Amérikida "Ana til küni" alahide xatirilendi

Muxbirimiz jüme
2020-02-23
Élxet
Pikir
Share
Print
21- Féwral amérikida xatirilen'gen "Ana til küni" din bir körünüsh. 2020-Yili 21-féwral. Feyirfeks, amérika.
21- Féwral amérikida xatirilen'gen "Ana til küni" din bir körünüsh. 2020-Yili 21-féwral. Feyirfeks, amérika.
RFA/Jume

21-Féwral amérikida xatirilen'gen "Ana til küni" de muhajirette ana tilni ewladmu-ewlad dawamlashturush üchün, uni turmushning herbir halqisigha singdürüshning zörürlüki tekitlendi.

Pa'aliyetni amérikining wirjiniye shtatigha jaylashqan "Méhriban ana ma'aripi" jem'iyiti bilen amérika Uyghur birleshmisi hemkarliship teshkilligen. Feyirfeks shehiridiki Uyghur pa'aliyet merkizining zali bu alahide kün üchün kelgen her sahe zatliri, ata-anilar we yash-ösmürler bilen tolghan idi.

Pa'aliyetke yene melum sanda Uyghurlarning amérikiliq dostlirimu ishtirak qildi.

Bu künni tolimu menilik bir kün déyishke bolatti. Chünki bu kün "Dunya ana til küni" munasiwiti bilen Uyghurlar bir yerge yighilip, öz ana tiligha bolghan söygüsini izhar qilishqan bir kün bolupla qalmay, belki yene, Uyghur tili üchün türmide azab chekken ana til pa'aliyetchisi abduweli ayupmu ishtirak qilghan alahide bir kün idi.

Aldi bilen sözge chiqqan amérika Uyghur birleshmisining re'isi quzzat altay ependim yighin ishtirakchilirigha rehmet éytqach, abduweli ayupni qisqiche tonushturdi we uni sehnige teklip qildi.

Chawak we alqish sadaliri ilikide nutqini bashlighan abduweli ayup Uyghur ana tilini muhajirette qandaq saqlap qélish heqqide öz qarashlirini otturigha qoydi. U yene, ana tilni shenbe yekshenbilerdiki kurslarda anglaydighan til emes, belki uni turmushtiki barliq halqilargha singdürüshning zörürlükini tekitlidi.

Uning sözi tamamlan'ghandin kéyin uninggha jama'et teyyarlighan bir lewhe teqdim qilindi we ana til kursining ghunchiliri birdin kélip unigha gül tutti. Bu körünüsh intayin tesirlik bolghan idi. Abduweli ayupning közliridinmu hayajan yashliri egiytti.

Pa'aliyet shé'ir déklamatsiye qilish, naxsha muzikilarni orunlash sheklide dawam qildi.

Abduweli ayup 2011-yili amérikadiki oqushini tamamlighandin kéyin, yurtigha qaytqan we Uyghur tilini qoghdap qélish üchün qilghan pa'aliyetliri seweblik 2013-yilidin 2014-yilghiche türmige tashlan'ghan. U türmidin qoyup bérilgendin kéyin türkiyege kélip yerleshken we ötken yili norwégiyege köchüp ketken. U bu qétim Uyghurlargha munasiwetlik bir muhakime yighinigha qatnishish üchün amérikigha kelgen idi.

Axirida ziyaritimizni qobul qilghan abduweli ayup özining mezkur pa'aliyettin alghan tesiratini biz bilen ortaqlashti.

Toluq bet