Долқун әйса американиң германийәдики баш әлчиси ричард гренел билән көрүшти

Ихтиярий мухбиримиз әкрәм
2019-07-04
Елхәт
Пикир
Share
Принт
Д у қ ниң рәиси долқун әйса әпәнди американиң германийәдики баш әлчиси ричард гренел әпәнди билән айрим көрүшти. 2019-Йили 3-июл, берлин, германийә.
Д у қ ниң рәиси долқун әйса әпәнди американиң германийәдики баш әлчиси ричард гренел әпәнди билән айрим көрүшти. 2019-Йили 3-июл, берлин, германийә.
RFA/Ekrem

Дуня уйғур қурултийиниң рәиси долқун әйса әпәнди берлинда американиң германийәдики баш әлчиси ричард гренел әпәнди билән айрим көрүшүп, сөһбәт елип барди.

Американиң германийәдики әлчиханисиниң тәклипи билән 3-июл күни д у қ рәиси долқун әйса пайтәхт берлинға берип, баш әлчи ричард гренел әпәнди билән бир саәткә йеқин сөһбәт елип барған.

Сөһбәт муқәддимисидә долқун әйса әпәнди америка баш әлчисигә уйғур дияриниң нөвәттики вәзийити вә нуқтилиқ һалда җаза лагерлири мәсилиси шундақла д у қ тоғрисида мәлумат бәргән. Баш әлчи сөзидә уйғурлар мәсилисиниң өзигә натонуш әмәсликини, уйғурларниң омумий вәзийитини йеқиндин көзитип келиватқанлиқини, җаза лагерлири мәсилисидә өзиниң қолидин келишичә һәрикәттә болидиғанлиқини ипадә қилған.

Долқун әйса бу сөһбәттә шәрқий түркистанда җаза лагерлири мәсилиси оттуриға чиққандин кейин америка һөкүмитиниң бу мәсилигә җиддий муамилә қилип кәлгәнликини, хитайниң җаза лагерлириға қарши актип паалийәттә болуватқан америка рәһбәрлиригә өзиниң д у қ вә шәрқий түркистан хәлқи намидин рәһмәт ейтидиғанлиқини билдүргән.

У сөзидә йәнә америка һөкүмити вә рәһбәрлириниң уйғурларға болған һесдашлиқи һәм җаза лагерлириға қарши муамилисиниң ялғуз еғиз һәрикити биләнла чәклинип қалмай хитайни җазалайдиған әмәлий тәдбирләргә мураҗиәт қилишини шундақла америка авам палатасиға сунулған уйғурларға мунасивәтлик қанунларни америка һөкүмитиниң бир күн болсиму балдуррақ мақуллишини үмид қилидиғанлиқини оттуриға қойған. Баш әлчи ричард әпәнди болса уйғурлар мәсилисиниң американиң ташқи сияситидин орун алғанлиқини, америка һөкүмитиниң уйғурларниң вәзийитини давамлиқ йеқиндин көзитип туридиғанлиқини тәкитлигән.

Долқун әйса әпәндиниң билдүрүшичә, җаза лагерлири мәсилисини б д т ниң кишилик һоқуқ кеңишидин һалқитип б д т хәвпсизлик кеңишигә көтүрүп чиқиш д у қ ниң нөвәттики муһим, бирақ әмәлгә ашуруши қийин пиланлиридин бири икән. Әмма униң тәкитлишичә бу пилан әмәлгә ашқан. Бу қетимқи америка әлчиханисида елип берилған сөһбәттә америка баш әлчиси ричард әпәнди «7-айниң 2-күни б д т хәвпсизлик кеңиши йиғинида америка билән германийәниң бирлишип җаза лагерлирини дәрһал тақаш тоғрисида хитайға қаттиқ бесим ишләткәнлики» ни ашкарилиған.

Сөһбәт хатимисидә баш әлчи ричард әпәнди өзиниң җаза лагерлири мәсилисидә германийәниң мунасивәтлик органлири билән изчил көрүшүп туруватқанлиқини, улар билән һәмкарлишип уйғурлар вәзийитигә көңүл бөлүшниң өзиниң инсаний бурчи икәнликини әскәрткән.

7-Айниң 4-күни америка мустәқиллиқиниң 243-йиллиқ хатирә күни болуп, германийә пайтәхти берлиндики америка әлчиханисиму бу күнни чоң мурасим билән хатириләйдикән. Мурасимға һәрқайси дөләтләрниң әлчилири, дипломатлар, дөләт әрбаблири қатнишидикән. Д у қ рәиси долқун әйса әпәндиму уйғурларға вакалитән бу мурасимға алаһидә тәклип қилинған. У бүгүн өткүзүлидиған бу мурасимда көплигән дөләтләрниң әлчилиригә уйғурлар мәсилисини тонутуш пурситигә еришидикән.

Пикирләр (0)
Share
Толуқ бәт