D u q "Özgiriwatqan dunya we sherqiy türkistan" témisida ilmiy muhakime yighini ötküzmekchi

Ixtiyariy muxbirimiz erkin tarim
2020-05-13
Élxet
Pikir
Share
Print
 D u q ötküzmekchi bolghan "Özgiriwatqan dunya we sherqiy türkistan" témisida ilmiy muhakime yighinigha qatnishidighan mutexessislerning bir qismi.
D u q ötküzmekchi bolghan "Özgiriwatqan dunya we sherqiy türkistan" témisida ilmiy muhakime yighinigha qatnishidighan mutexessislerning bir qismi.
RFA/Erkin Tarim

Korona wirusi pütün dunyagha yamrap yüz minglighan kishining jénigha zamin bolupla qalmastin her qaysi döletlerning iqtisadigha éghir ziyan séliwatqan, herqaysi döletler otturisidiki munasiwetlergimu zor tesir körsitiwatqan peytte dunya Uyghur qurultiyi "Özgiriwatqan dunya we sherqiy türkistan" témisida ilmiy muhakime yighini ötküzmekchi. Tunji qétim sin arqiliq ötküzülidighan ilmiy muhakime yighinida amérika qoshma shtatliri, gérmaniye, firansiye we türkiye qatarliq 9 dölettin 21 pa'aliyetchi we mutexessis doklat bermekchi. Künde bir yérim sa'ettin 7 kün dawamlishidighan muhakime yighinida mutexessisler xitayning nöwettiki weziyiti we sherqiy türkistan, wuxendin dunyagha yéyilghan korona wirusi we Uyghurlarda saghlamliq mesilisi, amérika-xitay munasiwetlirining tereqqiyati we sherqiy türkistan, yawropa-xitay munasiwetliri we sherqiy türkistan, en'gliye, kanada we awstraliyening xitay bilen boluwatqan munasiwetliri we sherqiy türkistan, türk-islam dunyasi we sherqiy türkistan, sherqiy türkistan dewasida yashlar herikitining roli qatarliq bir témilarda doklat sunmaqchi.

Undaqta dunya Uyghur qurultiyining bundaq bir ilmiy muhakime yighini chaqirishidiki meqsiti néme? d u q re'isi dolqun eysa ependi bu heqtiki ziyaritimizni qobul qilip, korona wirusining dunyagha zor apet élip kelgen bundaq bir peytte döletler otturisidiki, bolupmu amérika bilen xitay, yawropa döletliri bilen xitay otturisidiki munasiwetning yéngidin tüs éliwatqanliqini, bundaq bir weziyetning Uyghur dewasigha qandaq tesir körsitidighanliqining Uyghurlar üchün intayin muhim ikenlikini chüshinish kéreklikini, shunga bu heqte muhakime élip bérish üchün mezkur yighinni uyushturghanliqini bildürdi.

D u q mu'awin re'isi, istratégiye mutexessisi doktor erkin ekremning éytishiche Uyghurlarning kéyinki 100 yilliq tarixigha nezer salidighan bolsa Uyghurlarning teqdirining xelq'ara tengpungluqlar bilen zich munasiwiti bar iken. Bolupmu kéyinki 70 yildin buyan chet'ellerde élip bérilghan Uyghur dewasi 2018-yili xelq'aralashqan. Doktor erkin ekrem Uyghurlar bundin kéyin néme qilish kérek? dégen mesilining muhim boluwatqanliqini, shunga mezkur widéyo muhakime yighinining témisini "Özgiriwatqan dunya we sherqiy türkistan" dep qoyghanliqini bayan qildi.

Doktor erkin ekrem ependi mezkur ilmiy muhakime yighinida muzakire qilinidighan témilar toghrisida melumat bérip, hazir Uyghur mesilisining amérika qoshma shtatlirining tashqi siyasiti, yawropa döletlirining qimmet qarishi, türk we islam döletlirining tashqi siyasetliri bilenmu munasiwetlik ikenlikini, shunga mezkur yighinda bu mezmunlarda tepsiliy doklatlar bérilidighanliqini otturigha qoydi.

Qimmetlik radi'o anglighuchilar d u q teripidin uyushturulghan "Özgiriwatqan dunya we sherqiy türkistan" mawzuluq ilmiy muhakime yighini 15-may jüme küni bérlin waqti sa'et 4 te bashlinidighan bolup, xalighan kishi tor arqiliq qatnishalaydiken. Yighinda mutexessisler Uyghur tilida doklat sunidiken. D u q mu'awin re'isi perhat yurungqash ependi xitay ana tilda ma'aripni emeldin qaldurup, Uyghur tilini yoq qilishqa tirishiwatqan bügünki künde mezkur yighinda peqetla Uyghur tilida doklat sunushni qarar qilghanliqini, shunga Uyghurche bilidighan chet'ellik mutexessislernimu teklip qilghanliqini tekitlidi.

"Özgiriwatqan dunya we sherqiy türkistan" mawzuluq ilmiy muhakime yighini 15-may künidin 21-may künigiche 7 kün ötküzülidighan bolup, bérlin waqti chüshtin kéyin sa'et 4te bashlinidiken. Mezkur yighinda her küni 3 kishi bir yérim sa'et doklat béridiken.

Toluq bet