Д у қ рәиси долқун әйсаниң канадаға елип бериватқан 15 күнлүк зиярити давамлашмақта

Ихтиярий мухбиримиз әркин тарим
2019-03-27
Елхәт
Пикир
Share
Принт
Д у қ рәиси долқун әйса әпәнди канада уйғур җамисиниң ечилиш мурасимида. 2019-Йили март. Канада.
Д у қ рәиси долқун әйса әпәнди канада уйғур җамисиниң ечилиш мурасимида. 2019-Йили март. Канада.
RFA/Erkin Tarim

Д у қ рәиси долқун әйса әпәнди канаданиң һәр қайси җайлирида туруватқан шәрқий түркистан аммиви тәшкилатлири вә уйғурлар билән учришиш елип бериш, канада һөкүмити билән парламент әзалириға рәһмәт ейтиш вә уйғурларниң бәзи тәләплирини уларға йәткүзүш, канададики университет, тәтқиқат мәркәзлири һәм аммиви тәшкилатларда доклат бериш мәқситидә канадада бир йүрүш паалийәт елип бармақта. Бу қетимқи бу зиярити тоғрисида техиму тәпсилий мәлумат игиләш үчүн д у қ рәиси долқун әйса әпәнди билән телефон сөһбити елип бардуқ. У бу һәқтә тохталди.

Д у қ рәиси долқун әйсаниң канадаға елип бериватқан зиярити 15 күн давамлишидиған болуп, 22-март күни канаданиң торонто шәһиригә йетип кәлгән долқун әйса әпәнди 23-март күни уйғурлар билән бирликтә норуз паалийитигә иштирак қилған. Канада шәрқий түркистан тәшкилатлар бирликиниң рәиси туйғун абдувәли әпәнди бу һәқтә мәлумат бәрди. 

Долқун әйса әпәнди шу күни ахшам оқуш вә хизмәтлиридә мувәппәқийәт қазанған оқуғучи вә оқутқучиларға медал тарқитип бәргән. Туйғун абдувәли әпәнди бу һәқтә тохталди. 

Долқун әйса әпәнди 26-март күни монтреал конкордиа университетидики ирқий қирғинчилиқниң алдини елиш вә инсан һәқлири тәтқиқат мәркизидә доклат бәргән болуп, доклатида нуқтилиқ һалда уйғурларниң һазирқи еғир вәзийити тоғрисида тохталған. Д у қ рәиси долқун әйса әпәнди бу һәқтиму тохталди.

Канада уйғур мәсилисини бирләшкән дөләтләр тәшкилати вә канада парламентида оттуриға қойған иди. Өткән йили 10-айдин 12-айғичә болған қисқиғина вақит ичидә канада парламентида 6 қетим гуваһлиқ бериш паалийити өткүзүлгән. Бундақ бир вәзийәттә д у қ рәиси долқун әйса әпәндиниң канадаға зиярәт елип беришиниң әһмийити немә? д у қ муһаҗирлар комитети мудири мәмәт тохти бундақ бир вәзийәттә елип берилған мәзкур зиярәтниң зор әһмийәткә игә икәнликини тәкитлиди.

Мәмәт тохти әпәндиниң ейтишичә, долқун әйса әпәнди икки күндин буян муһим гезитләрниң мухбирлири, аммиви тәшкилат мәсуллири биләнму учришиш елип барған болуп, униң бу хил учришишлири 4-айниң 2-күнигичә давамлишидикән. Мәмәт тохти әпәнди бу һәқтә тәпсилий мәлумат бәрди. 

Д у қ рәисиниң канада зиярити 4-айниң 5-күнигә қәдәр давамлишидикән. Бу җәрянда у канаданиң бәзи муһим сиясий әрбаблири билән айрим-айрим учришишлар елип баридикән вә мәркизи канадада болған кишилик һоқуқ тәшкилатлири билән җаза лагерлириға қарши 2019-йили бирликтә елип баридиған паалийәтлириниң күнтәртипини ортақ музакирә қилидикән.

Пикирләр (0)
Share
Толуқ бәт