Dolqun eysa b d t ning yerlik milletler mesilisi munbiride Uyghurlar mesilisini otturigha qoydi

Muxbirimiz sada
2019-05-01
Élxet
Pikir
Share
Print
Dolqun eysa b d t ning yerlik milletler mesilisi munbiride Uyghurlar mesilisini otturigha qoymaqta. 2-19-Yili 1-may. Nyuyork, amérika.
Dolqun eysa b d t ning yerlik milletler mesilisi munbiride Uyghurlar mesilisini otturigha qoymaqta. 2-19-Yili 1-may. Nyuyork, amérika.
RFA/Sada

 

Her yili bir qétimdin échilidighan b d t ning yerlik milletler mesilisi munbiri yighini bu yil 23-aprél birleshken döletler teshkilatining nyu-yorktiki bash shtabida échildi. Mezkur yighin 5-ayning 3-künigiche dawam qilidighan bolup, dolqun eysa ependi "Tehdit astidiki xelqler teshkilati" gha wekil bolup qatnashti. U bügün radiyomiz ziyaritini qobul qilip, yighinning rawaji heqqidiki so'allirimizgha jawab berdi.


U mezkur munberde muzakire qilinidighan asasliq téma heqqide qisqiche chüshenche berdi. Uning déyishiche, dunyaning herqaysi jayliridiki tupriqi mustemlikige uchrighan milletlerning heq-hoquqi we shuninggha qarita élinidighan tedbirler muhim muzakire témisi bolghan iken. 

Yighinda dolqun eysa ependi Uyghur diyaridiki Uyghur, qazaq we bashqa yerlik milletlerning nöwette uchrawatqan insaniy xorluqliri, til we medeniyet cheklimiliri, xitayning jaza lagérlirigha qamalghan ikki milyondin artuq bigunah insanning chékiwatqan azabliri heqqide söz qilghan shundaqla xelq'ara jem'iyettin Uyghurlarning ehwaligha jiddiy mu'amile qilishni we jaza lagérlirining taqilishi heqqide xitay hökümitige bésim ishlitishini telep qilghan. 

Melum bolushiche, dolqun eysa ependi Uyghur mesilisini anglitiwatqinida b d t diki xitay déplomatliri uni "Térrorchi" dégen nam bilen uning sözlirige reddiye bergen we söz erkinlikige ashkara hujum qilghan. 

Ziyaret dawamida dolqun eysa ependi mezkur yighinda herqaysi dölet wekillirining Uyghurlar mesilisige téximu qiziqqanliqini bildürgech, bu munberning kelgüside Uyghurlarning mesilisini küntertipke keltürüshi, xelq'arada ghulghula qozghishi we herqaysi döletlerning bu mesilige köngül bölüshi qatarliq jehetlerdin oynaydighan rolining intayin chong bolidighanliqini bildürdi. 

Birleshken döletler teshkilatining yerlik milletler mesilisi munbiri iqtisadiy we ijtima'iy kéngeshning yuqiri derijilik meslihetchiler orgini bolup, 2000-yili 7-ayning 28-küni qurulghan. Mezkur munber yerlik milletler mesilisige chétishliq iqtisad we ijtima'iy tereqqiyat, medeniyet, muhit, ma'arip, sehiye we kishilik hoquq qatarliqlarni asasliq kéngishish nishani qilghan iken.

Toluq bet