Д у қ ниң берлиндики иш беҗириш орниниң ечилиш мурасими өткүзүлди

Ихтиярий мухбиримиз әкрәм
2019-10-23
Елхәт
Пикир
Share
Принт
Д у қ ниң берлиндики иш беҗириш орниниң ечилиш мурасимидин көрүнүш. 2019-Йили 22-өктәбир, германийә.
Д у қ ниң берлиндики иш беҗириш орниниң ечилиш мурасимидин көрүнүш. 2019-Йили 22-өктәбир, германийә.
RFA/Ekrem

Д у қ уйғур дәвасини йәниму күчләндүрүш үчүн ғәрбтики сиясий мәркәзләрдә мәхсус ишхана тәсис қилмақта.

22-Өктәбир күни германийә пайтәхти берлинда д у қ тәрипидин тәсис қилинған иш беҗириш оргининиң қурулуш мурасими өткүзүлгән. Мурасимға германийә парламентиниң бәзи әзалири, тибәт, тәйвән вәкиллири һәмдә германийәдики бир қисим кишилик һоқуқ тәшкилатлириниң рәһбәрлири, уйғур тәшкилатлириниң мәсуллири вә җамаәт әрбаблири қатнашқан.

Д у қ рәиси долқун әйса әпәнди ечилиш мурасимида қилған сөзидә, «хитай һакимийитиниң шәрқий түркистанда елип бериватқан етник қирғинчилиқлири тоғрисида тәпсилий мәлумат бериш билән биргә, уйғурларниң нөвәттики еғир дәрд-әләмлирини явропа иттипақиниң паравози болған германийә вә бу арқилиқ пүтүн явропаға йәниму илгирилигән һалда аңлитиш йүзисидин д у қ ниң пайтәхт берлинда бир ишхана тәсис қилиш қарариға кәлгән» ликини илгири сүргән.

Бу мурасимда германийә парламентиниң әзаси, уйғурларниң йеқин дости маргарета бавзе ханимму нутуқ сөзлигән. У сөзидә, д у қ ниң берлинда мәхсус бир ишхана тәсис қилғанлиқини қизғин тәбрикләш билән биргә, уйғур дияридики зулумлар шу қәдәр әвҗигә чиққан турғулуқму явропадики һөкүмәтләр вә мәтбуатларниң йетәрлик дәриҗидә зуван сүрмәйватқанлиқини қаттиқ тәнқидлигән.

Д у қ диний ишлар комитетиниң мудири, шәрқий түркистан өлималар бирликиниң рәиси турғунҗан алавуден әпәнди бу һәқтә тохтилип, маргарета бавзе қатарлиқ парламент әзалири вә тәйвәнниң явропадики әлчиси һәмдә кишилик һоқуқ органлириниң мәсуллириниң бу мурасимда муһим нутуқлар сөзлигәнликини тәкитлиди.

Берлиндин зияритимизни қобул қилған уйғур җамаәт әрбаби аблимит турсун әпәнди бу мурасим һәққидә тохталғанда, «уйғур миллий дәвасиниң җиддий еһтияҗи, шәрқий түркистандики хәтәрлик вәзийәтниң тәқәззаси түпәйли явропадики сиясий мәркәзләрдә ишхана тәсис қилишниң муһим әһмийәткә игә» икәнликини тилға алди.

Д у қ фондиниң рәиси абдуҗелил әмәт әпәнди бу қетимқи мурасимға германийәдики һәрқайси партийәләр вә кишилик һоқуқ органлириниң муһим әрбаблиридин 45 әтрапида киши қатнашқанлиқини әскәртти.

Д у қ ниң берлиндики ишханисиға стефан исимлик бир яш герман зиялийси хизмәткә орунлаштурулған болуп, у д у қ билән германийә парламенти вә һөкүмити оттурисида көврүклүк рол ойнайдикән.

У берлиндин зияритимизни қобул қилип, уйғур дәвасини германийә һөкүмити вә хәлқигә йәниму илгириләп аңлитишниң ялғуз хизмәт мәҗбурийити болупла қалмастин, өзиниң бир кишилик инсаний мәҗбурийити болғанлиқини баян қилди.

У сөзидә йәнә, 22-өктәбир күни өткүзүлгән мурасимда бәзи парламент әзалири вә кишилик һоқуқ тәшкилатлириниң рәһбәрлири билән тонушуш пурситигә еришкәнликини, улар билән бундин кейин йеқиндин һәмкарлишип хизмәт қилидиғанлиқини тилға алди.

Д у қ бу йил 7-айларда әнглийә пайтәхти лондондиму ишхана тәсис қилған болуп, алдимиздики айларда йәнә фирансийә пайтәхти париж вә америкиниң ню-йорк шәһиридиму мәхсус ишхана тәсис қилишни әмәлгә ашурушқа теришидикән.

Пикирләр (0)
Share
Толуқ бәт