu 20 yilliq késilgenliki qeyt qilin'ghan.

Tor arxipliridin saqlan'ghan mezkur shirket heqqidiki bir tonushturushta eli abdullaning inisi memtimin abdullaning shirketning qanuniy wekili ikenliki tilgha élin'ghan. Xotendiki bezi alaqidar xadimlar eli abdullaning qérindashlirining teqdiri heqqide éniq melumat bermigen bolsimu, emma ularning tutqunda ikenlikini inkar qilmidi.

Weziyettin xewerdar kishi "Shinjang qashtéshi öy-mülük shirkiti" ning ürümchi we xotende bolup, 500 din artuq kishini ish bilen teminligenliki, bulardin köpinchisining yurungqash deryasi boyida qash téshi kolash bilen shughullinidighanliqi, eli abdullaning tutulushi bilen uninggha yéqindin hemkarlashqan ish-xizmetchiliriningmu tutqun qilin'ghanliqini melum qilghan idi.

Mezkur shirket heqqidiki tonushturushta bu shirketning öy-zémin sodisidin bashqa yene qurulush matériyalliri, yaghach matériyallar, ximiye-sana'et mehsulatliri, besh xil métal, éléktr saymanliri, yéza-igilik mehsulatliri we toqumichiliq mehsulatliri qatarliq 23 sahede soda we mulazimet qilidighanliqi qeyt qilin'ghan. Téléfonimizni qobul qilghan ürümchi sheherlik soda-sana'et bashqurush idarisining bir xadimi mezkur shirket xizmetchilirining teqdiri heqqide gep qilishtin özlirini tartti.

Weziyettin xewerdar kishining bayan qilishiche, eli abdullaning iniliridin abdulehed abdulla we qéyin'iniliridin memtimin islamning késilgenlikini melum qilghan idi. Xoten wilayitidiki sot xadimliridin biri eli abdullaning muddetsiz késilgenlikini tilgha aldi, emma qérindashlirining qanche yil késimidin xewersizlikini éytti. Yene bir sot xadimi eli abdullaning uruq-tughqanliridin 13, shirkitidiki ishchi-xizmetchiliridin 35 kishining her xil muddette késilgenliki we shirket xizmetchiliridin 4 nepirining eli adbullagha munasiwet jehettiki yéqinliqi sewebidin nöwette "Terbiyelesh" te ikenlikini delillidi.

Qolimizdiki sot hökümide eli abdulla we qérindashlirining qanunsiz kan achqanliqi qatarliq 4 türlük jinayet bilen eyiblen'gen. Emma weziyettin xewerdar kishi eli abdulla we qérindashlirining tutulushigha ularning zor miqdarda pul tapqanliqi we xeyr-saxawet ishliri bilen shughullan'ghanliqining seweb bolghanliqini ilgiri sürgen. U yene eli abdullaning tekshürülüsh jeryanida xelq meydanigha salghan binasidiki milliy qiyapet seweblikmu soraqqa tartilghanliqini tilgha alghan idi. Xotendiki bir siyasiy-qanun kadiri yuqiriqi geplerning asassiz emeslikini isharetlidi. Yene jem'iyet paranglirida bir xitay shirkitining xotendin zémin sétiwalmaqchi bolghanliqi, da'irilerning bu zéminni taliship sétiwélish üchün bazargha salghanliqi, eslide xitay shirkiti 94 milyon'gha sétiwalmaqchi bolghan bu zéminning eli abdullaning örlitip baha qoyushi bilen 294 milyon'gha yükselgenliki, shuningdin kéyin xitay da'irilirining eli abdullaning bayliqini sürüshte qilishqa bashlighanliqi ilgiri sürülgen.

"Shinjang qashtéshi öy-mülük shirkiti" ge a'it tordiki matériyallardin eli abdullaning mezkur shirkitige 18.75% Din hesse qatqan ikki shériki barliqi, bulardin biri karxanichi tahirjan abla, yene biri bolsa ablet abla ikenliki melum. Emma ularning nöwettiki teqdiri, yeni eli abdulla bilen birlikte tutqunda'ikenliki yaki emesliki hazirche melum emes.

Toluq bet