Түркийә ички ишлар министири зиннәтгүл турсунниң қайтурулуш мәсилисиниң тәкшүрүлидиғанлиқини билдүргән

Мухбиримиз әркин
2019-08-02
Елхәт
Пикир
Share
Принт

Түркийә ички ишлар министири сулайман сойлу түркийәдики бир қисим уйғур тәшкилатлириниң вәкиллирини қобул қилип, уларға зиннәтгүл турсунниң қайтурулуш мәсилисиниң тәкшүрүлидиғанлиқи вә тәкшүрүш нәтиҗисигә қарап қануний тәдбир қоллинидиғанлиқини билдүргән.

Түркийәдики шәрқий түркистан маарип һәмкарлиқ җәмийитиниң рәиси һидайәтулла оғузханниң 3‏-авғуст фейсбуктики учурида ашкарилишичә, сулайман сойлу бу сөзләрни 3‏-авғуст күни түркийәдики шәрқий түркистан иҗтимаий тәшкилатлар бирликиниң вәкиллирини қобул қилғанда тәкитлигән. Бу йил 6‏-айда түркийә көчмәнләр идариси зиннәтгүл турсун исимлик ғулҗалиқ аялни 2 балиси билән таҗикистан арқилиқ хитайға қайтурувәткәнлики илгири сүрүлүп, чәтәлдики уйғурлар арисида қаттиқ ғулғула қозғиған. Түркийә көчмәнләр идариси вә ички ишлар министирлиқи зиннәтгүлниң қайтурулғанлиқини рәт қилған болсиму, лекин униң түркийәдә икәнликигә һәққидә һечқандақ дәлил көрситип берәлмигән иди.

Һидайәтулла оғузханниң билдүрүшичә, уйғур вәкилләр җүмә күни сулайман сойлу билән көрүшкәндә зиннәтгүлниң мәсилисини оттуриға қоюп, уйғурларниң бу мәсилидики «изтирап вә әндишилири» ни йәткүзгән. Сулайман сойлу «бу мәсилиниң рәсмий тәптиш һәйити арқилиқ тәкшүрүлүп, нәтиҗигә көрә қануний иҗраат йүргүзүлидиғанлиқи» ни билдүргән. Һидайәтулла оғузханниң ашкарилишичә, сулайман сойлу йәнә җүмә күни таҗикистан әлчиханисиниң ташқи ишлар министирлиқиға чақирилип, «бир уйғурни таҗик, дәп елип кетиштәк бу һәрикәткә арилашқан яки арилашмиғанлиқи» вә уйғурларниң хитайға қәтий қайтурулмайдиғанлиқини билдүргән. Сулайман сойлу йәнә вәкилләрниң тәлипигә бинаән түркийә көчмәнләр идариси тутуп туруватқан 47 нәпәр уйғурни қоюп беришни, сақчиларға шәрқий түркистан җәмийәт вә вәхпилиригә туюқсиз бесип кирип аварә қилмаслиқ һәққидә буйруқ чүшүргән.

Түркийә һөкүмити йеқинда хитайниң тәклипини қобул қилип, уйғур аптоном райониға 10 кишилик тәкшүрүш гурупписи әвәтидиғанлиқини елан қилған иди. Һидайәтулла оғузханниң билдүрүшичә, җүмә күнидики учришишта улар буниңға даир 16 маддилиқ тәвсийә вә тәклип сунған.

Пикирләр (0)
Share
Толуқ бәт