Türkiye ichki ishlar ministiri zinnetgül tursunning qayturulush mesilisining tekshürülidighanliqini bildürgen

Muxbirimiz erkin
2019-08-02
Élxet
Pikir
Share
Print

Türkiye ichki ishlar ministiri sulayman soylu türkiyediki bir qisim Uyghur teshkilatlirining wekillirini qobul qilip, ulargha zinnetgül tursunning qayturulush mesilisining tekshürülidighanliqi we tekshürüsh netijisige qarap qanuniy tedbir qollinidighanliqini bildürgen.

Türkiyediki sherqiy türkistan ma'arip hemkarliq jem'iyitining re'isi hidayetulla oghuzxanning 3‏-awghust féysbuktiki uchurida ashkarilishiche, sulayman soylu bu sözlerni 3‏-awghust küni türkiyediki sherqiy türkistan ijtima'iy teshkilatlar birlikining wekillirini qobul qilghanda tekitligen. Bu yil 6‏-ayda türkiye köchmenler idarisi zinnetgül tursun isimlik ghuljaliq ayalni 2 balisi bilen tajikistan arqiliq xitaygha qayturuwetkenliki ilgiri sürülüp, chet'eldiki Uyghurlar arisida qattiq ghulghula qozghighan. Türkiye köchmenler idarisi we ichki ishlar ministirliqi zinnetgülning qayturulghanliqini ret qilghan bolsimu, lékin uning türkiyede ikenlikige heqqide héchqandaq delil körsitip bérelmigen idi.

Hidayetulla oghuzxanning bildürüshiche, Uyghur wekiller jüme küni sulayman soylu bilen körüshkende zinnetgülning mesilisini otturigha qoyup, Uyghurlarning bu mesilidiki "Iztirap we endishiliri" ni yetküzgen. Sulayman soylu "Bu mesilining resmiy teptish hey'iti arqiliq tekshürülüp, netijige köre qanuniy ijra'at yürgüzülidighanliqi" ni bildürgen. Hidayetulla oghuzxanning ashkarilishiche, sulayman soylu yene jüme küni tajikistan elchixanisining tashqi ishlar ministirliqigha chaqirilip, "Bir Uyghurni tajik, dep élip kétishtek bu heriketke arilashqan yaki arilashmighanliqi" we Uyghurlarning xitaygha qet'iy qayturulmaydighanliqini bildürgen. Sulayman soylu yene wekillerning telipige bina'en türkiye köchmenler idarisi tutup turuwatqan 47 neper Uyghurni qoyup bérishni, saqchilargha sherqiy türkistan jem'iyet we wexpilirige tuyuqsiz bésip kirip aware qilmasliq heqqide buyruq chüshürgen.

Türkiye hökümiti yéqinda xitayning teklipini qobul qilip, Uyghur aptonom rayonigha 10 kishilik tekshürüsh guruppisi ewetidighanliqini élan qilghan idi. Hidayetulla oghuzxanning bildürüshiche, jüme künidiki uchrishishta ular buninggha da'ir 16 maddiliq tewsiye we teklip sun'ghan.

Toluq bet