Әзәрбәйҗан пайтәхти бакудики хитай әлчиханиси алдида наразилиқ намайиши өткүзүлди

Ихтияри мухбиримиз әркин тарим
2019-12-26
Елхәт
Пикир
Share
Принт
ясемин қоюнҗу ханим башчилиқидики бир гуруппа әзәрбәйҗанлиқлар хитайниң бакудики әлчиханиси алдида наразилиқ намайиши өткүзди. 2019-Йили 24-декабир
Ясемин қоюнҗу ханим башчилиқидики бир гуруппа әзәрбәйҗанлиқлар хитайниң бакудики әлчиханиси алдида наразилиқ намайиши өткүзди. 2019-Йили 24-декабир
RFA/Erkin Tarim

Дуняниң һәр қайси җайлирида уйғурларни қоллап хитайға қарши наразилиқ намайишлири арқа-арқидин өткүзүлмәктә. 24-Декабир күни әзәрбәйҗан илимләр академийәсиниң мутәхәссиси ясемин қоюнҗу ханим башчилиқидики бир гуруппа әзәрбәйҗанлиқлархитайниң бакудики әлчиханиси алдида наразилиқ намайиши өткүзди.

Улар бакудики хитай әлчиханиси алдиға қара гүл қоюп, шәрқий түркистанниң ай-юлтузлуқ көк байриқини егиз көтүрүп, хитайниң нөвәттә уйғурларға йүргүзиватқан зулумлириға наразилиқ билдүргән. Биз намайиш тоғрисида техиму тәпсилий мәлумат игиләш үчүн намайишни уюштурған доктор ясемин қоюнҗу ханим билән телефон сөһбити елип бардуқ.

У 24-декабир күни хитайниң әзәрбәйҗандики әлчиханиси алдида намайиш өткүзүшниң мәқсити һәққидә тохтилип, мундақ деди: «биз хитайниң уйғурларға елип бериватқан ирқий қирғинчилиқиға наразилиқ билдүрүш үчүн намайиш қилдуқ. Әзәрбәйҗанда һазир шәһәр башлиқлири сайлими өткүзүливатиду. Йеқинда парламент әзалириниң сайлими бар.  Вәзийәт бәкла җиддий. Биз қилған намайиш әмәлийәттә әзәрбәйҗандики һәммә хәлқниң чин қәлбидин урғуп ғиққан наразилиқи иди, чүнки намайиштин кейин нурғун кишиләр маңа телефон қилип рәһмәт ейитти. Һәтта нурғун киши намайишқа қатнишишни халайдиғанлиқини ейтишти.»

Ясемин қоюнчу ханим йеңи йилдин кейин әзәрбәйҗанда уйғурлар тоғрисида һәр хил паалийәтләрни уюштурушни ойлаватқанлиқини баян қилип, мундақ деди: «йеңи йил байрими ахирлашқандин кейин әзәрбәйҗанда шәрқий түркистан тоғрисида доклат бериш йиғинлири чақиришни ойлаватимиз. Пүтүн партийәләр, ахбарат органлирини чақирип йиғинлар өткүзүшни пиланлаватимиз. Сабиқ совет иттипақи мәзгилидә миллий һессиятимиз вә қәдирийитимиз өлтүрүлгән иди. Һазир миллий ғуруримиз күчәйди. Уйғурларниңму әзәрбәйҗанлиқлар билән бир қатарда түрк дунясиниң бир парчиси икәнликини кишиләр тонуп йәтти. Шуңа бундин кейин әзәрбәйҗанда уйғурларға болған қизиқиш техиму күчийиду, дәп ойлаймән.»

Қиммәтлик радийо аңлиғучилар, әзәрбәйҗан бир  түркий җумһурийәт болуп, йеқиндин буян әзәрбәйҗан ахбаратлиридиму өзлириниң уйғурлар билән қериндаш милләт икәнлики баян қилинған мақалиләр көпәймәктә. Ундақта, йеқин кәлгүсидә әзәрбәйҗан һөкүмитиму уйғурларға игә чиқип, хитайниң бесим сияситини әйибләйдиған баянатларни елан қиларму?

Ясемин қоюнлу ханим әзәрбәйҗан һөкүмитиниң пат йеқинда хитайға қарши баянат беридиғанлиқиға ишәнмәйдиғанлиқини, лекин һазир әзәрбәйҗан хәлқи уйғурларни қоллап паалийәт өткүзсә тосмайватқанлиқини баян қилип, мундақ деди: «уйғур мәсилиси йеқинда әзәрбәйҗан парламентида күнтәртипкә келәмду-йоқ, буни билмәймән. Бу җәһәттин һөкүмәткә ишәнмәймән. Лекин шуни дәп қоймақчимәнки, һәр қайсий партийәләр, аммивий тәшкилатлар вә ахбарат органлири уйғур мәсилиси тоғрисида паалийәт өткүзсә һазир әзәрбәйҗан һөкүмити тосмайватиду. Биз хитай әлчиханисиниң алдида намайиш қилғанда бизниму тосмиди.»

Игилинишичә, бурун әзәрбәйҗандики бәзи яшлар хитай әлчиханиси алдида намайиш өткүзгән иди. Әмма зиялилар вә билим адәмлири уйғурлар һәққидә намайиш өткүзүп бақмиған иди. Бу қетимқиси әзәрбәйҗан зиялийлириниң уйғурларни қоллап өткүзәән тунҗи намайиши икән.

Пикирләр (0)
Share
Толуқ бәт