Irade qeshqerining b d t diki yighinida qilghan Uyghur weziyiti heqqidiki sözliri xitay wekilini bi'aram qildi

Muxbirimiz méhriban
2019-04-10
Élxet
Pikir
Share
Print
Birleshken döletler teshkilatining nyu-yorktiki merkizide ötküzülgen  "2030-Yili yashlar" témisidiki yighin'gha amérikadin wiriginiye ana til mektipi qurghuchisi irade qeshqeri nöwettiki Uyghur weziyiti heqqide doklat bermekte. 2019-Yili 8-aprél, nyu-york.
Birleshken döletler teshkilatining nyu-yorktiki merkizide ötküzülgen "2030-Yili yashlar" témisidiki yighin'gha amérikadin wiriginiye ana til mektipi qurghuchisi irade qeshqeri nöwettiki Uyghur weziyiti heqqide doklat bermekte. 2019-Yili 8-aprél, nyu-york.
Photo: RFA

8-9-Aprél künliri birleshken döletler teshkilatining nyu-yorktiki merkizide b d t yashlar munbirining "2030-Yili yashlar" témisida yighini échildi.

8-Aprél künidiki yighinda amérikadiki wiriginiye ana til mektipi qurghuchisi, Uyghur qizi irade qeshqerining nöwettiki Uyghur weziyiti heqqide bergen doklati yighin ehlining qiziqishini qozghighan. Emma iradening sözliri yighindiki xitay wekillirini bi'aram qilghan. Iradening doklatidin kéyin yighindiki xitay wekili alahide söz nöwiti élip, xitay hökümitining Uyghur siyasitini aqlap izahat bergen.

8-Aprél küni birleshken döletler teshkilatining nyu-yorktiki merkizide bashlan'ghan "2030-Yili yashlar" témisidiki yighin'gha amérikadin wiriginiye ana til mektipi qurghuchisi irade qeshqerimu qatnashqan we uning yighinda Uyghurlar we Uyghur yash-ösmürlirining xitay ichi-sirtidiki weziyiti heqqide bergen doklati twitér, feysbok qatarliq ijtima'iy taratqularda tarqilip, inkas qozghimaqta.

Mezkur yighin'gha qatnishiwatqan irade qeshqiri 9-aprél künidiki yighinning dem élish ariliqida radiyomiz ziyaritini qobul qildi.

Iradening bildürüshiche, u doklatida Uyghurlarning nöwette duch kéliwatqan mesililiri, qiyinchiliqlar, bolupmu xitay hökümitining Uyghurlargha yürgüzgen assimilyatsiye we basturush siyasiti seweblik Uyghur yash-ösmürliri we balilarning mejburiy halda ata-anisidin ayrilish, ana tili we medeniyitidin waz kéchishke mejburlinishi qatarliq mesililerni otturigha qoyghanda, uning sözliri yighin qatnashquchilirini qiziqturghan. Iradening doklatidin kéyin bir qisim yighin qatnashquchiliri iradedin Uyghur mesilisige a'it ehwallarni sorighan.

Iradening bildürüshiche, uning Uyghur weziyiti heqqidiki doklatidin kéyin xitay dölitige wakaliten yighin'gha qatnashqan xitay wekili intayin bi'aram bolghan. Iradening bildürüshiche, uningdin kéyin sözligen birqanche yashning doklati axirlashqandin kéyin xitay wekilliridin biri söz nöwiti élip, xitay hökümitining Uyghur siyasitini medhiyeligen.

Iradening radiyomizgha yollighan uchurida déyilishiche, xitay wekili sözide xitay hökümitining Uyghur siyasitini aqlap, "Hökümitimiz hemme kishining asasi hoquqini qoghdap kéliwatidu. Diniy erkinlik hoquqi toluq kapaletke ige we qoghdiliwatidu, biz hökümetsiz teshkilat wekilining xitay dölitige qaratqan asassiz we orunsiz eyiblishige diqqet qilduq we buni ret qilimiz", dégen sözlerni qilghan. Mezkur xitay wekili yene yighin bashqurghuchini yighinda sözligüchilerni asasiy témidin chetnep ketmeslikke agahlandurup turushni telep qilghan.

Melum bolushiche, 8-aprél birleshken döletler teshkilatining nyu-yorktiki merkizide bashlan'ghan yighin 8-9-aprél ikki kün dawamlishidighan bolup, bu yighin dunyaning herqaysi jayliridiki yashlarning xizmetlirini qollash, yashlargha ilham bérish, yashlarning barawerlikini qolgha keltürüsh qatarliq mesililerni téma qilghan iken. Yighin'gha dunyaning her qaysi jayliridin kelgen yashlar teshkilatliri wekilliri, ministirlar we közge körün'gen yashlar qatnashqan bolup, ular sözliride nöwette yashlar duch kéliwatqan türlük mesililer we qiyinchiliqlarni anglitishni muhim nuqta qilghan.

Yuqiriqi awaz ulinishidin söhbetning tepsilatini anglaysiler.

Toluq bet