Amérika Uyghurliri yéngi yilni ümidler ilkide kütüwaldi

Muxbirimiz gülchéhre
2020-01-01
Élxet
Pikir
Share
Print
Amérika Uyghurlirining yéngi yilni kütüwélish kéchilikidin bir körünüsh. 2019-Yili 31-dékabir. Xerndon, amérika.
Amérika Uyghurlirining yéngi yilni kütüwélish kéchilikidin bir körünüsh. 2019-Yili 31-dékabir. Xerndon, amérika.
RFA/Gulchehre

Amérika Uyghur birleshmisining teshkillishi we bir ayche waqit jiddiy teyyarliqi bilen amérika Uyghurlirining 2019-yilni uzutup 2020-yilini kütüwélish murasimigha yarishimliq güzel qiyapetliri bilen qedem teshrip qilghan 500 din artuq Uyghur we ularning amérikaliq dostliri mezzilik milli ta'amlar, weten ichi sirtida shöhret qazan'ghan kespiy Uyghur we bashqa sen'etkarlarning yuqiri maharet bilen orundighan ser xil sen'et nomurliridin hozurlandi.

Uyghurche keypiyat, Uyghurluq söygüsi ichide yéngi yilni ortaq kütüwélish arzusida washin'gton shehiri we uning etrapidiki shitatlar hemde kanada, awstraliye, türkiye qatarliq döletlerdin kélip pa'aliyetke jem bolghan Uyghurlarni aldi bilen sorunning bash sahibxani bolghan amérika Uyghur birleshmisining re'isi quzzat altay ependi qizghin tebrik nutiqi bilen kütüwaldi.

Amérikada ösüp yétiliwatqan bir türküm sen'etxumar Uyghur yashlirining özlikidin teshkillinip teyyarlighan dolan meshripi bilen bashlan'ghan mezkur sen'et pa'aliyitige meshrep tüsi kirgüzse, ana til mektipidiki omaq sebiylerning naxsha-ussuluq nomurliri hemmini söyündüridu, . Yumur we külke-chaqchaqlarmu kem qalmidi. Kishiler, amérika Uyghurlirining bu yéngi yil kéchilikige qatnashqan artislardin 6 yéshidin bashlapla bala cholpan süpitide Uyghur diyarining chong kichik sehniliride közge körün'gen, yél uniwérsitétni püttürüp pi'anist bolup yétishken yash sen'etkar qeyser enwer we yene daniyar, nurshat asim qatarliq talantliq naxshichilarning orundighan mungluq mélodiye, Uyghurlargha tonushluq ussulluq xelq naxshilirigha egiship birdem xiyallargha chömse, birdem ixtiyarsiz usulgha chüshti.
Uyghurlarning yéngi yil axshimigha Uyghur doppisini kiyip, dutarini alghach kelgen, Uyghurlar nazaket dep chaqiridighan elis andérsun xanim özini xuddi ürümchining sorunida hés qiliwatqanliqini éytqinida hemme qoshulup chawak chaldi. Chünki, heqiqetenmu bu axsham amérika Uyghurliri özlirini xuddi wetinidikidek hés qilishmaqta idi.

Kanadadin teklip qilin'ghan közge körün'gen sérik artisi aygül memet we uning izbasar qizliri orundighan yuqiri maharetlik sérk nomurliri yéngi yil kéchilikining keypiyatini téximu yuqiri kötürdi. Méhmanlar ser xil naxsha usul nomurliridin behrliniwatqan esnada bashtin axir sehnidiki nomurlargha chawak chélip hemmige méhri bilen béqip olturghan Uyghur milliy herikiti yétekchiliridin rabiye qadir xanimni ziyaret qilduq.

U gerche, 2019 yili Uyghurlar wetinidiki Uyghurlar üchün tarixidiki intayin azabliq, küp bedeller tölen'gen bir yil bolghan bolsimu, biraq amérikadiki Uyghurlarning bügünki yéngi yilni yashlirini sürtüp, orunliridin des turup, hayatqa bolghan tolup tashqan ümid we ishench bilen kütüwéliwatqanliqini we-2020-yilining Uyghurlar üchün téximu netijilik oyghinish yili bolidighanliqini bildürdi. 

