Японийә вақти: «токйодики уйғур ресторанлири уйғурларниң йетүк тамақ мәдәнийитини намаян қилмақта»

Мухбиримиз әркин
2019-03-04
Елхәт
Пикир
Share
Принт

Инглиз тилида чиқидиған «японийә вақти» гезити 2‏-март күни мақалә елан қилип, токйодики уйғур ресторанлирини тонуштурған.

«Тамақ арқилиқ җәннәтни тепиш: токйодики уйғур ресторанлири» сәрләвһилик мақалидә қәйт қилинишичә, токйодики уйғур ресторанлири уйғур районида дуч келиватқан пүтүн мүшкүлатларға қаримай, уйғур мәдәнийитини тонуштурушта иҗабий рол ойнимақта икән.

Мақалидә, уйғурларниң вәзийити 2018‏-йили 11‏-айда б д т кишилик һоқуқ кеңишиниң қаттиқ тәнқидигә учрап, хәлқараниң диққәт нуқтисиға айланған болсиму, лекин уларниң йетүк тамақ мәдәнийити йетәрлик диққәткә сазавәр болалмиғанлиқи билдүрүлгән.

Мақалидә, токйониң шинҗуку районидики «тарим йипәк йоли ресторани», такаданобаба районидики «үрүмчи ресторани» вә сугамо районидики «рәйһан ресторани» тонуштурулған.

Мақалидә қәйт қилинишичә, манта, ләңмән, тоху қордиқи қатарлиқлар бу ресторанларниң базири әң иттик тамақлирикән. Хәвәрдә йәнә «тарим йипәк йоли ресторани» ниң хоҗайини сираҗидин керимниң сөзи нәқил кәлтүрүлгән болуп, у токйода японлар билән уйғурлар мәхсус мәдәнийәт алмаштуридиған бирәр орун йоқлуқи, һалбуки униң ресторани бу ролни ойнаватқанлиқини билдүргән.

«Рәйһан ресторани» ниң хоҗайини рәйһангүл алимниң «японийә вақти» гезитигә билдүрүшичә, у 2003‏-йили йолдишини йоқлап японийәгә кәлгәндила ресторан ечишни көңлигә пүккән икән.

У: «мән шу чағда японийәлик достларға тамақ етип бәрсәм улар тамақниң шунчилик тәмлик, уйғур тамиқини шунчилик яхши көридиғанлиқини тәрипләйтти. Мән шу чағдила әгәр японийәдә туруп қалсам ресторан ечишни қарар қилған идим» дегән. Мақалиниң ахирида қәйт қилинишичә, уйғурларниң «шинҗаңда учраватқан пүтүн мүшкүлатлириға қаримай, токйодики уйғур ресторанлири йәнила һәр қайси хәлқләргә өзлириниң йетүк тамақ мәдәнийити вә меһмандостлуқини сунмақта» икән.

Пикирләр (0)
Share
Толуқ бәт