D u q: "'zimistan' muxbirlirining tutqun qilinishidin qattiq endishe qilmaqtimiz"

Muxbirimiz erkin
2019-01-18
Élxet
Pikir
Share
Print

Dunya Uyghur qurultiyi 18‏-yanwar bayanat élan qilip, italiyediki diniy erkinlik we kishilik hoquq tori‏- "Zimistan" torining muxbirlirining tutqun qilinishi we iz-déreksiz ghayib bolushidin qattiq endishe qiliwatqanliqini bildürdi. "Zimistan" tori Uyghur rayonigha muxbir ewetip, dunyani mezkur rayonidiki lagérlar heqqide deliller bilen teminlep kéliwatqan torlarning biri. Lékin, ötken yili 8‏-aydin bashlap mezkur torning 45 neper xitay muxbiri tutqun qilin'ghan yaki iz-déreksiz yoqalghan. Melum bolushiche, yuqiriqi 45 neper muxbirining 4 nepiri ichkiride tutqun qilin'ghan, qalghan 41 nepiri Uyghur rayonida ghayib bolghan.

Dunya Uyghur qurultiyi bayanatida, bu muxbirlar dunyaning "Yamanliship kétiwatqan Uyghur kishilik hoquq weziyitini, xitayning kishilik hoquqqa xilapliq qilishi, Uyghur we bashqa étnik hem diniy guruppilarni jazalawatqanliqigha ortaq chüshenche hasil qilishida intayin muhim deliller bilen teminlep kelgenliki" ni bildürgen. "Zimistan" torining bir muxbiri ötken yili 11‏-ayda ghuljining yéngiyer bazirida quruluwatqan bir yighiwélish lagérini sin'gha élip, mezkur torda élan qilghan. Bu muxbir shuningdin kéyin ghayib bolghan idi.

Dunya Uyghur qurultiyi bayanatida: "Biz heqiqetni ashkarilashqa jasaret qilghan bu kishilerni untup qalmasliqimiz kérek. Biz yene xelq'ara jem'iyetni xitay hökümitige bu muxbirlarni qoyup bérish we axbarat erkinlikige hörmet qilish heqqide ünlük xitab qilishqa chaqirimiz" dégen. "Zimistan" torining ilgiri sürüshiche, ularning tutqun qilin'ghanliqi éniq bolsimu, emma aqiwitining qandaq bolghanliqi melum emes iken.

Toluq bet