D u q 6-nöwetlik ijra'iye yighinida yéngi pilanlirini qarar qildi

Ixtiyariy muxbirimiz erkin tarim
2020-06-09
Élxet
Pikir
Share
Print
Korona wirusi tüpeylidin sin körünüsh arqiliq chaqirilghan d u q ning ijra'iye komitéti yighinidin körünüsh. 2020-Yili 6-iyun.
Korona wirusi tüpeylidin sin körünüsh arqiliq chaqirilghan d u q ning ijra'iye komitéti yighinidin körünüsh. 2020-Yili 6-iyun.
RFA/Erkin Tarim

Dunya Uyghur qurultiyining nizamnamiside yilda ikki qétim ijra'iye komitéti yighini chaqirip, bu yighinlarda aldinqi yérim yilliq xizmetlerni xulase qilish bilen birge kélechek 6 ayliq xizmetlerning pilan-programmilirini muzakire qilish we bu heqte qararlar maqullash körsitilgen. Bu belgilimige asasen dunya Uyghur qurultiyining 6-nöwetlik ijra'iye komitéti yighinida ötken 6 ayliq xizmet xulasilinip aldimizdiki 6 ay ichide qilinidighan xizmetler muzakire qilinip békitildi.

Korona wirusi tüpeylidin sin körünüsh arqiliq chaqirilghan bu yighin'gha amérika, kanada, yaponiye, awstraliye, türkiye, qazaqistan, qirghizistan, en'gliye, shiwétsiye, shwéytsariye, norwégiye, gollandiye, gérmaniye qatarliq 10 din artuq dölettin 33 neper hey'et, d u q ning herqaysi döletlerdiki wekilliri we ishxana mudirliri qatnashti. 6-Iyun küni bérlin waqti chüshtin kéyin 2de bashlan'ghan yighinning échilish murasimigha qurultay ijra'iye komitétining re'isi ömer qanat ependi riyasetchilik qildi.

Dunya Uyghur qurultiyining (d u q) re'isi dolqun eysa ependi tunji bolup söz qilip, 2019-yili 12-aydin 2020-yili 6-ayghiche bolghan 6 ayliq xizmetler heqqide doklat berdi. U doklatida d u q ning qisqighine 6 ay ichide yawropa parlaménti, birleshken döletler teshkilati, amérika kéngesh palatasi bilen awam palatasi, türkiye, we bashqa ellerde élip barghan muhim xizmetlirini izahlap ötti. Yighin axirida dolqun eysa ependi ziyaritimizni qobul qilip, u, aldinqi 6 ayliq xizmetni xulasilep, ötken yili 12-ayda biryussélda échilghan 5-nöwetlik ijra'iye komitéti yighinida tüzgen xizmet pilanining mutleq köp qismining orundalghanliqini otturigha qoydi.

6-7-Iyun künliri ötküzülgen d u q ijra'iye komitétining 6-nöwetlik yighinida yene aldimizdiki 6 ayliq xizmet pilani maqullan'ghan. Dolqun eysa ependi buningda nuqtiliq halda d u q ning uzundin buyan birleshken döletler teshkilati bilen yawropa parlaméntida élip bériliwatqan xizmetlirini bundin kéyin qandaq dawamlashturush toghrisida muzakire qilin'ghanliqini otturigha qoydi.

D u q ijra'iye re'isi ömer qanat ependi kelgüsi 6-ayda nuqtiliq halda amérikada qobul qilin'ghan "Uyghur kishilik hoquq siyasiti qanun layihesi" ning toluq ijra qilinishi üchün küch chiqiripla qalmastin yéngi qanunlarni qobul qildurushqa tirishidighanliqini bayan qildi.

Dolqun eysa ependining éytishiche dunya Uyghur qurultiyi xelq'ara qanunlardin paydilinip pa'aliyet élip bérishqa alahide köngül bölmektiken. Ijra'iye komitétining yighinida bu heqtimu alahide muzakire élip bérilip pilan tüzülgen. Dolqun eysa ependi bu toghriliq melumat berdi.

D u q nizamnamiside körsitilishiche, 3 yilda bir qétim qurultay chaqirip, saylam élip bérilidighan bolup, buninggha asasen bu yil 11-ayda qurultay chaqirilishi kérek. Ijra'iye komitétining 6-nöwetlik yighinida bu heqtimu alahide muzakire élip bérilip, bu yil axirida chaqirilidighan qurultay üchün "Saylam komitéti" qurulghan. D u q re'isi dolqun eysa ependi bu toghriliq melumat berdi.

Biz d u q ning londondiki ishxanisining mudiri rehime mexmut xanim bu qétimqi yighinning muweppeqiyetlik ötkenlikini, buningdin kéyin xelq'ara sehnide élip bérilidighan pa'aliyetlerning nahayiti muhimliqini tekitlep mundaq dédi:

Igilishimizche, d u q 6-nöwetlik ijra'iye komitéti yighinida qurulghan "Saylam komitéti" hazirdin bashlap omumiy qurultayning teyyarliq xizmetlirige kirishidiken.

Toluq bet