Д у қ рәиси явропа иттипақида муһим йиғин вә учришишларда болди

Ихтиярий мухбиримиз әкрәм
2019-03-07
Елхәт
Пикир
Share
Принт
Д у қ рәиси долқун әйса әпәнди тәклипкә бинаән явропа иттипақиниң ташқи ишлар министирлиқида уйғур вәзийити тоғрисида доклат бәрмәктә. 2019-Йили 7-март, бирюссел, белгийә.
Д у қ рәиси долқун әйса әпәнди тәклипкә бинаән явропа иттипақиниң ташқи ишлар министирлиқида уйғур вәзийити тоғрисида доклат бәрмәктә. 2019-Йили 7-март, бирюссел, белгийә.
RFA/Ekrem

Дуня уйғур қурултийиниң рәиси долқун әйса явропа иттипақи ташқи ишлар министирлиқи билән явропа парламентида муһим паалийәтләрдә болди.

6-Март б д т дики паалийәтлиридин кейин белгийә пайтәхти бирюсселға йетип кәлгән д у қ рәиси долқун әйса әпәнди 7-март күни тәклипкә бинаән явропа иттипақиниң ташқи ишлар министирлиқида уюштурулған мәлумат елиш йиғиниға қатнишип, уйғур дияриниң нөвәттики җиддий вәзийити вә җаза лагерлири мәсилиси тоғрисида доклат тәқдим қилған.

Явропа иттипақи билән хитай оттурисида бу йил 4-айда өткүзүлидиған кишилик һоқуқ диялоги үчүн уйғур дияриниң һазирқи реял вәзийити, болупму җаза лагерлири тоғрисида әң йеңи мәлуматларға еришиш мәқситидә уюштурулған бу йиғинни явропа иттипақи ташқи ишлар министирлиқи тәшкиллигән. Йиғинға д у қ рәиси долқун әйса әпәнди, хәлқара кишилик һоқуқ мәркизи, вакаләтсиз милләтләр тәшкилати, хәлқара кишилик һоқуқни көзитиш тәшкилати, хәлқара кәчүрүм тәшкилати һәмдә дуня хиристиян һәмкарлиқ тәшкилатиниң рәһбәрлириму иштирак қилип, өзлири еришкән уйғур дияридики җаза лагерлириға аит дәлиллирини оттуриға қоюп өткән. Йиғинға явропа иттипақи ташқи ишлар министерлиқиниң асия ишлири комитети вә кишилик һоқуқ комитетиниң мәсуллири қатнашқан.

Бу қетимқи йепиқ йиғинда нуқтилиқ һалда уйғур дияриниң вәзийити вә җаза лагерлири мәсилиси музакирә қилинипла қалмай, бәлки йәнә хитайниң муһаҗирәттики кишилик һоқуқ паалийәтчилиригә зиянкәшлик қилиш мәсилилириму тилға елинған.

Долқун әйса әпәнди ташқи ишлар министирлиқида өткүзүлгән бу йиғинда хәлқара бесимниң артишиға қаримай хитайниң уйғурларни йоқитиш нийитидин ваз кәчмәйватқанлиқи, уйғур диярдики җаза лагерлири көлиминиң барғансери кеңийиватқанлиқи, йүз миңлиған уйғур тутқунларниң хитайниң ички өлкилиригә йөткиливатқанлиқи, уларниң орган әткәсчиликиниң қурбаниға айлинип кетиш еһтималлиқи барлиқи, явропа иттипақиниң бу мәсилигә җиддий муамилә қилиш лазимлиқини оттуриға қойған.

Шуниң билән биргә долқун әйса әпәнди йәнә җаза лагерлирида барғансери көпийиватқан өлүм-йетим һадисилири, из-дерәксиз ғайиб қиливетилиш һадисилириниң җиддий әндишә қозғаватқанлиқиниму алаһидә әскәртип өткән.

Явропа иттипақи йилда бир қетим өткүзидиған хитай билән болған кишилик һоқуқ диялоги башлиништин илгири явропа иттипақи ташқи ишлар министерлиқиниң васитиси билән һәр йили д у қ ни алаһидә тәклип қилип, уйғур дияриниң вәзийити тоғрисида мәлумат елип кәлмәктикән. Өткән йили 7-айда бейҗиңда өткүзүлгән кишилик һоқуқ диялоги йиғинида явропа иттипақи җаза лагерлири мәсилисини рәсмий рәвиштә оттуриға қойған. 8-Айда б д т да чақирилған ирқий айримичилиққа қарши туруш комитетиниң 96-нөвәтлик йиғинида явропа иттипақиға әза 14 дөләт җаза лагерлириниң тақилишини тәләп қилған. 2018-Йили 4-өктәбир күни йәнә явропа иттипақи җаза лагерлириға қарши 15 маддилиқ қарар қобул қилған иди.

7-Март чүштин кейин явропа парламентида «бейҗиңниң явропа иттипақиниң мәдәнийәт ишлириға болған хириси» намлиқ йиғин өткүзүлгән. Йиғинда парламент әзалири вә мутәхәссисләр доклатлар тәқдим қилишқан. Д у қ рәиси долқун әйса әпәнди тәклипкә бинаән сөз елип, хитай һакимийитиниң ички вә ташқи сиясәтлири тоғрида қарашлирини баян қилған.

Д у қ рәиси долқун әйса әпәнди 7-март күни юқириқи паалийәтләрни ахирлаштурғандин кейин явропа иттипақиниң бир қисим парламент әзалири билән айрим-айрим көрүшүп, 2017-йили 19-өктәбир явропа парламентида қурулған «уйғур достлуқ гурупписи» ниң көлимини кеңәйтиш мәсилисини музакирә қилған.

Пикирләр (0)
Share
Толуқ бәт