«Әһмәдийә мусулман җәмийити» ниң йиллиқ йиғинида уйғур мәсилиси аңлитилди

Мухбиримиз сада
2019-08-05
Елхәт
Пикир
Share
Принт
Лондонда өткүзүлгән «әһмәдийә мусулман җәмийити» ниң йиллиқ йиғиниға қатнашқан уйғур вәкилләр. 2019-Йили 3-авғуст. Лондон, әнглийә.
Лондонда өткүзүлгән «әһмәдийә мусулман җәмийити» ниң йиллиқ йиғиниға қатнашқан уйғур вәкилләр. 2019-Йили 3-авғуст. Лондон, әнглийә.
RFA/Sada

Америка башчилиқидики ғәрб әллириниң уйғур мәсилисигә йеқиндин көңүл бөлүши нәтиҗисидә уйғур мәсилисиниң нөвәттә дуняви қизиқ нуқтиға айланғанлиқи мәлум болмақта. 8-Айниң 2-3-4-күнлири әнглийәдә өткүзүлгән «әһмәдийә мусулман җәмийити» ниң йиллиқ йиғинда уйғурлар мәсилисигә алаһидә орун берилиши дәл буниң ипадисидур.

Әнглийә пайтәхти лондонда өткүзүлгән мәзкур йиғинға дуняниң һәрқайси җайлиридин кәлгән 40 миңға йеқин мусулман җамаити қатнашқанлиқи мәлум. Бу йиғинға америка дөләт мәҗлисиниң хизмәтчи хадимлиридин сәккиз киши, шундақла америка, канада, германийә қатарлиқ дөләтләрдики уйғур паалийәтчилиридин тәшкилләнгән алтә кишилик бир һәйәтму қәдәм тәшрип қилған икән. Униңдин башқа мәзкур йиғинға йәнә әнглийә, голландийә, финландийә, бразилийә вә пакистан қатарлиқ 37 дөләттин кәлгән вәкилләр қатнашқан. 

Мәзкур йиғинға қатнашқан уйғур вәкилләр өмикидин дуня уйғур қурултийиниң рәиси долқун әйса әпәнди радийомиз зияритини қобул қилип, бу қетимқи «әһмәдийә мусулман җәмийити» ниң йиллиқ йиғини вә униң әһмийити һәққидә тәпсилий чүшәнчә бәрди. Униң дейишичә, «әһмәдийә мусулман җәмийити» гә охшаш пүтүн дуняда тәсир күчи зор болған тәшкилатниң йиғинида уйғур мәсилисиниң тилға елиниши, болупму мәзкур йиғинда нөвәттә уйғур диярида болуватқан еғир зулумлар вә җаза лагерлири мәсилисиниң дуняға аңлитилиши муһим әһмийәткә игә икән. 

«Әһмәдийә мусулманлар җәмийити» ниң бу қетимлиқ йиллиқ йиғиниға әнглийә һөкүмитидики нопузлуқ шәхсләрдин британийә ташқи ишлар вазаритиниң әнглийә иттипақи вә б д т да турушлуқ әмәлдари тариқ әхмәд, б д т баш катипиниң ярдәмчиси керәм хан қатарлиқлар қатнашқан болуп, уйғур вәкилләр өмики булар билән айрим-айрим учришиш елип берип, хитайни қоллап имза қойған 50 дөләткә қарши сәпәрвәрлик паалийити елип барған.

Америкадики «уйғур һәрикити» тәшкилатиниң директори рошән аббас ханимму радийомиз зияритини қобул қилип, юқириқи әрбаблар билән көрүшүш җәрянида уйғурлар һәққидә оттуриға қоюлған асаслиқ темиларни аңлатти вә буниңдин кейинки пиланлар һәққидә мәлумат бәрди. 

Әнглийәдә ечилған бу үч күнлүк йиғин җәрянида уйғур вәкилләр өмики билән бирликтә паалийәтләргә иштирак қилған әнглийә «уйғур җәмийити» ниң рәиси керәм заһир әпәндиму йиғинниң раваҗи һәққидә қисқичә тохталди. У сөзидә йиғинға иштирак қилған меһманларниң уйғур мәсилисигә зор қизиқишта болғанлиқини, мушундақ хәлқаралиқ тәшкилатлар вә һөкүмәт әрбаблири билән көпрәк һәмкарлашқанда уйғур мәсилисиниң яхши тәрәпкә қарап раваҗлиналайдиғанлиқиға көзи йәткәнликини ейтип өтти. 

«Әһмәдийә мусулманлар җәмийити» 1889-йили әнглийәдә қурулған. Кейинчә бу тәшкилат америкаға кеңәйгән болуп, тәхминән 1920-йиллириға кәлгәндә америкадики әң чоң мусулманлар тәшкилатиға айланған. 2014-Йили америка авам палатасида «әһмәдийә мусулманлар мунбири» қурулған вә америка кеңәш палатаси билән бирликтә дунядики кишилик һәқ-һоқуқлири һәм пуқралиқ һоқуқлири зиянкәшликкә учриған аз санлиқ милләтләрниң мәсилилирини һәл қилишқа тиришип кәлгән. Бу тәшкилатниң һазирға қәдәр пүтүн дунядики 200 дин артуқ дөләттә 20 милйондин артуқ әзалири бар икән.

Пикирләр (0)
Share
Толуқ бәт