Amérika indi'ana uniwérsitétni püttürüp, merkizi washin'gtondiki Uyghur kishilik hoquq qurulushigha yéngidin xizmetke chüshken mustafa aqsu ependi, özining amérikida tunji qétim bunche köp Uyghur yighilghan sorun'gha ishtirak qilishi bolghachqa bekmu hayajanlan'ghanliqni, buning hayatidiki eng menilik bir yéngi yil bolghanliqini we Uyghurlardiki bu ümidwarliqtin zor ilham alghanliqini bildürdi. U: "Men üchün 2020-yili ümidtin dérek béridu, bu yil Uyghurlar üchün tirilish yili bolushini ümid qilimen" dédi.

Amérika Uyghurliri bilen barawer yéngi yilni qutluqlighan amérikaliq dostlardin Uyghurlarni qollash pa'aliyetlirige aktip awaz qoshup kéliwatqan makis ependi hayajanda barliq pa'aliyetni öre turup körüwatatti. Uninggha mikrafonimizni tengliginimizde, u özining bu yéngi yilni Uyghurlar bilen ötküzgenlikidin bekmu xushallan'ghanliqini bildürdi.

U, : "2019-Yili Uyghurlar üchün birlishish yili, jasaret yili, xelq'aragha Uyghurni tonutush yili, xitayning rezilliklirini échish yili boldi dep qaraymen. Pütün dunyadiki erkinlikini söyidighan dölet we xelqlerning 2020-yilida Uyghurlar üchün heriketke ötüsh yili bolushini kütimen", dédi.

Murasim riyasetchiliri her bir programma arisida pütün Uyghur xelqining yéngi yilini tebriklep, barliq Uyghurlarning ata-anisi we a'ilisi bilen jem bolushigha tilek tilesh bilen birge Uyghur amérika birleshmisining pa'aliyetchi firqet jewdetning ghuljidiki lagérlarda zulum körgen anisi munewwer tursun xanimni 2019-yilidiki Uyghur qehriman ana mukapatigha layiq körgenlikini élan qildi.

Anisigha wakaliten mukapatni tapshurup alghan firqet sehnidin chüshüp ziyaritimizni qobul qildi. U: "Bir perzent bolush süpitim bilen 2019-yilidiki barliq tirishchanliqlar netijiside anam lagérdin qutulup chiqqan bolsa, 2020-yilidiki eng chong arzuyum bekmu addiy, bu yilda apamni amérikagha saq-salamet élip kélip, on nechche yildin béri jem bolalmighan a'ilem bilen bir dastixanda ghizalinish" deydu.

Bir-brige ulan'ghan serxil sen'et nomurliri 3 sa'ettin artuq dawam qildi. Köngüllük bu sorundin harduqi chiqqanliqini bildürgen amérika Uyghurliri birleshmisining re'isi quzzat altay ependi "Xitay kompartiyesi biz Uyghurlarning chüshkünlishishimizi xalaydu, düshmen némni xalisa uning del eksini qilishimiz kérek, biz jenggiwar bolushimiz kérek, bügünki bu pa'aliyet xitay kompartiyesige bir signal, sen méni oltürimen dégen bolsang, men tirilimen dégen bir signal" deydu.

Amérika Uyghurliri birleshmisi qurulghandin buyan, her yili washin'gton etrapidiki Uyghur muhajirlirini bir arigha jem qilip, yéngi yilni ortaq kütüwalmaqta. Bu nöwet eng köp Uyghur yighilghan bir qétimliq pa'aliyet boldi. 500 Din artuq Uyghur 2019-yilining axirqi sékontlirini bille sanap uzatti. Ular yéngi keypiyat, yéngi ümidler ilkide "Bizning naxshimiz" xorigha jor bolup kirip keldi.

Toluq bet