Йеңи зеландийә баш министири хитайдики зияритидә уйғур мәсилисини тилға алған-алмиғанлиқи һәққидә ениқ җаваб бәрмигән

Мухбиримиз ирадә
2019-04-02
Елхәт
Пикир
Share
Принт

1-Апрел күни, хитайда рәсмий зиярәттә болған йеңи зеландийә баш министири җәйсинда ардерин хитайдики зияритидә кишилик һоқуқ мәсилисини оттуриға қойғанлиқини билдүргән. Бирақ униң уйғур мусулманлири учраватқан зулум һәққидә тохталған-тохталмиғанлиқи ениқ әмәс.

Бу һәқтә йеңи зеландийәниң «хәвәр мәркизи» намлиқ хәвәр ториниң билдүрүшичә, у мухбирларниң уйғур елидики лагерлар мәсилисини тилға алған-алмиғанлиқи һәққидики соалиға җаваб бәрмигән болсиму әмма өзиниң кишилик һоқуқ мәсилисини тилға алғанлиқини ейтип: «мән кишилик һоқуқ мәсилисини хитай дөләт рәиси вә баш министири билән көрүшкәндә биваситә оттуриға қойдум. Қолумдин келидиғини мушунчилик» дегән. 

Йеңи зеландийә баш министири җәйсинда ардерин йеқинда йеңи зеландийәдики икки мәсчиткә елип берилған қораллиқ һуҗумни қаттиқ әйибләп, мусулманлар арисида бирдинла абруй қазанған иди. Дәл шундақ бир пәйттә хитайға рәсмий зиярәткә маңған йеңи зеландийә баш министири җәйсинда ардеринниң уйғур мусулманлириниң мәсилиси үстидә қандақ бир позитсийә билдүридиғанлиқи күчлүк диққәт қозғиған. 

У сәпәргә атлиниш алдида, кишилик һоқуқни көзитиш тәшкилати баянат елан қилип, баш министир ардерн ханимни зиярәт давамида уйғур райондики лагерлар мәсилисини ашкара оттуриға қоюшқа дәвәт қилип, уни мусулманларниң һәқ-һоқуқини қоғдашта ойниған хәлқаралиқ башламчилиқ ролини хитайдики мусулманлар үчүнму охшаш тәтбиқлиши керәкликини әскәрткән. 

Һалбуки, бу һәқтики соалларни җавабсиз қойған ардерин ханим: «йеңи зеландийәниң кишилик һоқуқтин ибарәт асасий принсипта чиң туридиғанлиқи вә бу һәқтә келидиған күнләрдә давамлиқ хизмәт қилидиғанлиқини» ипадә қилған.

Пикирләр (0)
Share
Толуқ бәт