Долқун әйса б д т ниң йәрлик милләтләр мәсилиси мунбиридә уйғурлар мәсилисини оттуриға қойди

Мухбиримиз сада
2019-05-01
Елхәт
Пикир
Share
Принт
Долқун әйса б д т ниң йәрлик милләтләр мәсилиси мунбиридә уйғурлар мәсилисини оттуриға қоймақта. 2-19-Йили 1-май. Нюйорк, америка.
Долқун әйса б д т ниң йәрлик милләтләр мәсилиси мунбиридә уйғурлар мәсилисини оттуриға қоймақта. 2-19-Йили 1-май. Нюйорк, америка.
RFA/Sada

 

Һәр йили бир қетимдин ечилидиған б д т ниң йәрлик милләтләр мәсилиси мунбири йиғини бу йил 23-апрел бирләшкән дөләтләр тәшкилатиниң ню-йорктики баш штабида ечилди. Мәзкур йиғин 5-айниң 3-күнигичә давам қилидиған болуп, долқун әйса әпәнди «тәһдит астидики хәлқләр тәшкилати» ға вәкил болуп қатнашти. У бүгүн радийомиз зияритини қобул қилип, йиғинниң раваҗи һәққидики соаллиримизға җаваб бәрди.


У мәзкур мунбәрдә музакирә қилинидиған асаслиқ тема һәққидә қисқичә чүшәнчә бәрди. Униң дейишичә, дуняниң һәрқайси җайлиридики туприқи мустәмликигә учриған милләтләрниң һәқ-һоқуқи вә шуниңға қарита елинидиған тәдбирләр муһим музакирә темиси болған икән. 

Йиғинда долқун әйса әпәнди уйғур дияридики уйғур, қазақ вә башқа йәрлик милләтләрниң нөвәттә учраватқан инсаний хорлуқлири, тил вә мәдәнийәт чәклимилири, хитайниң җаза лагерлириға қамалған икки милйондин артуқ бигунаһ инсанниң чекиватқан азаблири һәққидә сөз қилған шундақла хәлқара җәмийәттин уйғурларниң әһвалиға җиддий муамилә қилишни вә җаза лагерлириниң тақилиши һәққидә хитай һөкүмитигә бесим ишлитишини тәләп қилған. 

Мәлум болушичә, долқун әйса әпәнди уйғур мәсилисини аңлитиватқинида б д т дики хитай депломатлири уни «террорчи» дегән нам билән униң сөзлиригә рәддийә бәргән вә сөз әркинликигә ашкара һуҗум қилған. 

Зиярәт давамида долқун әйса әпәнди мәзкур йиғинда һәрқайси дөләт вәкиллириниң уйғурлар мәсилисигә техиму қизиққанлиқини билдүргәч, бу мунбәрниң кәлгүсидә уйғурларниң мәсилисини күнтәртипкә кәлтүрүши, хәлқарада ғулғула қозғиши вә һәрқайси дөләтләрниң бу мәсилигә көңүл бөлүши қатарлиқ җәһәтләрдин ойнайдиған ролиниң интайин чоң болидиғанлиқини билдүрди. 

Бирләшкән дөләтләр тәшкилатиниң йәрлик милләтләр мәсилиси мунбири иқтисадий вә иҗтимаий кеңәшниң юқири дәриҗилик мәслиһәтчиләр оргини болуп, 2000-йили 7-айниң 28-күни қурулған. Мәзкур мунбәр йәрлик милләтләр мәсилисигә четишлиқ иқтисад вә иҗтимаий тәрәққият, мәдәнийәт, муһит, маарип, сәһийә вә кишилик һоқуқ қатарлиқларни асаслиқ кеңишиш нишани қилған икән.

Пикирләр (0)
Share
Толуқ бәт