Qirghizistanda ana til bayrimi xatirlendi

Ixtiyariy muxbirimiz féruze
2020-02-21
Élxet
Pikir
Share
Print
Qirghizistanda ötküzülgen ana til bayrimidin bir körünüsh. 2020-Yili 21-féwral. Qirghizistan.
Qirghizistanda ötküzülgen ana til bayrimidin bir körünüsh. 2020-Yili 21-féwral. Qirghizistan.
RFA/Feruze

21-Féwral küni qirghizistan Uyghurliri "Ittipaq" jem'iyitining idarisigha jem bolup, xelq'ara ana til künini xatirlidi. Mezkur pa'aliyetke qirghizistan xelq birleshmisi kéngishining re'isi abdughéni erkibayéf, mu'awin re'isi zohre shidakowa shundala az sanliq milletler wekilliri, "Ittipaq" jem'iyitining aktip ezaliri we bir qisim oqutquchi-oqughuchilar qatnashti.

Bu yilliq ana til bayrimi yash-ösmürlerning wetenperwerlik rohini kötürüsh üchün qirghizistan Uyghurliri "Ittipaq" jem'iyiti teripidin uyushturuldi. Mezkur murasimgha ala-tuw, keng-bulung, lébédinowka we sherq yézilardiki mekteplerning oquguchiliri qatnashti. Ular Uyghur tilida qisqa shé'irlarni oqudi hem Uyghur milliy usullirini orundidi. 

Tentenilik murasim "Ittipaq" jem'iyiti medeniyet bölümining bashchisi gülnaz mexsutowaning riyasetchiligide élip bérildi. Murasim dawamida ana tilning ehmiyiti toghrisida nurghun nutuqlar sözlendi. Qirghizistan xelq birleshmisi kéngishining re'isi abdughéni erkibayéf söz qilip, Uyghur xelqining eng qedimiy xelqrining biri ikenlikini, ularning til, yézik we medeniyet en'enilirining tolimu özgiche hem rengdar ikenlikini tekitlep ötti.

"Ittipaq" jem'iyitining re'isi esqer qasimi we "Ittipaq" gézitining bash muhérriri ekberjan bawudunoflar qatnashquchilargha qizghin teshekkür bildürüp, ulargha Uyghur tilida pehriy yarliqlarni teqdim qilishti. 

Shuni tekitlep ötüsh kérekki, qirghizistan mektepliride Uyghur tili sinipliri yoq. Emma shundaq bolsimu Uyghur mu'ellimler balilargha Uyghur tilida shéirlarni yadlitip, ularning Uyghur milliy kimlikini unutmasliqi üchün mezkur murasimgha bashlap kélishiptu. 

Ular lébédinowka yézisining mektipidiki matématika mu'ellimi reyhan musaxanowa, keng bulung yézisining mektipididiki abdusallam ghappar mu'ellim, ala-tuw yézisidiki mektep mu'ellimi we sherq yézisining mektipidiki rus tili mu'ellimi rana qasimowalardur. Balilar köpinche Uyghur xelqi we Uyghur diyari toghrisidiki shéirlarni déklamatsiye qilishti.

Radiyomiz ziyaritimizni qobul qilghan keng bulung yézisidiki mektep mu'ellimi abdusalam ghappar buningdin kéyin qirghizistanda Uyghur tilining saqlinip qélishida ümidi barliqini izhar qildi.

Mezkur murasimgha qatnashqan "Ittipaq" jem'iyiti ayallar kéngishining eng aktip ezaliridin birsi nilufer hashimowa radiyomiz ziyaritini qobul qilip, Uyghur yash-ösmürlirining ana til öginish mumkinchilikidin mehrum qalghanlighidin nahayiti epsusliniwatqanliqini bildürdi.

Nilufer xanim yene mezkur pa'aliyetning chong ehmiyetke ige ikenlikini tekitlep, Uyghur mu'ellimlerge we oquguchilargha öz minetdarliqini izhar qildi.

Ana til künini xatirilesh murasimliri yene jalal'abad we osh sheherliridimu uyushturuldi. Qirghizistanning herqaysiy yéza-sheherliride uyushturulghan ana til bayrimigha'a Uyghur jama'iti aktipliq bilen qatniship, körgezmilerni uyushturushti.

Toluq bet