«Зимистан» тори ата-анилири лагерларға қамалған уйғур балилириниң ечинишлиқ әһваллирини ашкарилиди

Мухбиримиз ирадә
2019-08-08
Елхәт
Пикир
Share
Принт

Уйғур елиниң нөвәттики вәзийитигә аит муһим учурларни ашкарилап келиватқан «зимистан» тори 6-авғуст күни уйғур елидә ата-анилири лагерларға қамалған балиларниң әһвали һәққидә игилигән бир қисим учурлирини тарқатти.

Уларниң баян қилишичә, ата-анилири лагерға қамилип, йетимға айландурулған бу балилар худди түрмиләрни әслитидиған йетимханиларға йиғивелинғанлиқи, уларниң бу орунларда пәрвишсиз қалғанлиқини, һәтта 2-3 яшлиқ балиларниңму өз һалидин өзи хәвәр елишқа ташлап қоюлғанлиқини баян қилған.

Уйғур елидики мәлум бир башланғуч мәктәпниң хитай оқутқучиси «зимистан» ториға өзиниң бу һәқтики туйғулирини ашкарилиған. У, өзиниң 11-айдики тоң қишта 8 яшлиқ бир уйғур балисиниң непиз чапан билән талада тоңлап турғанлиқини көргәнлики, у балиниң ата-анисиниң 2017-йили мартта лагерға қамалғандин бери һечқандақ из-дерики болмиғанлиқини, бу балиниң йәнә бир қанчә кичик қериндашлири билән бирликтә 70 тин һалқиған вә һечқандақ кирим мәнбәси болмиған қери момисиға қарашлиқ болуп қалғанлиқини ейтип бәргән. У оқутқучиниң ейтип беришичә, бу момай вә нәврилири қорсиқиниму тәстә тойғузидикән. Бу хитай оқутқучи «зимистан» ториға қилған сөзидә «өзиниң бу балиниң әһвалини көрүп бәкму азабланғанлиқини, уйғур балилириниң ата-аниларниң меһри-муһәббитидин мәһрум қилинғанлиқини» ейтқан.

«Зимистан» тори йәнә уйғур елидики бир қисим хитай оттура мәктәп оқуғучилири биләнму сөзләшкән. Улар өзлири билән савақдаш оқуйдиған уйғур балиларниң аилә тавабиатлириниң асасән дегүдәк лагерда икәнлики, бу уйғур балиларниң синипта давамлиқ хитай савақдашлири тәрипидин көзитилидиғанлиқи вә савақдашлириниң нәзиридә «йошурун террорчи» дәп қарилидиғанлиқини билдүргән.

Хитай һөкүмити тәрипидин «тирик йетим» ға айландурулған уйғур балилириниң вәзийити вә уларниң келәчики уйғур вәзийитини йеқиндин көзитиватқан тәтқиқатчилар вә шундақла кәң уйғур җамаитини күчлүк әндишигә салмақта.

Пикирләр (0)
Share
Толуқ бәт